މެކްސިކޯގެ މެދުތެރޭ ސްޓޭޓެއް ކަމުގައިވާ ގުވަނަހުވަޓޯގެ ކެފޭއަކަށް ދިން ބަޑީގެ ހަމަލާތަކެއްގައި 10 މީހުން މަރައިލައިފިއެވެ. ހަތިޔާރު އެޅި ގުރޫޕެއްގެ ބަޔަކު ކެފޭއަށް ވަދެ ދިން މި ހަމަލާގައި އިތުރު ފަސް މީހުން ޒަޚަމުވި ކަމުގައި މެކްސިކޯގެ ފުލުހުން ބުނެއެވެ. އެ ކެފޭއަކީ، ގުވަނަހުވަޓޯގެ ސުލާޔާއާއި ސެންޓިއާގޯ ޑެ ކެރެއްޓަރޯއާ ދެމެދު އޮންނަ ހައިވާގައި ހުންނަ ކެފޭއެވެ.
މި ހަމަލާގައި، ކެފޭގައި ތިބި ކަސްޓަމަރުންގެ އިތުރުން އެ ތަނުގެ ބައެއް މުވައްޒަފުން ވެސް މަރުވި ކަމުގައި ފުލުހުން ބުންޏެވެ. މަރުވި މީހުންގެ ތެރޭގައި ހިމެނެނީ ހަތް ފިރިހެނުންނާއި ތިން އަންހެނުންނެވެ. ކެފޭއަށް ހަމަލާދިނުމުގައި ބައިވެރިވެފައި ވަނީ ކޮން ބަޔެއް ކަން އަދި ސާފުވެފައެއް ނުވެއެވެ. ނަމަވެސް، ބެލެވޭ ގޮތުގައި އެއީ، ގުވަނަހުވަޓޯގައި ހަރަކާތްތެރިވާ ކުށްކުރާ ގުރޫޕަކަށް ނިސްބަތްވާ ބަޔެކެވެ.
ގުވަނަހުވަޓޯއަކީ ސިނާޢީ މަސައްކަތްތައް ކުރާ ސްޓޭޓެކެވެ. އަދި، އެއީ ފަތުރުވެރިންގެ މެދުގައި މަޤުބޫލު މަންޒިލެކެވެ. ނަމަވެސް، އެ ސްޓޭޓަކީ ކުށްކުރާ ގިނަ ޢަދަދެއްގެ ގުރޫޕުތައް ވެސް ހަރަކާތްތެރިވާ ސްޓޭޓެކެވެ. އެ ގުރޫޕުތަކަކީ މަސްތުވާތަކެތީގެ ވިޔަފާރީގެ އިތުރުން، ތެލުގެ ވަގު ވިޔަފާރީގެ ހަރަކާތްތެރިވާ ގުރޫޕުތަކެއް ކަމުގައި މެކްސިކޯގެ ފުލުހުން ބުނެއެވެ. މީގެ ތެރެއިން އެންމެ ނުރައްކާތެރި ކަމަށް ފާހަގަކުރެވޭ ގުރޫޕުތަކުގެ ތެރޭގައި ސެންޓަ ރޯސާ ލީމާއާއި ހެލިސްކޯ ނުއޭވާ ޖެނެރޭސިއޯން ހިމެނެއެވެ.
މި ފަދަ އެހެން ހާދިސާއެއްގައި، މާރިޗު މަހުގެ 3 ވަނަ ދުވަހު މެކްސިކޯއަށް ދަތުރުކުރި އެމެރިކާގެ ހަތަރު ފަތުރުވެރިޔަކު ރަހީނުކުރުމަށްފަހު، އޭގެ ތެރެއިން ދެ މީހަކު ވަނީ މަރައިލާފައެވެ. އެމެރިކާގެ ހަތަރު މީހުން ޓެކްސަސްއިން ދަތުރުކޮށްފައި ވަނީ މެކްސިކޯގެ މެޓަމޯރޯސްއަށެވެ. އެ މީހުންނަށް ހަމަލާދީފައި ވަނީ ވެސް މެކްސިކޯގައި ފުޅާދާއިރާއެއްގައި މަސްތުވާތަކެތީގެ ވިޔަފާރިކުރާ ގުރޫޕަކުންނެވެ.
މި ހާދިސާއާ ގުޅިގެން، މަސްތުވާތަކެތީގެ ވިޔަފާރިކުރާ ގަލްފް ކާޓެލްއަށް ނިސްބަތްވާ ފަސް މީހަކު މިހާރު ވަނީ ހައްޔަރުކޮށްފައެވެ. ނަމަވެސް، އެ މީހުން ހައްޔަރުކޮށްފައި ވަނީ އެމެރިކާއާއި މެކްސިކޯގެ ފުލުހުންނާއި ތަހުޤީޤީ އިދާރާތަކުން ކުރި މަސައްކަތުންނެއް ނޫނެވެ. އެ ފަސް މީހުން ފުލުހުންނާ ހަވާލުކޮށްފައި ވަނީ ގަލްފް ކާޓެލް ގުރޫޕުންނެވެ. އެ މީހުންނާއެކު، މި ހާދިސާއާ މެދު މަޢާފަށް އެދި، އެ ގުރޫޕުން ވަނީ ސިޓީއެއް ވެސް ފޮނުވާފައެވެ.
މި ހާދިސާއާ ގުޅިގެން މެކްސިކޯގެ ރައީސް އަންދްރޭސް މެނުއެލް ލޮޕޭޒް އޮބްރާޑޯ ވިދާޅުވެފައި ވަނީ، އެމެރިކާގެ ހަތަރު މީހުން މެކްސިކޯއަށް ދަތުރުކޮށްފައި ވަނީ ބޭސްތަކެއް ގަތުމުގެ ބޭނުމުގައި ކަމަށް ބެލެވޭ ކަމުގައެވެ. އަދި، ގަލްފް ކާޓެލް ގުރޫޕުގެ ބަޔަކު އެ މީހުން ރަހީނުކޮށްފައި ވަނީ، އެ ފަދަ އެހެން ގުރޫޕަކާ މެދު ޖެހުނު މައްސަލައެއްގެ ތެރެއިން ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ.
މެޓަމޯރޯސްއަކީ ވެސް މަސްތުވާތަކެތީގެ ވިޔަފާރިއާއި އެހެނިހެން ކުށްކުރާ ގުރޫޕުތަކުން ހަރަކާތްތެރިވާ ރަށެކެވެ. އަދި، މީހުން ރަހީނުކުރުން ފަދަ ކުށްތައް ޢާންމުކޮށް ހިނގާ ރަށެކެވެ. އެ ރަށް އޮންނަ ޓަމައުލިޕާސް ސަރަޙައްދަކީ، މެކްސިކޯގައި މި ވަގުތު އޮތް އެންމެ ނުރައްކާތެރި ސަރަޙައްދު ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އެ ސަރަޙައްދަށް ދަތުރުނުކުރުމަށް އެމެރިކާގެ ޚާރިޖީ ވުޒާރާއިން ކުރިން ވަނީ އަންގާފައެވެ.