ޔޫކްރެއިނުގެ ދެކުނުގައިވާ ޚާރްސަންއަށް ރަޝިޔާއިން ދިން ވަރުގަދަ ހަމަލާތަކެއްގައި ޢާންމުންގެ ތިން މީހުން މަރުވެއްޖެއެވެ. ޢާންމުންގެ އިތުރު ދެ މީހުން ޒަޚަމުވި މި ހަމަލާތަކާ ގުޅިގެން އެ ޤައުމުގެ ރައީސްގެ އޮފީހުގެ އިސް އޮފިޝަލެއް ކަމުގައިވާ އެންޑްރީ ޔަރްކެމް ވިދާޅުވީ، ރަޝިޔާގެ ހަމަލާތައް ޢާންމުން ދިރިއުޅޭ ޢިމާރާތްތަކަށް އަމާޒުކުރަމުންދާ ކަމުގައެވެ.
ނަމަވެސް، ޚާރްސަން ސަރަޙައްދުގެ އަސްކަރީ އޮފިޝަލެއް ކަމުގައިވާ އޮލެކްސެންޑަރ ޕްރޮކުޑިން ވިދާޅުވީ، ޢާންމުންގެ ތިން މީހުން މަރުވެފައި ވަނީ އެ މީހުން ދަތުރުކުރަމުންދިޔަ ކާރަށް އަމާޒުކޮށް ރަޝިޔާ ސިފައިން ދީފައިވާ ހަމަލާތަކެއްގައި ކަމުގައެވެ. މި ހަމަލާގައި ކާރުގައި ރޯވެ، އަނދާފައިވާ މަންޒަރު ދައްކުވައިދޭ ފޮޓޯތަކެއް ޚާރްސަންގެ އޮފިޝަލުން ވަނީ ޢާންމުކޮށްފައެވެ.
މި ހަމަލާގެ ދެ ދުވަސް ކުރިން ވެސް ރަޝިޔާއިން ވަނީ ޔޫކްރެއިނުގެ ވެރިރަށް ކީވްގެ އިތުރުން ބޮޑެތި އެހެން ރަށްތަކަށް މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފައެވެ. މީގެ ތެރެއިން ޚާރްސަންއަށް އަމާޒުކޮށް ދިން ހަމަލާތަކުގައި ޢާންމުންގެ ތިން މީހަކު ވަނީ މަރުވެފައެވެ.
ޚާރްސަންއަކީ 2022 ވަނަ އަހަރުގެ ފެބްރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ފެށި ހަނގުރާމައިގެ ކުރީކޮޅު އަތްގަދަކުރި ސަރަޙައްދެކެވެ. ނަމަވެސް، ޔޫކްރެއިނުގެ ފައުޖުތަކުން ހިންގި ވަރުގަދަ އަސްކަރީ ކެމްޕޭނަކަށް ފަހު، 2022 ވަނަ އަހަރުގެ ސެޕްޓެންބަރު މަހުގެ ތެރޭގައި ޚާރްސަން ސަރަޙައްދާއި އެ ސަރަޙައްދުގެ ވެރިރަށް ކަމުގައިވާ ޚާރްސަން ސިޓީ ވެސް ވަނީ މިނިވަންކޮށްފައެވެ.
ޚާރްސަންއިން ރަޝިޔާ ސިފައިން ފޭބި ނަމަވެސް، ރަޝިޔާގެ ފައުޖުތަކުން އަދިވެސް ދަނީ އެ ރަށަށް އަމާޒުކޮށް ވަރުގަދަ ހަމަލާތަކެއް ދެމުންނެވެ. ރަޝިޔާ ސިފައިން ދެން އަތްގަދަކޮށްފައިވާ ސަރަޙައްދުތަކަކީ ޔޫކްރެއިނުގެ އިރުމަތީގައިވާ ދޮންބާސް އެކުލެވިގެންވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. މީގެ އިތުރުން، ދެކުނުގައިވާ ކްރައިމިޔާއަކީ ރަޝިޔާއިން 2014 ވަނަ އަހަރު ވެރިވެގަނެފައިވާ ސަރަޙައްދެކެވެ.