ސޫރިޔާގެ އިރުމަތީގައިވާ ސަރުކާރާ ދެކޮޅު ފަރާތްތަކުން ކޮންޓްރޯލް ކުރާ ސަރަޙައްދުގައި ހަލުވިކަމާ އެކު ކޮލެރާ ފެތުރެމުންދާތީ، އެ ކަން ކޮންޓްރޯލް ކުރުމަށް ކުޑަކުދިންނަށް ވެކްސިން ދިނުމުގެ ކެމްޕޭނެއް ފަށައިފިއެވެ. މިއީ، އެ ޤައުމުގެ ހުޅަނގުއުތުރުގައިވާ ސަރަޙައްދުގައި ކޮލެރާ ފެތުރެން ފެށިތާ އަހަރެއްހާ ދުވަސް ފަހުން، ވެކްސިން ދިނުމުގެ މަސައްކަތް ކުރާ ފުރަތަމަ ފަހަރެވެ.
ތުރުކީވިލާތަށް ފެބްރުވަރީ 6 ވަނަ ދުވަހު އައި ބާރުގަދަ ބިންހެލުމުގައި ސޫރިޔާގެ އުތުރުގެ ސަރަޙައްދުތަކަށް ވެސް ބޮޑެތި ގެއްލުންތައް ލިބި، ގިނަ ޢަދަދެއްގެ ބަޔަކު މަރުވެފައިވާއިރު، ކޮލެރާ ފެތުރުން އިތުރުވާނެ ކަމަށް ޞިއްޙީ މާހިރުން ވަނީ އިންޒާރުކޮށްފައެވެ. އިދްލިބް ސަރަޙައްދުގައި، ޞިއްޙީ ޚިދުމަތްތެރިން މިހާރު ދަނީ ގެއިންގެއަށް ޒިޔާރަތްކޮށް، ކުޑަކުދިންނަށް ވެކްސިން ދިނުމުގެ މަސައްކަތް ފަށާފައެވެ.
މިއީ، 2009 ވަނަ އަހަރަށް ފަހު އެ ޤައުމުގައި ހަލުވިކަމާ އެކު މި ބަލި ފެތުރެން ފަށާފައިވާ ފުރަތަމަ ފަހަރެވެ. 2022 ވަނަ އަހަރުގެ ސެޕްޓެންބަރު މަހުން ފެށިގެން އެ ޤައުމުގެ އުތުރުގެ ސަރަޙައްދުތަކުގައި ކޮލެރާ ފެތުރެމުންދާ ކަމުގައި އިދްލިބްގެ ޞިއްޙި އޮފިޝަލެއް ކަމުގައިވާ ޒުހައިރު ކައްރަތު ވިދާޅުވިއެވެ. މިހާތަނަށް މި ބަލީގައި 26 މީހުން ވަނީ މަރުވެފައެވެ.
ކޮލެރާއަކީ ވަރަށް ފަސޭހައިން ގައިންގަޔަށް އަރާ ބައްޔެކެވެ. މި ބަލި ޖެހިފައިވާ މީހުންގެ ޢަދަދު 565 އަށް އަރާފައިވާ ކަމުގައި ކައްރަތު ވިދާޅުވިއެވެ. އަދި، ސޫރިޔާގެ އެކި ކަންކޮޅުތަކުގައި މި ބަލި ޖެހިފައިވާ މީހުންގެ ޢަދަދު 85,000 އަރާނެ ކަމަށް އ.ދ.އިން ލަފާކުރެއެވެ.
