ދެކުނު ކޮރެޔާގެ ރައީސް ޔޫން ސުލް ޔިއޯލް ޖަޕާނަށް ވަޑައިގަންނަވައި، އެ ޤައުމުގެ ބޮޑުވަޒީރު ފުމިޔޯ ކިޝިޑާއާ ބައްދަލުކުރައްވައިފިއެވެ. ޔޫން ޖަޕާނަށް ވަޑައިގަންނަވާފައި މި ވަނީ، އުތުރު ކޮރެޔާއިން އިތުރު މިސައިލް ޓެސްޓުތަކެއް ހަދާފައިވާ ދަނޑިވަޅެއްގައެވެ. އުތުރު ކޮރެޔާއިން އެންމެ ފަހުން ޓެސްޓުކޮށްފައި ވަނީ ދުރު ރާސްތާގެ ބެލިސްޓިކް މިސައިލެކެވެ.
މިއީ ހުސްވި ހަފުތާއެއްހާ ދުވަހުގެ ތެރޭގައި އުތުރު ކޮރެޔާއިން މިސައިލް ޓެސްޓުތަކެއް ހަދާފައިވާ ތިންވަނަ ފަހަރެވެ. އެ ޤައުމުން ދާދިފަހުން ފަހުން ވަނީ ސަބްމެރިންއަކުން ވެސް ކްރޫޒް މިސައިލްތަކެއްގެ ޓެސްޓު ހަދާފައެވެ. އެ ޤައުމުން ހިންގާ މި ފަދަ އަމަލުތަކާ ގުޅިގެން ސަރަޙައްދީ ސަލާމަތާއި ރައްކާތެރިކަމަށް ނުރައްކާވެ، ހުރަސްއެޅިފައިވާ ކަމުގައި ދެކުނު ކޮރެޔާއާއި ޖަޕާނުގެ އިތުރުން އެމެރިކާއިން ވެސް ގަބޫލުކުރެއެވެ.
ހުސްވި 2022 ވަނަ އަހަރު ދެކުނު ކޮރެޔާގެ ވެރިކަމާ ހަވާލުވެ ވަޑައިގެންނެވި ޔޫން ވަނީ، އެ ޤައުމާއި ޖަޕާނާ ދެމެދު އޮތް ގުޅުން އިތުރަށް ބަދަހިކުރަން މަސައްކަތް ކުރައްވާނެ ކަމުގައި ވިދާޅުވެފައެވެ. އަދި، މި ދަތުރުފުޅުގައި، ދެ ޤައުމުގެ ދެމެދުގައި ރަސްމީ ވާހަކަތައް ބާއްވާނެއެވެ. މިއީ، ފާއިތުވި 12 އަހަރުގެ ތެރޭގައި ދެ ޤައުމުގެ ދެމެދުގައި މި ފަދަ ބައްދަލުވުންތަކެއް ބާއްވާ ފުރަތަމަ ފަހަރެވެ.
ޔޫންގެ މި ދަތުރުފުޅާ ގުޅިގެން އަންނަ މޭ މަހު ޖަޕާނުގެ ހީރޯޝީމާގައި ބާއްވާ ޖީ7ގެ ބައްދަލުވުމުގައި ބައިވެރިވުމުގެ ދަޢުވަރު ކިޝިޑާ ދެކުނު ކޮރެޔާއަށް އަރުވާނެ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އަދި، އެއަށްފަހު ކިޝިޑާ ދެކުނު ކޮރެޔާއަށް ދަތުރުފުޅެއް ކުރެއްވުމަކީ އެކަށީގެންވާ ކަމެއް ކަމުގައި ވެސް އެ ފަރާތްތަކުން ބުނެއެވެ.
މި ދަތުރާ ގުޅިގެން ދެ ޤައުމުގެ ދެމެދުގައި އޮތް ގުޅުމުގެ އައު ބާބެއް ފެށޭނެ ކަމަށް ގަބޫލުފުޅު ކުރައްވާ ކަމުގައި ޔޫން ވިދާޅުވިއެވެ. އަދި، މާޒީ ހަނދާން ނައްތައިލުމަށްފަހު، ދެ ޤައުމުގެ ރައްޔިތުންގެ މެދުގައި އޮތް ގުޅުންތައް ބަދަހިކުރުމަށް ކިޝިޑާއާ އެކު މަސައްކަތް ކުރައްވާނެ ކަމުގައި ވެސް ޔޫން ވިދާޅުވިއެވެ.
ޖަޕާނުން ދެކުނު ކޮރެޔާއަށް އަރައި 35 އަހަރުވަންދެން އިސްތިއުމާރީ ވެރިކަމެއް ކުރުމަކީ ދެ ޤައުމުގެ ދެމެދުގައި ޖެހިފައިވާ އެންމެ ބޮޑު އެއް މައްސަލައެވެ. އަދި، އެ ދުވަސްވަރު ދެކުނު ކޮރެޔާގެ ރައްޔިތުން އަޅުވެތިކޮށް، އެ މީހުން ލައްވައި އަޅު މަސައްކަތް ކުރުވައި، އެ ޤައުމުގެ އަންހެނުންނާ މެދު ޖިންސީ ކުށްތައް ހިންގާފައިވާ ކަމަށް ތާރީޚުން ދައްކައެވެ.
ދެކުނު ކޮރެޔާގެ ރައްޔިތުންނަށް ޖައްސާފައިވާ ބިކަ ހާލަށް ބަދަލު ދިނުމަށް 2018 ވަނަ އަހަރު އެ ޤައުމުގެ ކޯޓަކުން ވަނީ ޖަޕާނުގެ ކުންފުނިތަކަށް އަމުރުކޮށްފައެވެ. އަދި، އެއާ އެކު އެ ދެ ޤައުމުގެ ދެމެދުގައި އޮތް ހީނަރުވިއެވެ. ޖަޕާނުން ގަބޫލުކުރާ ގޮތުގައި 1965 ވަނަ އަހަރު ދެ ޤައުމުގެ ދެމެދުގައި ސިޔާސީ ގުޅުން ގާއިމުކުރުމާ އެކު، ދެކުނު ކޮރެޔާއަށް ބަދަލުގެ ގޮތުގައި 800 މިލިޔަން ޑޮލަރުގެ އިޤުތިޞާދީ އެހީއާއި ލޯނުތައް ޖަޕާނުން ވަނީ ފޯރުކޮށްދީފައެވެ.
ދެ ޤައުމުގެ ދެމެދުގައި އޮތް ގުޅުންތައް ރަނގަޅުވާން ފަށާފައި ވަނީ ޔޫންގެ ވެރިކަމުގައި ކަމަށް މަސްރަޙު ދިރާސާކުރާ ފަރާތެއް ކަމުގައިވާ ޔޫކީ އަސާބާ ބުންޏެވެ. އޭނާއަކީ ޓޯކިޔޯގެ ޑޮޝީޝާ ޔުނިވަރސިޓީގެ ޕްރޮފެސަރެކެވެ. އޭނާ ދެކޭ ގޮތުގައި، ދެ ޤައުމުގެ ދެމެދުގައި އޮތް ހަތުރުވެރިކަން އިތުރަށް ފުޅާވާން ފުރުޞަތު ދިނުމަކީ ދެ ޤައުމަށް ވެސް އޮތް ގޮތެއް ނޫނެވެ.
ދެ ޤައުމުގެ ދެމެދުގައި ގުޅުންތައް ބަދަހިކުރަން ފަށާފައި ވަނީ، އުތުރު ކޮރެޔާގެ އަސްކަރީ ހަރަކާތްތައް އިތުރުކުރުމާއި، އެ ސަރަޙައްދުގައި ބާރާއި ނުފޫޒު ގަދަކުރަން ޗައިނާއިން މަސައްކަތް ކުރަމުންދިޔުމުގެ ސަބަބުން ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ޔޫން ޖަޕާނަށް ވަޑައިގެންނެވުމުގެ ގަޑިއިރުތަކެއް ކުރިން އުތުރު ކޮރެޔާއިން ވަނީ އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް)އެއް ޓެސްޓުކޮށްފައެވެ. އެއީ، އެހެން ބައްރެއްގައި އޮންނަ ޤައުމަކަށް ހަމަލާދޭން ބޭނުން ކުރެވިދާނެ ދުރު ރާސްތާ މިސައިލެކެވެ.