ނެދަލެންޑްސްގައި ހިނގި ނުރައްކާތެރި ރޭލު އެކްސިޑެންޓެއްގައި އެކަކު މަރުވެ ގިނަ ޢަދަދެއްގެ ބަޔަކު ޒަޚަމުވެއްޖެއެވެ. މި ހާދިސާ ހިނގާފައި ވަނީ ނެދަލެންޑްސްގެ ހުޅަނގުގައިވާ ވޯޝްހޯޓެންގައެވެ. މި ހާދިސާގައި ޒަޚަމުވި މީހުންގެ ޢަދަދު 30 އަށް އަރައެވެ.
50 ފަސިންޖަރުންނާ އެކު ދަތުރުކުރަމުން ދިޔަ ރޭލު ދަގަނޑުތައް މަތިން ކަހައިލައިގެން ފުރޮޅައިލާފައި ވަނީ ވޯޝްހޯޓެންގައި ރޭލު ދަތުރުކުރަމުންދިޔަ ސަރަޙައްދުގައި ހުރި ޢިމާރާތްކުރުމަށް ބޭނުންކުރާ އާލާތްތަކެއްގައި ޖެހުމުގެ ސަބަބުން ކަމަށް އޮފިޝަލުން ވިދާޅިވެއެވެ. ދަންވަރުގެ ވަގުތުގައި ހިނގި މި ހާދިސާގައި ޒަޚަމުވި މީހުން ހޮސްޕިޓަލުތަކަށް ގެންގޮސް ފަރުވާދީފައިވާ ކަމުގައި ވޯޝްހޯޓެންގެ އޮފިޝަލުން ވިދާޅުވެއެވެ. އަދި، އެ ސަރަޙައްދުގައި ހުރި ބައެއް ގެތަކުގައި ބައެއް މީހުންނަށް ފަރުވާދީފައިވެއެވެ.
ކުރިން ރިޕޯޓުކޮށްފައި ވަނީ މި ހާދިސާ ހިނގާފައި ވަނީ ފަސިންޖަރުން އުފުލާ ރޭލު މުދާ އުފުލާ އެހެން ރޭލެއްގައި ޖެހުމުން ކަމަށެވެ. ނަމަވެސް، ފަސިންޖަރުން އުފުލާ ރޭލު ޖެހުނީ ޢިމާރާތްކުރުމަށް ބޭނުންކުރާ އާލާތްތަކެއްގައި ކަން އޮފިޝަލުން ފަހުން ވަނީ ކަށަވަރުކޮށްދީފައެވެ. އެ ސަރަޙައްދުގައި ޢިމާރާތްކުރުމަށް ބޭނުންކުރާ އާލާތްތަކެއް ބަހައްޓާއި ހުރި ސަބަބު އަދި ސާފެއް ނޫނެވެ.
މި ހާދިސާގެ ފުރިހަމަ ތަހުޤީޤެއް ހިންގާނެ ކަމުގައި، ނެދަލެންޑްސްގެ ދަތުރުފަތުރުގެ ސަލާމަތާ ބެހޭ އިދާރާ – ޑަޗް ސޭފްޓީ ބޯޑުން ވަނީ ބުނެފައެވެ. ވޯޝްހޯޓެންއަކީ ދަ ހޭގާއި އެމްސްޓަޑޭމާ ދެމެދުގައި އޮންނަ ރަށެކެވެ. ވޯޝްހޯޓެންގައި ހިނގި ރޭލު އެކްސިޑެންޓާ ގުޅިގެން، ދަ ހޭގާއި އެމްސްޓަޑޭމާ ދެމެދު ރޭލު ދަތުރުފަތުރުގެ ޚިދުމަތް ވަގުތީ ގޮތުން މެދުކަނޑައިލަން ޖެހުނެވެ.