އަލިފާންރޯވެ، އަޑިއަށްދިޔަ "އާގަލާ" ބޯޓުން ގެއްލުނު މީހާ ހޯދުމަށް އެމްއެންޑީއެފުން ބޮޑު ސަރަހައްދެއް ބަލައިފިއެވެ.
އެމްއެންޑީއެފުން ވިދާޅުވީ އާގަލާ ބޯޓުން ގެއްލިފައިވާ ފަޅުވެރިޔާ ހޯދުމަށް އިއްޔެ 332.35 ކިލޯ މީޓަޓަރުގެ ސަރަހައްދެއް ކަނޑާއި ވައިގެ މަގުން ބަލާފައިވާކަމަށެވެ. އަދި އެނާ ހޯދުމުގެ އޮޕަރޭޝަން ހުއްޓާނުލައި މިހާރުވެސް ކުރިއަށްދާކަމަށް އެމްއެންޑީއެފުން ވިދާޅުވިއެވެ.
މ.ތުވަރުގެ ހުޅަނގުން ދަތުރުކުރަމުންދަނިކޮށް އާގަލާ ބޯޓުގައި އަލިފާން ރޯވެ އަޑިއަށް ގޮސްފައިވަނީ މިދިޔަ ހޯމަ ދުވަހުގެރޭ ދަންވަރުގެ ވަގުތެއްގައެވެ. މި ބޯޓްގައި އަލިފާން ރޯވުމާއި އެކު އޭގައި ތިބި އެންމެން ވަނީ ކަނޑަށް ފުންމާލާފައެވެ. އެ ބޯޓްގައި އެވަގުތު 15 މީހުން ތިބިކަމަށާއި އެގެތެރޭގައި ހިމެނެނީ 5 ދިވެހިންނާއި އިންޑިއާ 5 މީހަކާއި ބަންގްލަދޭޝްގެ 5 މީހުންކަމަށްވެސް އެމްއެންޑީއެފުން ވިދާޅުވެއެވެ. އަދި އެކަކު ގެއްލިގެން ހޯދަން ފެށިއެވެ. ގެއްލިގެން ހޯދަމުން ދަނީ އިންޑިއާ މީހެކެވެ.
އެމްއެންޑީއެފުން ވަނީ އާގަލާ" ބޯޓުގައި ހުރި ބައެއް ތަކެތި ފެނުމައްޗަށް އަރާ އޮޔާދާތީ އެކަމަށް ސަމާލުވުމަށްވެސް އިލްތިމާސްކުރައްވާފައެވެ.