ގދ.ތިނަދޫ ކައުންސިލުން ކުއްޔަށް ދީފައިވާ ބިންތަކުގެ ތެރެއިން، ޤަވާޢިދުން ކުލި ނުދައްކާ ބިންތަކާއި މެދު ޤާނޫނީގޮތުން ފިޔަވަޅު އަޅަން ނިންމައިފިއެވެ.
ޕީއެސްއެމް ނިއުސްއަށް މައުލޫމާތު ދެއްވަމުން ގދ. ތިނަދޫ ކައުންސިލުގެ ރައީސް ސައުދު އަލީ ވިދާޅުވީ ތިނަދޫ ކައުންސިލުން 100 އާއި 120 ދެމެދުގެ އަދަދަކަށް ބިން ދޫކޮށްފައިވާކަމަށެވެ. މި ބިންތަކަކީ ތިނަދޫ އިޙްތިސާސް ހިނގާ ސަރަޙައްދުން ހަރުގެ އެޅުމަށާއި، މަސްވެރިކަމާއި ދަނޑުވެރިކަމުގެ އިތުރުން ސިނާޢީ މަސައްކަތްތަކަށް ދޫކޮށްފައިވާ ބިންތަކެވެ.
ކަައުންސިލް ރައީސް ވިދާޅުވީ ކުއްޔަށް ދޫކޮށްފައިވާ ބިންތަކުގެ ތެރެއިން ގާތްގަނޑަކަށް 30 ވަރަކަށް ބިމަށް ގަވާއިދުން ކުލި ނުދައްކާކަމަށެވެ. އެގޮތުން މިދިޔަމަސް ނިމުނުއިރު ކުލީގެ ގޮތުގައި ލިބެންޖެހޭ 4.5 މިލިއަނަށްވުރެ ގިނަ ރުފިޔާ ނުލިބޭކަން އޭނާ ފާހަގަކުރެއްވިއެވެ.
ތިނަދޫ ކައުންސިލުން ބުނީ ކުލި ނުދައްކާ ބިންތަކަށް ބައިބަޔަށް ބަހާލައިގެން ކުލިދެއްކޭނެ އިންތިޒާމްވެސް މިދިޔަ އަހަރުގެ މޭމަހު ހަމަޖައްސައިދިންކަމަށެވެ. ނަމަވެސް އަދިވެސް ގިނަ ފަރާތްތަތަކުން ކުލި ނުދައްކާކަން ކައުންސިލުން ފާހަގަކުރެއެވެ.
ކައުންސިލުން ބުނީ ކުލިދައްކާ ފަރާތްތަކުން ބިންތަކުގެ މުއްދަތު އިތުރުކޮށް ދިނުމަށް އެދި ހުށަހެޅެމުންދާކަމަށެވެ. ނަމަވެސް ކައުންސިލަށް ދައްކަންޖެހޭ އެއްވެސް ފައިސާއެއް އޮތްނަމަ އެއްބަސްވުމުގެ މުއްދަތު އިތުރުކޮށް ނުދެވޭނެކަމަށް ކައުންސިލުގެ ރައީސް ވިދާޅުވިއެވެ.
ތިނަދޫ ކައުންސިލުން ބުނީ ކުއްޔަށް ދޫކޮށްފައިވާ ބިންތަކަށް ފައިސާ ނުދައްކާނަމަ އެ ފައިސާ ހޯދަން ޝަރުޢި މަރުހަލާގެ ތެރެއިން މަސައްކަތްކުރުމަށް ނިންމާފައިވާކަމަށެވެ.