ސޫރިޔާގެ ހުޅަނގުއުތުރުގައި ފަށާފައިވާ ވެކްސިން ކެމްޕޭން ކުރިއަށް ގެންދަނީ އ.ދ.ގެ އެހީތެރިކަމާ އެކުގައެވެ. ވެކްސިން ކެމްޕޭން ފެށުމަށް ކުރިން ރާވާފައި އޮތް ނަމަވެސް، ބިންހެލުމާ ގުޅިގެން އެ މަސައްކަތް ވަނީ މަޑުޖެހިފައެވެ. ބިންހެލުމުގައި ދެ ޤައުމުން މަރުވި މީހުންގެ ޢަދަދު 50,000 އަށްވުރެ އިތުރުވެފައިވާއިރު، ސޫރިޔާގައި 6,000 އަށްވުރެ ގިނަ މީހުންގެ ފުރާނަ ވަނީ ގެއްލިފައެވެ.
ބިންހެލުމުގައި ސޫރިޔާގެ ހުޅަނގުއުތުރުގައި ހަނގުރާމަވެރިންގެ ކޮންޓްރޯލްގެ ދަށުގައިވާ ސަރަޙައްދުތަކުގެ 10,000 އަށްވުރެ ގިނަ ޢިމާރާތަށް ގެއްލުން ލިބުނު ކަމުގައި އ.ދ.ގެ ތަފާސްހިސާބުތަކުން ދައްކައެވެ. މީގެ ތެރެއިން ގިނަ ޢަދަދެއްގެ ޢިމާރާތް ވަނީ ވެއްޓި، ސުންނާފަތިވެފައެވެ. އެ ސަރަޙައްދުގައިވާ ހޮސްޕިޓަލްތަކާއި ޞިއްޙީ މަރުކަޒުތައް ސޫރިޔާގެ ދާޚިލީ ހަނގުރާމައިގައި ވަނީ ސުންނާފަތިވެފައެވެ. އަދި، އެ ސަރަޙައްދުގެ ގިނަ ރައްޔިތުން ދިރިއުޅެމުން ދަނީ ވަގުތީ ހިޔާތަކާއި ޓެންޓުތަކުގައި ވަރަށް ދަތި ހާލުގައެވެ.
އެ ސަރަޙައްދުތަކުގެ ހާލަތު އޮތް ގޮތުން، ކޮލެރާ ފެތުރުމުގެ ބިރު އޮތް ކަމަށް އ.ދ.ގެ ކުޑަކުދިންގެ ފަންޑު (ޔުނިސެފް)ގެ އިސް އޮފިޝަލެއް ކަމުގައި ޢައްމަރު ޢައްމަރު ވިދާޅުވިއެވެ. "ބައްޔަށް އެންމެ ބޮޑަށް ހުށަހެޅިފައި ވަނީ ކުޑަކުދިން. ކޮލެރާއަކީ ފެނުގެ ޒަރީއާއިން ފެތުރޭ ބައްޔަކަށްވުމުގެ ސަބަބުން، ކުޑަކުދިންގެ މެދުގައި މި ބަލި ވަރަށް ހަލުވިކަމާ އެކު ފެތުރޭ. މީގެ އިތުރުން، ބޭރަށް ހިންގުން ވެސް އެ ސަރަޙައްދުތަކުގައި ވަނީ އިތުރުވެފައި،" އޭނާ ވިދާޅުވިއެވެ.
އެ ސަރަޙައްދުތަކުގައި ދިރިއުޅޭ ކުޑަކުދިންނަށް ކޮލެރާ ވެކްސިން ޖަހައިދިނުމަށް އ.ދ.އިން ވަނީ ވެކްސިންގެ 1.7 މިލިޔަން ޑޯޒް ފޮނުވާފައެވެ. ސޫރިޔާގެ އުތުރާއި ހުޅަނގުއުތުރުގައި ސަރުކާރާ ދެކޮޅު ފަރާތްތަކުން ކޮންޓްރޯލްކުރާ ސަރަޙައްދުތަކުގައި ހަތަރު މިލިޔަނަށްވުރެ ގިނަ މީހުން ދިރިއުޅޭ ކަމުގައި އ.ދ.އިން އަންދާޒާ ކުރެއެވެ.