އިންޑިޔާގެ މައި އިދިކޮޅު ޕާޓީ ކަމުގައިވާ ކޮންގްރެސް ޕާޓީގެ އިސް ލީޑަރު ރާހުލް ގާންދީގެ ގޮނޑި ގެއްލިއްޖެ ކަމުގައި އެ ޤައުމުގެ ޤާނޫނު ހަދާ މަޖިލީހުން ކަނޑައަޅައިފިއެވެ. ލޮކް ސަބާގައި ގާންދީ ތަމްސީލު ކުރައްވާ ގޮނޑި ގެއްލިފައިވާ ކަމަށް ކަނޑައަޅާފައި މި ވަނީ، އިންޑިޔާގެ ބޮޑުވަޒީރު ނަރެންދްރަ މޯދީގެ އަބުރަށް އަރައިގަތުމުގެ ކުށް ސާބިތުވެ، ގާންދީގެ މައްޗަށް އެ ޤައުމުގެ ދަށު ކޯޓަކުން ހުކުމް ކުރުމުންނެވެ.
ގާންދީގެ މައްޗަށް ހުކުމް ކޮށްފައި ވަނީ 2019 ވަނަ އަހަރު އޭނާ ދެއްވި ތަޤުރީރެއްގައި ވިދާޅުވެފައިވާ ބަސްފުޅުތަކަކާ ގުޅިގެންނެވެ. އެ ތަޤުރީރު ދެއްވަމުން އޭނާ ވަނީ، މޯދީގެ ނަން ދީފައިވާ ހުރިހާ އެންމެންނަކީ ވެސް ވައްކަން ކުރާ މީހުންތޯ ސުވާލު އުފައްދަވާފައެވެ. މިއީ، ބޮޑުވަޒީރު މޯދީގެ އަބުރަށް އަރައިގަތުމުގެ އަމަލެއްގެ ގޮތުގައި ކޯޓުން ވަނީ ކަނޑައަޅާފައެވެ.
52 އަހަރުގެ ގާންދީގެ މައްޗަށް އިއްވާފައި ވަނީ ދެ އަހަރު ދުވަހުގެ ޖަލު ހުކުމެކެވެ. ނަމަވެސް، ހުކުމް ތަންފީޒުކުރަން ފެށުމުގެ މުއްދަތު އެއް މަސް ދުވަހަށް ކޯޓުން ވަނީ ފަސްކޮށްދީފައެވެ. އަދި، ކަފާލާތުގެ ދަށުން އޭނާ މިނިވަންކޮށްފައެވެ. މި ހުކުމާ ގުޅިގެން އިންޑިޔާގެ ޤާނޫނު ހަދާ މަޖިލީހުގެ ތިރިގެ ކަމުގައިވާ ލޮކް ސަބާއިން ވަނީ، ގާންދީގެ ގޮނޑި ގެއްލިފައިވާ ކަން ކަނޑައަޅައި، އޭނާއަށް މަޖިލީހަށް ވަނުމަށް ހުރަސް އަޅާފައެވެ.
މި ހުކުމާ އެކު ކޮންގްރެސް ޕާޓީއަށް ބޮޑު ނާކާމިޔާބީއަކާ ކުރިމަތިވެފައިވާ ކަމަށް މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ. ނަމަވެސް، ގާންދީ ވިދާޅުވީ، ހުކުމާ މެދު އެއްވެސް ވަރަކަށް ކަންބޮޑުވެވަޑައިނުގަންނަވާ ކަމުގައެވެ.
ގާންދީ ވިދާޅުވީ، އޭނާއާ ދެކޮޅަށް ހުކުމެއް ކޮށްފައި މި ވަނީ، ބޮޑުވަޒީރު މޯދީގެ ސަރުކާރުން ހިންގަމުންދާ ކޮރަޕްޝަންގެ އަމަލުތަކާ ދެކޮޅަށް އޭނާ އަޑުއުފުއްލަވައި، އެ ކަންކަން ތަހުޤީޤުކުރަން ގޮވައިލަމުން ގެންދާތީ ކަމުގައެވެ. "އަހުރެންގެ މައްޗަށް ހުކުމެއް އިއްވާފައި އެ ވަނީ، އަހުރެން ދެން ބުނެފާނެ ވާހަކައަކާ މެދު ބޮޑުވަޒީރު މޯދީ ބިރުފުޅު ގަންނަވާތީ،" ގާންދީ ވިދާޅުވިއެވެ.
ގާންދީގެ މައްޗަށް އިއްވާފައިވާ ހުކުމް ގުޖަރާތް ސްޓޭޓުގެ ޑިސްޓްރިކްޓު ކޯޓުގައި އިސްތިއުނާފް ކުރާނެ ކަމުގައި ގާންދީގެ ޤާނޫނީ ވަކީލުން ޓީމުން ބުނެއެވެ. ގާންދީއާ ދެކޮޅަށް ކޯޓަށް މައްސަލަ ހުށަހަޅާފައި ވަނީ އިންޑިޔާގެ ވެރިކަން ކުރާ ބާރަތިޔާ ޖަނާތާ ޕާޓީ (ބީ.ޖޭ.ޕީ)ގެ މެންބަރެކެވެ. ގާންދީގެ މައްޗަށް އިއްވާފައި ވަނީ ސިޔާސީ ހުކުމެއް ކަމަށް ކޮންގްރެސް ޕާޓީން ގަބޫލުކުރެއެވެ.