ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ދައްކާލުމުގެ ގޮތުން މިދިޔަ އަހަރުގެ ޑިސެމްބަރު މަހު ބޭއްވެވި "ރެދަން- ފަންނުވެރި އަހަރެމެން" ގެ މަޢުރަޒަށް ޒިޔާރަތްކުރި މީހުންގެ ތެރެއިން އެންމެ ގިނަ މިހުންނަށް ކަމުދާ އުފެއްދުން އުފެއްދި ފަރާތައް ހަދިޔާ ޙަވާލުކުރައްވައިފިއެވެ.
މިދިޔަ އަހަރުގެ ޑިސެމްބަރުމަހުގެ ނުވަވަނަ ދުވަހު ބޭއްވެވި މި މަޢުރަޒުގެ ބައިވެރިންގެ އުފެއްދުންތަކުގެ ތެރެއިން މައުރަޒަށް ޒިޔާރަތް ކުރައްވާ ފަރާތްތަކަށް އެންމެ ކަމުދާ އުފެއްދުން ޚިޔާރުކުރުމަށް ހުޅުއްވާލެއްވި "ވިޒިޓާސް ޗޮއިސް އެވޯޑް" ލިބުނީ ބ. ތުޅާދޫ، ހިންމަތް، މުޙައްމަދު މާހިރަށެވެ.
ރެދަން މައުރަޒަށް ދެހާސް ފައްތަސޭކަ މީހުން ޒިޔާރަތްކޮށްފައިވާއިރު ވިޒިޓަރސް އެވޯޑަށް ދެހާސް މީހުން ވޯޓްދީފައިވެއެެވެ. މީގެތެރެއިން 117 ވޯޓް ހޯދައިގެން ވިޒިޓާސް އެވޯޑް ޙާޞިލްކުރި މުޙައްމަދު މާހިރަށް ލިބުނީ ޓާކިޝް އެއަރލައިނުން ހަދިޔާކުރި ޔޫރަޕް ދެކޮޅު ޓިކެޓާއި ތިލަފުށި ކޯޕަރޭޝަނުން ހަދިޔާކުރި ދެހާސް އެމެރިކާ ޑޮލަރުގެ ފައިސާގެ އިނާމެވެ.
މިއަދު ޖެންޑަރ މިނިސްޓްރީގައި ބޭއްވެވި، ޚާއްޞަ ރަސްމިއްޔާތުގައި ޓާކިޝް އެއަރލައިނުން ހަދިޔާކުރި ޓިކެޓް ޙަވާލުކޮށްދެއްވީ އެ އެއަރލައިންގެ ކޮމާރޝަލް މެނޭޖަރ ފަހީމް ބަކޯއާއެވެ. އަދި ތިލަފުށި ކޯޕަރޭޝަނުގެ ފަރާތުން ފައިސާގެ އިނާމް ޙަވާލުކޮށްދެއްވީ އެކުންފުނީގެ މެނޭޖަރު މުޙައްމަދު ނާސިފެވެ.
އިނާމް ލިބުނު މާހިރު ޕީ.އެސް.އެމްއާ ވާހަކަދައްކަމުން ބުނީ، ނުކުޅެދުންތެރިކަން ހުންނަ ފަރާތްތަކަށް ޢަމާޒުކުރައްވައިގެން ސަރުކާރުން އިސްނަންގަވައިގެން މިފަދަ ފުރުޞަތުތަކެއް ހުޅުއްވާލެއްވުމުން ވަރަށް އުފާވާކަމަށެވެ.
" ޙަޤީގަތައް ދަންނަވާނަމަ ރެދަން މައުރަޒަކީ ނުކުޅެދުންތެރިކަން ހުންނަ ފަރާތްތަކައް ލިބުނު ވަރަށް ރަނގަޅު ފުރުޞަތެއް. މިކަމަށް އަޅުގަނޑު ސަރުކާރަށް ވަރަށް ބޮޑު ޝުކުރެއް އަދާކުރަން. އަޅުގަނޑުގެ ރެދަން މައުރަޒުގައި ނަވަކާއި އެފިލް ޓަވަރު ހެދިން. ރެދަން އަށް ޒިޔާރަތް ކުރި މީހުން އެންމެ ގިނަ ވޯޓް ދިނީ ނަވަށް. ވަރަށްް ވަރަށް އުފާވި އެކަމާ. ނާ ހަދަން ތިން މަސްނެގި. އަސްލު ބަލީގެ ގޮތުން ރެސްޓު ނަގަންޖެހޭތީ އެހާދުވަސްވީ.އެނޫންނަމަ އެއަށް ވުރެ ކުރިން ނިންމާ ލެވުނީސް. " މާހިރު ބުންޏެވެ.
މި މައުރަޒަށް މާހިރު އުފައްދާ ހުށަހަޅާފައިވަނީ ލަކުޑިން ބަނދެފައިވާ، ތިން ފޫޓު ދިގުމިނުގެ ރިޔަލު ނަވެކެވެ.
މިއީ މަޢުރަޒުގައި އެންމެ އަގުބޮޑުކޮށް ވިއްކާލެވުނު އުފެއްދުންކަން ފާހަގަކޮށްލެވެއެވެ. ހަތްދިހަ ފަސްހާސް ރުފިޔާއަށް މިއުފެއްދުން ބައްލަވައިގަތީ މައުރަޒު ހުޅުއްވައިދެއްވި ދުވަހު މައުރަޒަށް ކުރެއްވި ޒިޔާރަތުގެ ތެރޭގައި ރައީސުލްޖުމްހޫރިއްޔާގެ ދެކަނބަލުންނެވެ. މިދިޔަ ޑިސެމްބަރުމަހުގެ ނުވަޔަކުން ދިހައަކަށް ކުރިއަށް ގެންދިޔަ "ރެދަން- ފަންނުވެރި އަހަރެމެން" މަޢުރަޒުގައި ނުކުޅެދުންތެރިކަން ހުންނަ ފަރާތްތަކުން ޖުމްލަ 700 އަށްވުރެ ގިނަ އުފެއްދުންތައް ދައްކާލާފައިވާކަމަށް މިނިސްޓްރީ އޮފް ލޯ އެންޑް ޖެންޑަރއިން ވިދާޅުވެއެވެ