އިންޑިޔާ ކަނޑުގައި އުފެދިފައިވާ ބާރުގަދަ ތޫފާން ފްރެޑީ އެފްރިކާ ބައްރުގެ އިރުދެކުނު ބިތުގެ ޤައުމެށް ކަމުގައިވާ މަލާވީއަށް އެރުމުގެ ސަބަބުން އެ ޤައުމުން މަރުވި މީހުންގެ ޢަދަދު 225 އަށްވުރެ މައްޗަށް އަރައިފިއެވެ. މި ތޫފާނާ ގުޅިގެން މަލާވީގެ ބައެއް ސަރަޙައްދުތައް ސުންނާފަތިވެފައިވާއިރު، މިއީ ބޮޑު ކާރިސާއެއްގެ ގޮތުގައި ސިފަކުރައްވައި، އެ ޤައުމުގެ ރައީސް ލަޒާރަސް ޗަކްވޭރާ ވަނީ ބައިނަލްއަޤުވާމީ މުޖުތަމަޢުގެ އެހީތެރިކަމަށް އެދިވަޑައިގަންނަވާފައެވެ.
މިއީ، ހުސްވި މަހެއްހާ ދުވަހުގެ ތެރޭގައި ފްރެޑީ އެ ޤައުމަށް އެރި ދެވަނަ ފަހަރެވެ. ފްރެޑީއަކީ ދުނިޔޭގެ ދެކުނު ބިތުގައި މިހާތަނަށް އުފެދުނު އެންމެ ގިނަ ދުވަހަށް ދެމިގެންދިޔަ ތޫފާން ކަމުގައި މޫސުމާ ބެހޭ މާހިރުން ބުނެއެވެ. މި ތޫފާނުގެ ސަބަބުން ބޯކޮށް ވާރޭވެހި މަލާވީގެ ބައެއް ސަރަޙައްދުތަކުގައި ފެންބޮޑުވެފައިވާއިރު، ގިނަ ސަރަޙައްދުތަކެއްގެ ބިންގަނޑު ވެސް ވަނީ ކަނޑައިގެން ގޮސްފައެވެ. އަދި، ކިސަޑު ފޭބުމުގެ ސަބަބުން ގިނަ ޢަދަދެއްގެ ޢިމާރާތްތައް ވަނީ ވަޅުލެވިފައެވެ.
"ފްރެޑީގެ ސަބަބުން ލިބިފައިވާ ގެއްލުން ފޫބައްދާނެ ވަސީލަތްތަކެއް އަހުރެމެން އަތަކު ނެތް،" ލަޒާރަސް ވިދާޅުވިއެވެ. އޭނާ ވަނީ، ކުރިއަށް އޮތް ދެ ހަފުތާއަކީ، މި ތޫފާނާ ގުޅިގެން މަރުވި މީހުންގެ ހަނދާނުގައި ޤައުމީ ހިތާމައިގެ މުއްދަތެއްގެ ގޮތުގައި ވެސް ކަނޑައަޅުއްވާފައެވެ. މި ތޫފާނާ ގުޅިގެން މަރުވި މީހުންގެ ޢަދަދު 225 އަށް އަރާފައިވާއިރު، ގިނަ ޢަދަދެއްގެ ބަޔަކު ޒަޚަމުވެފައިވާ ކަމުގައި ވެސް މަލާވީގެ އޮފިޝަލުން ވިދާޅުވިއެވެ.
މި ތޫފާނާ ގުޅިގެން ހާލުގައި ޖެހިފައިވާ އެތަކެއް ހާސް މީހުންނަށް އެހީތެރިކަން ފޯރުކޮށްދިނުމަށް 1.5 މިލިޔަން އެމެރިކާ ޑޮލަރު ހޭދަ ކުރައްވާނެ ކަން ޗަކްވޭރާ ވަނީ އިޢުލާނު ކުރައްވާފައެވެ. ތޫފާނުގެ އަސަރު އެންމެ ބޮޑަށް ކޮށް، އެންމެ ބޮޑެތި ގެއްލުންތަކެއް ލިބިފައި ވަނީ މަލާވީގެ ބެލިންޓަޔަރއަށެވެ. އެ ސަރަޙައްދުގެ 11 ޑިސްޓްރިކްޓަކަށް ތޫފާނުގެ އަސަރުކޮށްފައިވާ ކަމުގައި އޮފިޝަލުން ވިދާޅުވެއެވެ.
