އެމެރިކާގެ ހުޅަނގުގައިވާ ކެލިފޯނިޔާ ސްޓޭޓްގެ އައްސޭރިފަށަށް ދެ ބޯޓު ބަންޑުން ޖަހައިލާ އަށް މީހުން މަރުވެއްޖެއެވެ. ކެލިފޯނިޔާގެ ސެން ޑިއޭގޯގެ ދެކުނު ފަރާތު އައްސޭރިފަށަށް ބަންޑުންޖަހައިލާފައިވާ ދެ ބޯޓަކީ، ޤަވާޢިދާ ޚިލާފަށް ހިޖުރަކުރަން މަސައްކަތްކުރި ބަޔަކު ދަތުރުކުރި ދެ ބޯޓުގައި ކަމުގައި ސެން ޑިއޭގޯގެ ކޯސްޓްގާޑުން ބުނެއެވެ. މި ހާދިސާ ހިނގާފައި ވަނީ ރޭގަނޑުގެ ވަގުތުގައެވެ.
މިއީ، ކެލިފޯނިޔާގެ ތާރީޚުގައި ވެސް ހިނގާފައިވާ މި ފަދަ އެންމެ ހިތާމަވެރި ހާދިސާކަމުގައި ސެން ޑިއޭގޯގެ ލައިފްގާޑް އިދާރާގެ އިސްވެރިޔާ ޖޭމްސް ގާޓްލެންޑް ސިފަކުރެއްވިއެވެ. އަދި، މި ހާދިސާ ހިނގަން މެދުވެރިވި ސަބަބު ދެނެގަނެވިފައި ނުވާ ކަމަށް ވެސް އޭނާ ވިދާޅުވިއެވެ.
ސެން ޑިއޭގޯގެ ޓޮރީ ޕައިންސްގެ އައްސޭރި ފަށުގައި ކޯސްޓްގާޑުން ހަރަކާތްތެރިވާން ފަށާފައި ވަނީ، 911 އަށް ލިބުނު ރިޕޯޓަކާ ގުޅިގެންނެވެ. މި ހާދިސާގެ ރިޕޯޓު ކުރި މީހާ ބުނެފައި ވަނީ 23 މީހުންނާ އެކު ދަތުރުކުރަމުންދިޔަ ދެ ބޯޓެއް ބަންޑުން ޖަހައިލާފައިވާ ކަމުގައެވެ. ނަމަވެސް، ކޯސްޓްގާޑުން އެ ސަރަޙައްދަށް ދިޔައިރު، މަރުވެފައިވާ އަށް މީހުންގެ ހަށިތައް ފިޔަވައި އިތުރު މީހަކު އެ ސަރަޙައްދުން ފެނިފައި ނުވާ ކަމުގައި ކޯސްޓްގާޑުގެ އިސް އޮފިޝަލެއް ކަމުގައިވާ ޖޭމްސް ސްޕިޓްލަރ ވިދާޅުވިއެވެ.
ކޯސްޓްގާޑުން އެ ސަރަޙައްދަށް ދިޔައިރު، ދެ ބޯޓު ވެސް އޮތީ ގޮނޑުދޮށަށް ބީހިފައި ކަމަށާއި، ބޯޓުގައި ދަތުރުކުރި ކަމަށް ބުނާ އިތުރު މީހުން ފިލާފައިވާ ކަމަށް ބެލެވޭ ކަމުގައި ސްޕިޓްލަރ ވިދާޅުވިއެވެ. މަރުވެފައިވާ އަށް މީހުންގެ ހަށިގަނޑު ފެނިފައި ވަނީ އެ ސަރަޙައްދުގެ ކަނޑުންނެވެ.
މި ބޯޓުގައި ދަތުރުކޮށްފައިވާ މީހުންގެ ވަނަވަރު ހާމަކޮށްފައި ނުވި ނަމަވެސް، އެއީ މެދުތެރޭ އަދި ދެކުނު އެމެރިކާގެ ޤައުމުތަކަށް ނިސްބަތްވާ ބަޔެއް ކަމަށް ބެލެވެއެވެ. ސެން ޑިއޭގޯއަކީ މެކްސިކޯއާ އެމެރިކާގެ ސަރަޙައްދީ ރޮނގު ކައިރީގައި އޮންނަ ރަށެކެވެ. 2017 ވަނަ އަހަރަށް ފަހު، އެ މަގުން ޤަވާޢިދާ ޚިލާފަށް އެމެރިކާއަށް ހިޖުރަކުރާ މީހުންގެ ޢަދަދު 771 އިންސައްތައަށް އިތުރުވެފައިވާ ކަމުގައި ތަފާސްހިސާބުތަކުން ދައްކައެވެ.