އެމެރިކާގެ ކުރީގެ ރައީސް ޑޮނަލްޑް ޓްރަމްޕާ ދެކޮޅަށް ނިއު ޔޯކްގެ މެންހެޓަން ޑިސްޓްރިކްޓް އެޓަރނީގެ އޮފީހުން ޖިނާޢީ ދަޢުވާ އުފުލުމާ އެކު، އޭޕްރިލް 4 ވަނަ ދުވަހު އޭނާ ކޯޓަށް ހާޒިރުކުރަން ނިންމައިފިއެވެ. ޓްރަމްޕުގެ މައްޗަށް ޖިނާޢީ ދަޢުވާ އުފުލާފައި މި ވަނީ، 2016 ވަނަ އަހަރުގެ ރިޔާސީ އިންތިޚާބާ ދިމާކޮށް މީހަކަށް ރިޝްވަތު ދިނުމުގެ ކުށުގެ ތުހުމަތުގައެވެ.
ޓްރަމްޕާ ދެކޮޅަށް ޖިނާޢީ ދަޢުވާ އުފުލުމާ އެކު އެމެރިކާގެ ސިޔާސީ މަސްރަޙާއި ޝަރުޢީ ދާއިރާ މި ވަނީ ހަލަބޮލިވެފައެވެ. މިއީ އެމެރިކާގެ ކުރީގެ ރައީސަކާ ދެކޮޅަށް ޖިނާޢީ ކުށެއްގެ ދަޢުވާ އުފުލާފައިވާ ފުރަތަމަ ފަހަރެވެ. އަދި، އޭނާއަކީ 2024 ވަނަ އަހަރު ބާއްވާ ރިޔާސީ އިންތިޚާބުގައި ވާދަކުރައްވާނެ ކަން އިޢުލާނު ކުރައްވާފައިވާ ބޭފުޅެކެވެ. ރިޕަބްލިކަން ޕާޓީގެ ޓިކެޓް އޭނާ ކާމިޔާބު ކުރައްވާނެ ކަމަށް ގިނަ ބަޔަކު ގަބޫލުކުރެއެވެ.
މެންހެޓަން ޑިސްޓްރިކްޓް އެޓަރނީގެ އޮފީހުން ޓްރަމްޕާ ދެކޮޅަށް ތަހުޤީޤު ފަށާފައި ވަނީ 2016 ވަނަ އަހަރުގެ ރިޔާސީ އިންތިޚާބާ ގާތްވެފައިވާ ދަނޑިވަޅެއްގައި އޭނާ ރިޝްވަތު ދިނުމުގައި ބައިވެރިވެފައިވާ ކަމުގެ ކުށުގެ ތުހުމަތުގައެވެ. އޭނާ ރިޝްވަތު ދީފައިވާ ކަމަށް ބެލެވެނީ ސްޓޯމީ ޑެނިއެލްސް ކިޔާ އަންހެނަކަށެވެ. އެއީ، އޮރިޔާންކާޑު އުފައްދާ މީހެކެވެ. އޭނާއަށް ރިޝްވަތުގެ ފައިސާ ދީފައި ވަނީ، ޓްރަމްޕާއި އޭނާއާ މެދު ކުރިން ހިނގާފައިވާ ލޯބީގެ ގުޅުމުގެ މަޢުލޫމާތު ސިއްރު ކުރުމުގެ ނިޔަތުގައެވެ. ރިޝްވަތާ ގުޅޭ އަދި ލޯބީގެ ގުޅުމާ ގުޅޭ ތުހުމަތުތައް ވެސް ޓްރަމްޕް ދޮގުކުރައްވައެވެ.
"އަހުރެން ގަބޫލުކުރާ ގޮތުގައި މި ދަޢުވާތައް ކޮށްގެން ވެސް އެންމެ ފަހު ވަގުތު ބަލިވާނީ [ރައީސް] ޖޯ ބައިޑަން. ޑިމޮކްރެޓިކް ޕާޓީން އެ ކުރަމުންދާ ކަންތައްތައް އެމެރިކާގެ ރައްޔިތުންނަށް ވަރަށް ސާފު. އެންމެންނަށް އެއޮތީ ފެންނަން. އަހުރެމެންގެ ކެމްޕޭނާއި ޕާޓީ އޮތީ ބަދަހިކަންމަތީގައި ހިތްވަރުގަދަކޮށް. އެލްވިން ބްރެގް ކޯޓުގައި ބަލިކުރާނަން. އެއަށްފަހު ބައިޑަން ވެސް ބަލިކުރާނަން. އަދި ވެރިކަމަށް އަރާ ތިބި ޑިމޮކްރެޓިކް ޕާޓީގެ ހުރިހާ އެންމެން ނެރެ އެއްލައިލާނަން،" ދަޢުވާއާ ގުޅިގެން ނެރުނު ބަޔާނެއްގައި ޓްރަމްޕް ވިދާޅުވިއެވެ.
ޓްރަމްޕާ ދެކޮޅަށް މެންހެޓަން ޑިސްޓްރިކްޓް އެޓަރނީގެ އޮފީހުން ތަހުޤީޤު ފެށިއިރު، އޭނާ ހުންނެނީ ރައީސް ކަމުގެ މަޤާމުގައެވެ. ސްޓޯމީ ޑެނިއެލްސްއަށް ޓްރަމްޕް 130,000 އެމެރިކާ ޑޮލަރު ރިޝްވަތުގެ ގޮތުގައި ދީފައި ވަނީ އޭނާގެ ޕަރސަނަލް އެޓަރނީގެ ގޮތުގައި އެއިރު މަސައްކަތްކުރި މައިކަލް ކޯހެން މެދުވެރިކޮށް ކަމަށް އެ އޮފީހުން ބުނެއެވެ. އެ ފައިސާ ދޫކޮށްފައި ވަނީ 2016 ވަނަ އަހަރުގެ އޮކްޓޫބަރު މަހު، ރިޔާސީ އިންތިޚާބު ފެށެން ކުޑަ ދުވަސްކޮޅަކަށްވައި ވަނިކޮށެވެ.
މި މައްސަލައިގައި ޓްރަމްޕާ ދެކޮޅަށް ދަޢުވާ އުފުލާފައިވީ ނަމަވެސް، ދަޢުވާތަކުގެ ތަފުސީލެއް އަދި ހާމަކޮށްފައެއް ނުވެއެވެ. ނަމަވެސް، ވިޔަފާރީގެ 30 މުޢާމަލާތަކާ ގުޅޭ މައްސަލަތައް ދަޢުވާގައި ހިމެނިފައިވާ ކަމަށް ރިޕޯޓުތައް ބުނެއެވެ. މިއީ، މެންހެޓަން ޑިސްޓްރިކްޓް އެޓަރނީ އެލްވިން ބްރެގް ސިޔާސީ މަންފާއެއް ހޯދުމަށް ޓްރަމްޕާ ދެކޮޅަށް އުފުލާފައިވާ ދަޢުވާއެއް ކަމުގައި ޓްރަމްޕާއި އޭނާއަށް ތާޢީދުކުރާ މީހުން ދަނީ ތުހުމަތުކުރަމުންނެވެ. އަދި، މިއީ އިންތިޚާބަށް ނުފޫޒު ފޯރުވަން ހިންގަމުންދާ އަމަލެއް ކަމުގައި ވެސް އެ ފަރާތުން ތުހުމަތުކުރެއެވެ.