އިރާނުގެ އާ ޤާނޫނުހަދާ މަޖިލިސް ހޮވުމަށް މާދަމާ އެޤައުމުގެ ރައްޔިތުން ވޯޓުލާނެއެވެ.
މާދަމާ ބާއްވާ އިންތިހާބުގައި 6،000 އަށްވުރެ ގިނަ ކެންޑިޑޭޓުން ވާދަކުރާނެއެވެ. މި އިންތިހާބުގައި ރައީސް ހަސަން ރޫހާނީއަށް ތާއީދުކުރާ ފަރާތްތަކަށް ބޮޑު ކާމިޔާބީއެއް ލިބޭނެކަމަށް ބައެއް ފަރާތްތަކުން އަންދާޒާކޮށްފައިވެއެވެ. ގާނޫނު ހަދާ މަޖިލިހުގެ މެޖޯރިޓީ ރޫހާނީއަށް ތާއީދުކުރާ ފަރާތްތަކަށް ލިބިއްޖެނަމަ، މިހާރު މަޑުޖެހިލާފައިވާ މަޝްރޫއުތައް ކުރިއަށް ގެންދިޔުމަށް އިތުރު ފުރުސަތެއް ރޫހާނީގެ ސަރުކާރަށް ލިބޭނެއެވެ.
މިދިޔަ އަހަރު އިރާނާއި ދުނިޔޭގެ ބާރުތަކުން އެއްބަސްވި ނިއުކްލިއަރ މުއާހަދާގެ ދަށުން، ހުޅަނގުން ވަނީ އިރާނަށް އަޅާފައިވާ ދަތިކުރުމުގެ ފިޔަވަޅުތައް އުވާލާފައެވެ. މިއާއި ގުޅިގެން، އިރާނުން ވަނީ އެޤައުމުގެ ވަޅުޖެހިފައިވާ އިޤްތިސާދު ހަމައަކަށް އެޅުވުމުގެ ގޮތުން ގިނަ މަޝްރޫއުތަކެއް އިއުލާންކޮށް، އެ މަޝްރޫއުތަކުގެ މަސައްކަތް ފަށާފައެވެ.