މިމަހުގެ މިހާތަނަށް ރާއްޖެއަށް ބައި މިލިއަން ފަތުރުވެރިން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވީ އާދީއްތަދުވަހުގެ ނިޔަލަށް ރާއްޖެއަށް 500597 ފަތުރުވެރިން ޒިޔާރަތްކޮށްފައިވާކަމަށެވެ. އަދި މި ކާމިޔާބީ ހޯދުމުގައި ދާއިރާގައި ހަރަކާތްތެރިވާ ފަރާތްތަކާއި ސަރުކާރާއި ރައްޔިތުން ގުޅިގެން ކުރި މަސައްކަތް މިނިސްްޓަރ މައުސޫމް ފާހަގަކުރެއްވިއެެވެ.
ސަރުކާރުން މިއަހަރު ރާއްޖެއަށް 1.9 މިލިއަން ފަތުރުވެރިން ގެނައުމަށް ވަނީ އަމާޒު ކަނޑައަޅާފައެވެ.
ތަފާސް ހިސާބުތަކަށް ބަލާއިރު ރާއްޖެއަށް މިހާރު އެވްރެޖްކޮށް ދުވާލަކު 6501 ފަތުރުވެރިން އާދެއެވެ.
ތަފާސް ހިސާބުތަކުން ދައްކާގޮތުގައި ރާއްޖެއަށް މިހާރު އެންމެ ގިނައިން ފަތުރުވެރިން ޒިޔާރަތްކުރަނީ ރަޝިއާއިންނެވެ. މިމަހުގެ 26 ވަނަ ދުވަހުގެ ނިޔަލަށް ރަޝިއާއިން ރާއްޖެއަށް 60590 ފަތުރުވެރިން ވަނީ ޒިޔާރަތްކޮށްފައެވެ.
ދެވަނައަށް އެންމެ ގިނައިން ފަތުރުވެރިން ޒިޔާރަތްކުރި އިންޑިއާއިން ވަނީ 52734 ފަތުރުވެރިން ޒިޔާރަތްކޮށްފައެވެ. 45545 ފަތުރުވެރިންނާއެކު ރާއްޖެއަށް 3 ވަނައަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ އިނގިރޭސިވިލާތުންނެވެ.
މި 3 ގައުމުގެ އިތުރުން، ގަދަ 10 މާކެޓްގައި ހިމެނެނީ އިޓަލީ، ޖަރުމަން، ފްރާންސް، އެމެރިކާ، ޗައިނާ، ސުވިޒަލޭންޑު އަދި ޕޮލެންޑެވެ.