މިޞްރުގައި ހިނގި ނުރައްކާތެރި ރޭލު އެކްސިޑެންޓެއްގައި ދެ މީހުން މަރުވެއްޖެއެވެ. ވެރިރަށް ޤާހިރާގެ އުތުރުން އޮންނަ ޤަލްޔޫބުގައި ހިނގި މި ހާދިސާގައި ރޭލުގައި ތިބި ފަސިންޖަރުންގެ ތެރެއިން އިތުރު 16 މީހަކު ޒަޚަމުވިއެވެ. މީގެ ތެރެއިން ހަ މީހަކަށް ހޮސްޕިޓަލުގައި ފަރުވާދޭން ޖެހުނު ކަމުގައި މިޞްރުގެ ޞިއްޙަތާ ބެހޭ ވުޒާރާއިން ބުނެއެވެ.
މި ހާދިސާ ހިނގާފައި ވަނީ ޤަލްޔޫބް ސްޓޭޝަނަށް ވަނުމަށް ދަތުރުކުރަމުންދިޔަ ރޭލެއް، މަޑުކުރުމަށް އަންގާފައިވާ ނިޝާނަކަށް އިޙުތިރާމުނުކޮށް، ސްޓޭޝަން ތެރެއަށް ވަނުމަށް މަސައްކަތް ކުރުމުން ކަމުގައި ރޭލު ދަތުރުފަތުރުގެ ޚިދުމަތްދޭ އިދާރާގެ އޮފިޝަލުން ވިދާޅުވިއެވެ. މި ހާދިސާގައި، ރޭލުގެ ބައެއް ކާރުތައް ރޭލު ދަގަނޑުތައް މަތިން ބޭރަށް ވެއްޓި، ބޮޑެތި ގެއްލުންތަކެއް ލިބުނެވެ.
މިޞްރުގައި މީގެ ކުރިން ވެސް މި ފަދަ ހިތާމަވެރި ހާދިސާތައް ހިނގާފައިވެއެވެ. މި ފަދަ ހާދިސާތައް ހިނގަން މެދުވެރިވަނީ، ރޭލު ދަތުރުފަތުރުގެ ނިޒާމުގައި ބޭނުންކުރާ ވަސީލަތްތައް މަރާމާރު ނުކުރުމާއި، ބައުވެފައިވާ ތަކެތި ބޭނުންކުރުމުގެ ސަބަބުން ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ. މި ފަދަ ހާދިސާތަކާ ގުޅިގެން ރޭލު ދަތުރުފަތުރުގެ ޚިދުމަތްދޭ އިދާރާގެ އިސްވެރިޔާ އަޝްރަފް ރަސްލާން ވަނީ 2021 ވަނަ އަހަރުގެ އޭޕްރިލް މަހު ވަޒީފާއިން ވަކިކޮށްފައެވެ.
މިޞްރުގެ ދަތުރުފަތުރާ ބެހޭ ވަޒީރު ކާމިލް އަލް-ވަޒީރުގެ އެންގެވުމަކަށް އަޝްރަފް ވަޒީފާއިން ވަކިކޮށްފައި ވަނީ، އެ މަހު ހިނގި ނުރައްކާތެރި ރޭލު އެކްސިޑެންޓެއްގައި 23 މީހުން މަރުވި ހާދިސާއާ ގުޅިގެންނެވެ. އަޝްރަފާ އެކު، ރޭލު ދަތުރުފަތުރުގެ ޚިދުމަތްދޭ އިދާރާގެ އެންމެ އިސް 10 ވެރިން ވެސް ވަނީ ވަޒީފާއިން ވަކިކޮށްފައެވެ.
ރޭލު ދަތުރުފަތުރުގެ އިދާރާ ހިންގުމުގައި އިސްކޮށް އުޅުނު މީހުން ބަދަލުކޮށްފައި ވަނީ، އެ ޚިދުމަތުގެ ފެންވަރު ރަނގަޅު ކުރުމަށް ފުރުޞަތު ދިނުމުގެ ނިޔަތުގައި ކަމަށް އަލްވަޒީރު ވަނީ ވިދާޅުވެފައެވެ. 2021 މާރިޗު މަހު ވެސް މިޞްރުގައި މި ފަދަ ނުރައްކާތެރި ހާދިސާއެއް ހިނގައި، 20 މީހުން މަރުވިއެވެ. އެ ހާދިސާގައި 200 އަށްވުރެ ގިނަ މީހުން ޒަޚަމުވިއެވެ.
އަލް-ވަޒީރާ މިޞްރުގެ ދަތުރުފަތުރާ ބެހޭ ވުޒާރާ ހަވާލުކޮށްފައި ވަނީ، 2019 ވަނަ އަހަރު ހިނގި ނުރައްކާތެރި ހާދިސާއަކާ ގުޅިގެންނެވެ. އެ ހާދިސާ ހިނގާފައި ވަނީ ފަރުވާ ކުޑަވުމުގެ ސަބަބުން ކަމަށް ތަހުޤީޤަށް ވަނީ ހާމަވެފައެވެ. އަލް-ވަޒީރަކީ ކުރިން މިޞްރުގެ އަސްކަރިއްޔާގައި ޖެނެރަލެއްގެ މަޤާމު ފުރުއްވާފައިވާ ބޭފުޅެކެވެ.
މިޞްރުގައި މިހާތަނަށް ހިނގާފައިވާ އެންމެ ނުރައްކާތެރި އަދި އެންމެ ހިތާމަވެރި ރޭލު އެކްސިޑެންޓު ހިނގާފައި ވަނީ 2002 ވަނަ އަހަރުއެވެ. ރޭލެއްގައި އަލިފާން ރޯވެގެން ހިނގި އެ ހާދިސާގައި 373 މީހުން މަރުވިއެވެ. އަދި، މިޞްރުގެ ރައީސް ޢަބްދުލް ފައްތާޙް އަލް-ސީސީ ވަނީ، ރޭލު ދަތުރުފަތުރުގެ ނިޒާމުގެ ރައްކާތެރިކަން ކަށަވަރު ކުރުމަށް މަސައްކަތް ކުރެއްވުމަށް ވަޢުދުވެ ވަޑައިގަންނަވާފައެވެ.