މަލާވީގެ އިތުރުން ތޫފާން ފްރެޑީ ވަނީ މޮޒަމްބީކާއި މަޑަގަސްކަރައަށް ވެސް އަރާފައެވެ. އަދި، މި ތޫފާނާ ގުޅިގެން އެ ދެ ޤައުމުގައި މަރުވި މީހުންގެ ޢަދަދު 290 އަށް އަރައެވެ. މޮޒަމްބީކުގައި ވެސް ފެންބޮޑުވެ، ބިންގަނޑު ކެނޑުމުގެ އެތަކެއް ހާދިސާއެއް ހިނގާފައިވެއެވެ. އަދި، މަލާވީގެ ބެލިންޓަޔަރގައި ދިރިއުޅޭ 88,000 އަށްވުރެ ގިނަ މީހުންގެ ގެދޮރު ވަނީ ހަލާކުވެފައެވެ.
އިންޑިޔާ ކަނޑު ހުރަސްކޮށް 8,000 ކިލޯމީޓަރުގެ ސަރަޙައްދަކަށް ދަތުރުކުރުމަށް ފަހު ތޫފާން ފްރެޑީގެ ބާރު މިހާރު ކެނޑެން ފަށާފައިވާ ކަމުގައި މޫސުން ދިރާސާކުރާ ފަރާތްތަކުން ބުނެއެވެ. މި ތޫފާން އުފެދިފައި ވަނީ ފެބުރުވަރީ 6 ވަނަ ދުވަހު އިންޑޮނީޝިޔާ ކައިރިންނެވެ. އަދި، އެއަށްފަހު އިންޑިޔާ ކަނޑު ހުރަސްކޮށް އެ ތޫފާން މި ވަނީ އެފްރިކާ ބައްރާ ހަމައަށް ދަތުރުކޮށްފައެވެ.
މި ތޫފާނުގެ އުމުރު މިހާ ދިގުވެފައި ވަނީ، ނުވަތަ ތޫފާން އެހާ ގިނަ ދުވަސްތަކަކަށް ދެމިގެންގޮސްފައި ވަނީ މޫސުމީ ބަދަލުތަކާ ގުޅިގެން ކަމަށް ބެލެވޭ ކަމުގައި މޫސުން ދިރާސާކުރާ ފަރާތްތަކުން ބުނެއެވެ. މޫސުމީ ބަދަލުތަކާ ގުޅިގެން މި ފަދަ ތޫފާންތަކުގެ ބާރާއި ނުރައްކާތެރިކަން ވެސް އިތުރުވަމުންދާ ކަމުގައި އެ ފަރާތްތަކުން ބުނެއެވެ.
އެފްރިކާ ބައްރުގެ އިރުދެކުނު ބިތުގެ ސަރަޙައްދުތަކަށް މި ތޫފާން ފުރަތަމަ އަރާފައި ވަނީ ފެބުރުވަރީ މަހުގެ ތެރޭގައެވެ. މަލާވީއަށް އެރުމުގެ ކުރިން، މާރިޗު 12 ވަނަ ދުވަހު ފްރެޑީ ވަނީ މޮޒަމްބީކްގެ ސަރަޙައްދުތަކަށް ވެސް އަރާފައެވެ. މި ތޫފާނާ ގުޅިގެން އެ ޤައުމުން ވެސް 53 އަށްވުރެ ގިނަ މީހުން ވަނީ މަރުވެފައެވެ.