ގދ. ތިނަދޫ އިންޖީނުގޭގައި ހިނގި އަލިފާނުގެ ހާދިސާއާ ގުޅިގެން 3 ވަނަ މީހަކު ހައްޔަރުކޮށްފިއެވެ.
މި މައްސަލައާ ގުޅިގެން މިރޭ އިރާކޮޅުގެ ވަގުތެއްގައި ހައްޔަރުކޮށްފައިވަނީ 40 އަހަރުގެ ދިވެހި ފިރިހެނެއް ކަމަށް ފުލުހުން ވިދާޅުވެއެެވެ. މި މައްސަލައިގައި މިރޭ ހައްޔަރު ކުރެވުނު މީހާ، ހައްޔަރުކޮށްފައިވަނީ ކޯޓު އަމުރެއްގެ ދަށުން ގދ. ތިނަދޫއިން ކަމަށް ފުލުހުން ވިދާޅުވެއެވެ.
މި މައްސަލައާ ގުޅިގެން 2016 ފެބްރުއަރީ 21 ވަނަ ދުވަހު މެންދުރުފަހުގެ ވަގުތެއްގައި 2 މީހަކު ހައްޔަރުކޮށްފައިވެއެވެ. އެމީހުން މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބައިތިއްބައިގެން ތަހުޤީގު ކުރިއަށް ގެންދިއުމަށް ކޯޓުން ވަނީ 10 ދުވަހުގެ ބަންދުގެ މުއްދަތެއް ދީފައެވެ. ތިނަދޫގައި 2016 ޖެނުއަރީ 26 ވަނަ ދުވަހުގެ ދަންވަރު 02:15 ހާއިރު ހިނގި އަލިފާނުގެ ހާދިސާގައި އިންޖީނުގޭގައި ހުރި ހުރިހާ އިންޖީނެއް ބޭނުން ނުކުރެވޭ ވަރަށް ވަނީ އަނދާފައެވެ. އެރޭ ފުލުހުންނާއި ސިފައިންނާއި ރައްޔިތުން ގުޅިގެން ކުރި މަސައްކަތުން އަލިފާން ކޮންޓްރޯލް ކުރެވިފައިވަނީ ފަތިހު 04:25 ހާއިރުއެވެ.
އެ އަލިފާނުގެ ހާދިސާގައި އެއްވެސް މީހަކަށް އަނިޔާއެއްވެފައި ނުވާއިރު، އިންޖީނުގެއާއި އެތަނުގައި ހުރި ތަކެތި ފިޔަވައި އިތުރު އެހެން ތަނަކަށް ގެއްލުމެއް ލިބިފައެއް ނުވެއެވެ. އެ އަލިފާނުގެ ހާދިސާ ތަހުޤީގު ކުރަނީ މޯލްޑިވްސް ޕޮލިސް ސަރވިސްގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުންނެވެ.