އެމެރިކާގައި އުފައްދާ ނިއުކްލިޔަރ ހަކަތައިގެ ބާރުން ދުއްވާ ސަބްމެރިންތައް ގަތުމުގެ އެއްބަސްވުމެއްގައި އޮސްޓްރޭލިޔާއިން ސޮއިކޮށްފިއެވެ. ދެ ޤައުމުގެ ދެމެދުގައި މި ކަމާ މެދު އެއްބަސްވެފައި ވަނީ، އޮސްޓްރޭލިޔާގެ ބޮޑުވަޒީރު އެންތަނީ އެލްބެނީޒް އެމެރިކާއަށް ކުރައްވަމުން ގެންދަވާ ދަތުރުފުޅުގައި އެ ޤައުމުގެ ރައީސް ޖޯ ބައިޑަންއާ އެކު ބޭއްވެވި ބައްދަލުކުރެއްވުމެއްގައެވެ.
އެލްބެނީޒް އެމެރިކާއަށް ވަޑައިގަންނަވާފައި ވަނީ އެމެރިކާއާއި އޮސްޓްރޭލިޔާގެ އިތުރުން އިނގިރޭސިވިލާތުގެ މެދުގައި ގާއިމުކޮށްފައިވާ އިއްތިހާދުގެ ބައްދަލުވުމަކަށެވެ. ކެލިފޯނިޔާގެ ސެން ޑިއޭގޯގައި ބޭއްވި މި ބައްދަލުވުމުގައި އިނގިރޭސިވިލާތުގެ ބޮޑުވަޒީރު ރިޝީ ސުނަކު ވެސް ބައިވެރިވެ ވަޑައިގެންނެވިއެވެ.
އެމެރިކާގައި އުފައްދާ ނިއުކްލިޔަރ ހަތަކައިގެ ބާރުން ދުއްވާ ފަސް ސަބްމެރިން ގަތުމުގެ އިތުރުން، އެމެރިކާއާއި އިނގިރޭސިވިލާތުގެ އެހީތެރިކަމާ އެކު އައު ސަބްމެރިންއެއް އުފެއްދުމުގެ މަސައްކަތް ފެށުމަށް ވެސް އެލްބެނީޒް ވަނީ އެއްބަސްވެ ވަޑައިގަންނަވާފައެވެ. މިއީ، އޭޝިޔާ އަދި ޕެސިފިކް ކަނޑުގެ ސަރަޙައްދުތަކުގައި ޗައިނާގެ ބާރާއި ނުފޫޒު އިތުރުކުރަން އެ ޤައުމުން ކުރަމުންދާ މަސައްކަތްތައް ހުރަސް އެޅުމުގެ ގޮތުން ހަދާފައިވާ އެއްބަސްވުމެއް ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
އެލްބެނިޒާއި ސުނަކާ އެކު ބޭއްވި ބައްދަލުވުމަށް ފަހު ވާހަކަފުޅު ދައްކަވަމުން ބައިޑަން ވިދާޅުވީ، އިންޑޯ-ޕެސިފިކް ކަނޑުގެ ސަރަޙައްދުގެ ސަލާމަތާއި ރައްކާތެރިކަން ކަށަވަރުކުރުމަށް އެމެރިކާއިން ގިނަގުނަ މަސައްކަތްތަކެއް ކުރަމުންދާ ކަމުގައެވެ. އަދި، އޮސްޓްރޭލިޔާއާ އެކު ހަދާފައިވާ ސަބްމެރިންތަކުގެ އެއްބަސްވުމާ އެކު، އެ މަސައްކަތްތައް އިތުރަށް ހަރުދަނާ ކުރެވިގެންދާނެ ކަމުގައި އޭނާ ވިދާޅުވިއެވެ.
ނަމަވެސް، މި އެއްބަސްވުމުގެ ދަށުން އޮސްޓްރޭލިޔާއަށް ނިއުކްލިޔަރ ހަތިޔާރު ވިއްކަން ހަމަޖެހިފައި ނުވާ ކަމުގައި ބައިޑަން ވިދާޅުވިއެވެ. އެމެރިކާއާއި އިނގިރޭސިވިލާތާ ދެމެދު ހަދާފައިވާ އިއްތިހާދާ އޮސްޓްރޭލިޔާއިން ގުޅިފައި ވަނީ މީގެ 18 މަސް ކުރިންނެވެ.
ނިއުކްލިޔަރ ހަތިޔާރު ނުލިބުނު ނަމަވެސް، ނިއުކްލިޔަރ ހަކަތައިގެ ބާރުން ދުއްވާ ސަބްމެރިންތަކެއް ލިބުމަކީ، އޮސްޓްރޭލިޔާގެ އަސްކަރިއްޔާގެ ގާބިލުކަން އިތުރުވެގެންދާނެ ކަމެއް ކަމުގައި އެލްބެނީޒް ގަބޫލުފުޅު ކުރައްވައެވެ. އަދި، އޭޝިޔާއާއި ޕެސިފިކް ސަރަޙައްދުން ޗައިނާގެ ބާރާއި ނުފޫޒު ފޮހެލަން އޮސްޓްރޭލިޔާއަށް އިތުރު ހިތްވަރެއް ލިބިގެންދާނެ ކަމެއް ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
އޮސްޓްރޭލިޔާއާ އެކު ހަދާފައިވާ އެއްބަސްވުމުގެ ދަށުން އެމެރިކާއިން 2030 ވަނަ އަހަރުގެ ކުރިން އެ ޤައުމަށް "ވަރޖިނިޔާ" ކްލާސް ނުވަތަ މަރުކާގެ ތިން ސަބްމެރިން ފޯރުކޮށްދޭނެއެވެ. އަދި، އެއަށްފަހު، އޮސްޓްރޭލިޔާއަށް ބޭނުންޖެހިއްޖެ ހިނދެއްގައި، އެ މަރުކާގެ އިތުރު ދެ ސަބްމެރިން ފޯރުކޮށްދޭނެއެވެ. ނަމަވެސް، އެ އުޅަނދުތަކުގައި ނިއުކްލިޔަރ ހަތިޔާރެއް ނުހުންނާނެއެވެ.