ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައެއްގައި ފުލުހުން ހޯދަމުންދިޔަ ސ. މަރަދޫފޭދޫ، ރަށްދެބައިގެ އުމުރުން 25 އަހަރުގެ އިބްރާހިމް ފައިހް ނިޒާމް ފުލުހުންގެ ބެލުމުގެ ދަށަށް ގެންގޮސްފިއެވެ.
ފައިހް ފުލުހުންގެ ބެލުމުގެ ދަށަށް ގެންދިޔައީ އޭނާ އަމިއްލައަށް މިރޭ ފުލުހަށް ހާޒިރުވުމުން ކަމަށް ފުލުހުން ވިދާޅުވެއެވެ.
ފައިހް ފުލުހަށް ހާޒިރުވެފައި މިވަނީ ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައެއްގައި ފުލުހުން ހޯދަމުންދާ މީހަކު ފޮރުވައިގެން ގެންގުޅޭ ކަމުގެ ތުހުމަތުގައި ހަތަރު މީހަކު ކޯޓު އަމުރެއްގެ ދަށުން ފުލުހުން ހައްޔަރުކޮށްފައިވަނިކޮށެވެ.
މާލޭގައި މިއަދު ފުލުހުން ހިންގި އޮޕަރޭޝަނަކީވެސް އިބްރާހީމް ފައިހް ނިޒާމް ހޯދުމަށް ހިންގި އޮޕަރޭޝަނެއް ކަމަށްވެސް ފުލުހުންވަނީ ވިދާޅުވެފައެވެ.
ވޭތުވެ ދިޔަ ދުވަސްތަކަށް ބަލާއިރު މާލެ ސަރަޙައްދުގައި ތޫނު ހަތިޔާރު ބޭނުންކޮށްގެން މާރާމާރީ ހިންގުން ވަނީ އިތުރުވެފައެވެ. މިކަމާއި ގުޅިގެން ފުލުހުން އަންނަނީ ޚާއްސަ އޮޕަރޭޝަންތަކެއް ހިންގާ، މީހުން ގިނައިން އެއްވާ ސަރަޙައްދުތައް މޮނިޓަރކޮށް ބެލުމުގެ މަސައްކަތް ކުރަމުންނެވެ.