ޔޫކްރެއިނުގެ ވެރިރަށް ކީވްގެ އުތުރުން އޮންނަ ޔަހިދްނާ ކިޔާ ރަށަށް އެ ޤައުމުގެ ރައީސް ވޮލޮޑޮމީރް ޒެލެންސްކީ ޒިޔާރަތް ކުރައްވައިފިއެވެ. ޔަހިދްނީއަކީ، ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމައިގެ ކުރީކޮޅު ރަޝިޔާ ސިފައިން އަތްގަދަކުރި ރަށެކެވެ. ޒެލެންސްކީ އެ ރަށަށް ވަޑައިގަންނަވާފައި މި ވަނީ، ރަޝިޔާ ސިފައިންގެ އަތްދަށުން އެ ރަށް މިނިވަންކުރިތާ އެއް އަހަރު ފުރޭ މުނާސަބަތާ ދިމާކޮށެވެ.
އެ ރަށް ހިފުމަށް ފަހު ރަޝިޔާ ސިފައިން ވަނީ އެ ރަށުގެ ރައްޔިތުންނާ މެދު ވަރަށް ނިކަމެތިކޮށް އަމަލުކޮށްފައެވެ. އެ ރަށުގައި އެ ވަގުތު ތިބި 367 މީހުން ބައިތިއްބާފައި ތިބީ ސްކޫލެއްގެ ކުޑަ ބިންގަރާހެއްގައެވެ. އެއީ، 200 އަކަމީޓަރުގެ ކުޑަ ތަންކޮޅެކެވެ.
އެ ތަނުގައި ޔަހިދްނާގެ ރައްޔިތުން ފިތި ބާރުވެގެން ވަރަށް ދަތި ހާލުގައި މަހެއްހާ ދުވަހު ދިރިއުޅެން ޖެހުނެވެ. ފާޚާނާ ކުރަން ހުންނަނީ ބާލިދީއެކެވެ. އެ ތަނުގައި ބައިތިއްބާފައިވާ މީހުންގެ ތެރޭގައި 18 މަހުގެ ތުއްތު ކުއްޖަކު ވެސް ހިމެނެއެވެ. އަދި، ރަޝިޔާ އިސްތިއުމާރީ ސިފައިންގެ އަތްދަށުގައި އެ މީހުން ހޭދަކުރި ދުވަސްތަކުގެ ތެރޭގައި އޭގެތެރެއިން 11 މީހުން ވަނީ މަރުވެފައެވެ. ބައެއް މީހުން މަރުވީ އޮކްސިޖަން ނުލިބިގެންނެވެ.
ޔަހިދްނާއަށް ޒެލެންސްކީ ކުރެއްވި ޒިޔާރަތުގައި އޭނާގެ އަރިހުގައި ޖަރުމަނުވިލާތުގެ ޗާންސެލަރުގެ ނައިބު ރޮބަރޓް ހާބެކް ވެސް އެ ރަށަށް ވަޑައިގެންނެވިއެވެ. ޔަހިދްނާގައި ވާހަކަފުޅު ދައްކަވަމުން ޒެލެންސްކީ ވިދާޅުވީ، އެ ރަށުގެ ރައްޔިތުންނަށް ރަޝިޔާގެ ރައީސް ވްލަޑިމިޔަރ ޕުޓިން ޖެއްސެވި ނިކަތި ހާލު އޭނާއަށް ޖެހޭނެ ދުވަހެއް ދެކެން ބޭނުންވާ ކަމުގައެވެ. އަދި، އަނދިރި ބިންގަރާހެއްގައި ބާލިދީއެއް ހިފައިގެން ގިނިކަންޏާ ޕުޓިންނަށް ވެސް އިންނަވަން ޖެހިވަޑައިގަންނަވާނެ ދުވަހެއް އަންނާނެ ކަމުގައި ޒެލެންސްކީ ވިދާޅުވިއެވެ.
ޔަހިދްނާއަށް ޒެލެންސްކީ ވަޑައިގަންނަވާފައި މި ވަނީ، އެ ޤައުމުގެ އިރުމަތީގައިވާ ބަޚްމުތް ރަޝިޔާ ސިފައިންގެ އަތްދަށަށް ވެއްޓިފައިވާ ކަމުގެ ރިޕޯޓުތައް ފެތުރެމުންދާ ދަނޑިވަޅެއްގައެވެ. ޑޮނެޓްސްކުގެ ރަށެއް ކަމުގައިވާ ބަޚްމުތް ހިފާފައިވާ ކަމުގައި ވެގްނަރ ގުރޫޕުގެ ކުލީ ސިފައިން ވަނީ ބުނެފައެވެ. ނަމަވެސް، ޔޫކްރެއިނުން އަދި މިހާތަނަށް އެ ކަން ކަށަވަރު ކޮށްދީފައެއް ނުވެއެވެ.
ބަޚްމުތް ހިފުމަށް، ވެގްނަރ ގުރޫޕުގެ ކުލީ ސިފައިން ފޮނުވައިގެން ރަޝިޔާއިން މަސައްކަތް ފަށާފައި ވަނީ މީގެ އަށެއްކަ މަސް ކުރިންނެވެ. އެ ރަށް ހިފުމަށް ކުރަމުންދާ ހަނގުރާމައިގެ ކުރީ ސަފަށް ރަޝިޔާއިން ވަނީ އެ ޤައުމުގެ އަސްކަރިއްޔާގެ އެންމެ ތަޖުރިބާކާރު ޔުނިޓުތައް ވެސް ފޮނުވާފައެވެ. ވެގްނަރ ގުރޫޕުން ބުނީ، ބަޚްމުތްގެ ސިޓީ ހޯލް، ނުވަތަ ސިޓީ ކައުންސިލުގެ މައި އިދާރާ މިހާރު އޮތީ އެ މީހުންގެ އަތްދަށުގައި ކަމުގައެވެ.
ބަޚްމުތް ދިފާޢުކުރުމަކީ ޔޫކްރެއިނުގެ މިނިވަންކަމާއި ސިޔާދަތު ހިމާޔަތްކުރުމަށް އެ ޤައުމުގެ ސިފައިން ކުރަމުންދާ ހަނގުރާމައިގެ މުހިންމު ފިޔަވަޅެއް ކަމުގައި ޔޫކްރެއިނުން ގަބޫލުކުރެއެވެ. އަދި، އެ ރަށް ހިފުމަކީ ރަޝިޔާއަށް ވެސް ލިބޭނެ ވަރަށް ބޮޑު ކުރިއެރުމެއްގެ ގޮތުގައި އެ ޤައުމުން ދެކެއެވެ. ސަބަބަކީ، އެ ރަށް ހިފުމާއެކު، އެ ސަރަޙައްދުގައިވާ އެހެން ރަށްތަކަށް އަތްގަދަކުރުމަށް ރަޝިޔާ ސިފައިންނަށް ފަސޭހަވާނެ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.