ޤަޠަރުގެ އަމީރު ޝައިޚް ތަމީމް ބިން ޙަމަދް އަލް ޘާނީ އެ ޤައުމުގެ ބޮޑުވަޒީރު ކަމުގެ މަޤާމަށް ޚާރިޖީ ވަޒީރު ޝައިޚް މުޙައްމަދު ބިން ޢަބްދުއްރަޙްމާން އަލް ޘާނީ ޢައްޔަނުކުރައްވައިފިއެވެ. ބޮޑުވަޒީރު ކަމުގެ މަޤާމުގެ އިތުރުން، އެ ޤައުމުގެ ދާޚިލީ ވަޒީރު ކަމުގެ މަޤާމަށް ވެސް އަމީރު ޝައިޚް ތަމީމް ވަނީ އައު ބޭފުޅަކު ޢައްޔަނުކުރައްވާފައެވެ.
ބޮޑުވަޒީރު ކަމުގެ މަޤާމަށް ޝައިޚް މުޙައްމަދު ޢައްޔަނުކުރައްވާފައި ވަނީ، އެ މަޤާމު ފުރުއްވަމުން ގެންދެވި ޝައިޚް ޚާލިދު ބިން ޚަލީފާ ބިން ޢަބްދުލްޢަޒީޒް އަލް ޘާނީ އެ މަޤާމުން އިސްތިޢުފާ ދެއްވުމާ ގުޅިގެންނެވެ. ދާޚިލީ ވަޒީރު ކަމުގެ މަޤާމުން ވެސް ޝައިޚް ޚާލިދު ވަނީ އިސްތިޢުފާ ދެއްވާފައެވެ. ޝައިޚް ޚާލިދުގެ އިސްތިޢުފާ އަމީރު ގަބޫލުފުޅު ކުރައްވާފައިވާ ކަމުގައި އޭނާގެ އޮފީހުން ބުންޏެވެ. ބޮޑުވަޒީރު ކަމުގެ މަޤާމާ ޝައިޚް ޚާލިދު ހަވާލުވެ ވަޑައިގަތީ 2020 ވަނަ އަހަރުގެ ޖަނަވަރީ މަހުއެވެ.
ޤަޠަރުގެ ބޮޑުވަޒީރު ކަމުގެ މަޤާމާ އަލަށް ހަވާލުވެ ވަޑައިގެންނެވި ޝައިޚް މުޙައްމަދަކީ ޚާރިޖީ ދާއިރާއިން ތަޖުރިބާކާރު ބޭފުޅެކެވެ. އަދި، އިޤުތިޞާދީ ދާއިރާގެ މާހިރެކެވެ. އަދި، އޭނާއަކީ އަމީރު ޝައިޚް ތަމީމް އިތުބާރު ކުރައްވާ، އޭނާގެ ވަރަށް އަރިސް ބޭފުޅެއް ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ޤަޠަރުގެ ޚާރިޖީ ވަޒީރު ކަމުގެ މަޤާމާ ޝައިޚް މުޙައްމަދު ހަވާލުވެވަޑައިގަތީ 2016 ވަނަ އަހަރުގެ ޖަނަވަރީ މަހުއެވެ. އޭނާ ތަޢުލީމު ހާސިލުކުރައްވާފައި ވަނީ ޤަޠަރު ޔުނިވަރސިޓީއިން އިކޮނޮމިކްސް އަދި ބިޒްނަސް އެޑްމިނިސްޓްރޭޝަންގެ ދާއިރާއިންނެވެ.
ހުސްވެފައިވާ ދާޚިލީ ވަޒީރު ކަމުގެ މަޤާމަށް ޢައްޔަނުކޮށްފައި ވަނީ ޤަޠަރުގައި ބޭއްވި ދުނިޔޭގެ ތަށްޓަށް ކުޅުނު ފުޓުބޯޅަ މުބާރާތުގެ ސަލާމަތީ ކަންކަން ބެލެހެއްޓުމުގައި އެންމެ އިސްކޮށް ހަރަކާތްތެރިވި ޝައިޚް ޚަލީފާ ބިން ޙަމަދް އަލް ޘާނީއެވެ. އަމީރު ޝައިޚް ތަމީމް ވަނީ ޤަޠަރުގެ ސޮވެރެން އިންވެސްޓްމެންޓް ފަންޑް – ޤަޠަރު އިންވެސްޓްމެންޓް އޮތޯރިޓީއަށް ވެސް ބަދަލުތަކެއް ގެންނަވާފައެވެ. އެ ތަނުގެ އެންމެ އިސްވެރިޔާގެ މަޤާމަށް ޢައްޔަނުކުރައްވާފައި ވަނީ ޤަޠަރުގެ މަރުކަޒީ ބޭންކުގެ ގަވަރުނަރު ޝައިޚް ބަންދަރް ބިން މުޙައްމަދު ބިން ސަޢުދު އަލް ޘާނީއެވެ.
ޤަޠަރުގެ އަމީރު ޝައިޚް ތަމީމް އެ މަޤާމަށް އިސްވެވަޑައިގަތީ 2013 ވަނަ އަހަރު ބައްޕާފުޅު ޝައިޚް ޙަމަދް ބިން ޚަލީފާ އަލް ޘާނީ އެ މަޤާމުގެ މަސްއޫލިއްޔަތުތައް އޭނާގެ އަތްމައްޗަށް ދޫކޮށްލެވުމުންނެވެ. ޝައިޚް ޙަމަދް، އަމީރު ކަމުގެ މަޤާމާ ހަވާލުވެޑައިގަތީ، އޭނާގެ ބައްޕާފުޅު އަދި ޝައިޚް ތަމީމްގެ ކާފާފުޅާ ދެކޮޅަށް މީގެ 18 އަހަރުކުރިން ކުރި ބަޣާވާތަކަށް ފަހުއެވެ.