ޔަހޫދީ އިސްރާޢީލުން ސޫރިޔާއަށް ދިން ވަރުގަދަ ވައިގެ ހަމަލާތަކެއްގައި ސޫރިޔާގެ އަސްކަރިއްޔާގެ ސިފައިންގެ މީހަކާއި އިތުރު ދެ މީހުން މަރައިލައިފިއެވެ. ޔަހޫދީ އިސްރާޢީލުގެ އަސްކަރީ މަތިންދާބޯޓުތަކުގެ ހަމަލާތައް އަމާޒުކޮށްފައި ވަނީ މެޑިޓެރޭނިޔަން ކަނޑުގެ އައްސޭރިފަށުގައި އޮންނަ ސޫރިޔާގެ ދެވަނައަށް އެންމެ ބޮޑު ބަނދަރުމަތީ ރަށް ތަރްތޫސްއާއި ޙަމާއާ ދެމެދުގައި އޮންނަ ސަރަޙައްދަކަށެވެ.
ސޫރިޔާގެ އިންސާނީ ޙައްޤުތަކުގެ ހާލަތު ދިރާސާކުރާ އިނގިރޭސިވިލާތުގެ ޖަމުޢިއްޔާ – ސީރިޔަން އޮބްޒަވޭޓަރީ ފޯރ ހިޔުމަން ރައިޓްސްއިން ބުނީ، ޔަހޫދީ އިސްރާޢީލުގެ ހަމަލާތައް އަމާޒުކޮށްފައި ވަނީ ހަތިޔާރު ގުދަނަކަށް ކަމުގައެވެ. އެ ތަނަކީ، އީރާނުން ވާގިވެރިވާ ޖަމާޢަތަކުން ބޭނުންކުރާ ތަނެއް ކަމުގައި ވެސް އެ ޖަމުޢިއްޔާއިން ބުންޏެވެ.
އިސްރާޢީލުގެ ވައިގެ ހަމަލާތަކުގައި ސޫރިޔާގެ އަސްކަރިއްޔާގެ ސިފައިންގެ މީހެއްގެ މީހެއްގެ އިތުރުން އީރާނުން ވާގިވެރިވާ ޖަމާޢަތަކަށް ނިސްބަތްވާ އިތުރު ދެ މީހުން މަރުވިއެވެ. މި ހަމަލާގައި ސޫރިޔާގެ އަސްކަރިއްޔާގެ ސިފައިންގެ އިތުރު ދެ މީހަކު ޒަޚަމުވިއެވެ.
އިސްރާޢީލުގެ އަސްކަރީ މަތިންދާބޯޓުތަކުން ދީފައިވާ ބައެއް ހަމަލާތައް ސޫރިޔާގެ އަސްކަރިއްޔާއިން ދިފާޢުކޮށް، ވައްޓައިލާފައިވާ ކަމުގައި ސޫރިޔާއިން ބުންޏެވެ. މި ހަމަލާއާ ގުޅޭގޮތުން މަޢުލޫމާތު ހާމަކުރުމަށް ޔަހޫދީ އިސްރާޢީލުން ވަނީ ދެކޮޅު ހަދާފައެވެ. އަދި، ބޭރުގެ މީޑިޔާތަކުގައި އިސްރާޢީލުގެ އަސްކަރިއްޔާއާ ގުޅޭގޮތުން ފަތުރާ ވާހަކަތަކަށް ރައްދު ނުދޭނެ ކަމުގައި ބުންޏެވެ.
2011 ވަނަ އަހަރު ސޫރިޔާގައި ފެށި ދާޚިލީ ހަނގުރާމައިގެ ތެރެއަށް ޔަހޫދީ އިސްރާޢީލުން ވެސް ވަނީ ވަދެފައެވެ. އަދި، ސޫރިޔާގެ ސަރުކާރާއި، ސަރުކާރަށް ވާގިވެރިވާ ހަތިޔާރުއެޅި ޖަމާޢަތްތަކާ ދެކޮޅަށް ހަމަލާދޭން ފަށާފައެވެ. މި ހަމަލާތައް އަމާޒުކޮށްފައި ވަނީ އީރާނުން ވާގިވެރިވާ ޖަމާޢަތްތަކާއި، ލުބުނާނުގެ ހިޒްބުﷲ ޖަމާޢަތުގެ ހަނގުރާވެރިންނަށެވެ.
މި ހަމަލާތަކާ ގުޅިގެން އިސްރާޢީލުން މީޑިޔާގައި މަޢުލޫމާތު ހިއްސާކޮށްފައި ނުވި ނަމަވެސް، ސޫރިޔާގައި ނުފޫޒާއި ބާރު ފަތުރަން އީރާނުން ކުރަމުންދާ މަސައްކަތްތައް ހުއްޓުވާނެ ކަމަށް ޔަހޫދީ އިސްރާޢީލުން ދަނީ ބުނަމުންނެވެ. މާރިޗު މަހުގެ 7 ވަނަ ދުވަހު ވެސް ޔަހުދީ އިސްރާޢީލުން ވަނީ ސޫރިޔާގެ ޙަލަބަށް ވަރުގަދަ ހަމަލާތަކެއްދީ، ތިން މީހުން މަރައިލާފައެވެ. މި ހަމަލާތައް އަމާޒުކޮށްފައި ވަނީ ޙަލަބުގެ ވައިގެ ބަނދަރަށެވެ.
ފެބުރުވަރީ 19 ވަނަ ދުވަހު ވެސް ޔަހުދީ އިސްރާޢީލުން ވަނީ ސޫރިޔާގެ ވެރިރަށް ދިމިޝްޤަށް ވަރުގަދަ ވައިގެ ހަމަލާތަކެއް ދީފައެވެ. އެ ހަމަލާތަކުގައި 15 މީހުން މަރައިލިއެވެ. އެ ހަމަލާތައް އަމާޒުކޮށްފައި ވަނީ، ސޫރިޔާގެ ދިފާޢީ އިދާރާތަކުން ބޭނުންކުރާ މަރުކަޒަކަށެވެ.