މިއަހަރުގެ ރިޔާސީ އިންތިޚާބުގައި އަލަށް 21137 ޒުވާނުން އަލަށް ވޯޓްލާނެކަން އިލެކްޝަންސް ކޮމިޝަންގެ ތަފާސްް ހިސާބުތަކުން ދައްކައިފިއެވެ. އެ ކޮމިޝަނުން އާއްމުކުރި ހިސާބުތަކުން ދައްކާ ގޮތުގައި މިފަހަރުގެ އިންތިޚާބުގައި 283272 މީހަކަށް ވޯޓްލުމުގެ ހައްޤު ލިބެއެވެ.
ގިނައީ ޕާޓީތަކުގެ މެމްބަރުން، އޮޅުވާލައިގެން ވައްދާފައިވާ މީހުން މަދެއްނޫން
އަންނަ ރިޔާސީ އިންތިޚާބުގައި ވޯޓްލެވޭ މީހުންގެ ތެރެއިން %42 މީހުންނަކީ އެއްވެސް ސިޔާސީ ޕާޓީއެއްގައި ނަން ނެތް މީހުންނެވެ. އެއީ ވޯޓްލެވޭ މީހުންގެ ތެރެއިން 120337 މީހުންނެވެ. ބާކީ ތިބި 162935 މީހުންނަކީ ކޮންމެވެސް ސިޔާސީ ޕާޓީއެއްގައި ނަން ރަޖިސްޓްރީކޮށްފައިވާ މީހުންނެވެ. އެއީ ވޯޓްލާ މީހުންގެ %58 އިންސައްތައެވެ. މި ތަފާސް ހިސާބުތަކާއި ގުޅޭގޮތުން އިލެކްޝަންސް ކޮމިޝަންގެ ނާއިބު ރައީސް އިސްމާޢީލް ހަބީބު ވިދާޅުވި، އިންތިޚާބު ބާއްވާ ދުވަހާއި ހަމައަށް އަދިވެސް މި ޢަދަދުތަކަށް ބަދަލުތަކެއް އައުމުގެ ފުރުޞަތު އެބައޮތްކަމަށެވެ.
"މި އަދަދަށް ބަދަލުއައިސްފާނެ. މި ހިސާބުތަކަކީ 9 ސެޕްޓެމްބަރާ ހަމައަށް 18 އަހަރު ފުރޭ މީހުންގެ އަދަދަށް ބަލައިގެން ހަދާފައިވާ ހިސާބުތަކެއް. އަދި ސިޔާސީ ޕާޓީތަކުގައި އުޅޭ ނޫޅޭ ޢަދަދުތަކަކީ ފެބުރުއަރީ 21 އާއި ހަމައަށް ނަގާފައިވާ ތަފާސް ހިސާބުތަކެއް." ހަބީބު ވިދާޅުވިއެވެ.
އިންތިޚާބުގައި ވޯޓްލެވޭ މީހުންގެ ބޮޑު އަދަދެއް ޕާޓީތަކުގައި ރަޖިސްޓްރީކޮށްފައިވާކަމަށް ދެއްކި ނަމަވެސް މީ ސައްޙަ އަދަދަށް ނުވެދާނެއެވެ. ސަބަބަކީ ނޭގި އޮޅުވާލައިގެން ޕާޓީތަކަށް މީހުން ރަޖިސްޓްރީކޮށްފައިވާ މައްސަލަ އަދިވެސް އޮތުމުންނެވެ. އެކަމުގެ ކަންބޮޑުވުންތަކާއި އެ ޝަކުވާތައް ކޮންމެ ދުވަހަކުވެސް ސޯޝަލް މީޑިއާގެ ޕްލެޓް ފޯމްތަކަށްވެސް ތިރިވަމުން އާދެއެވެ.
އަލަށްް ވޯޓްލެވޭ ޒުވާނުންގެ ނަމްބަރު ދަށަށް
އެންމެ ފަހުން ބޭއްވި ރިޔާސީ އިންތިޚާބުގެ އަދަދުތަކާއި އަޅާ ބަލާއިރު މިފަހަރުގެ އަލަށް ވޯޓްލުމުގެ ހައްޤު ލިބިފައިވާ ޒުވާނުންގެ އަދަދު ވަނީ ދަށަށް ޖެހިލާފައެވެ. ހިސާބުތަކުން ދައްކާގޮތުން 2018ގެ އިންތިޚާބުގައި 22970 ޒުވާނަކަށް އަަލަށް ވޯޓްލުމުގެ ހައްޤު ލިބުނެވެ. އެހެންނަމަވެސް މި އަހަރު އަލަށް ވޯޓްލެވޭ ޒުވާނުންގެ އަދަދަކީ 21137 އެވެ. އެއީ 1733 ޒުވާނުންގެ މަދުވުމެކެވެ.
2018 ވަނަ އަހަރު 262135 މީހުންނަށް ވޯޓްލުމުގެ ހައްޤު ލިބުނުއިރު އެ އަހަރު ވޯޓްލެވޭ މީހުންގެ 89 އިންސައްތަ މީހުންވަނީ ނުކުމެ ވޯޓްލާފައެވެ. އޭގެ ކުރީ ފަހަރު މިއަދަދު ހުރީ 91 އިންސައްތައިގައެވެ.
އިންތިޚާބުގެ ފޯރިވަނީ ގަދަވާން ފަށާފައި
މިއަހަރުގެ ރިޔާސީ އިންތިޚާބުގެ ވޯޓްގެ ފުރަތަމަ ބުރި އޮންނާނީ ސެޕްޓެމްބަރު މަހުގެ 9 ވަނަދުވަހުއެވެ. އިންތިޚާބަށް ނަން ހުށައެޅުމުގެ ފުރުސަތު ހުޅުވާލަން އިލެކްޝަންސް ކޮމިޝަނުން ނިންމާފައިވަނީ ޖުލައިމަހުގެ 23 ވަނަދުވަހުއެވެ.
އިންތިޚާބުގައި ވާދަކުރަން ނުންނާނެކަން ހާމަކުރާ އަދަދުތަކަށްވެސް ބަދަލުތައް މިވަނީ އަންނަން ފަށާފައެވެ. އިވޭ އަޑުތަކާއި ފެންނަ މަންޒަރުތަކަށް ބަލާއިރު އެ ޢަދަދު މިހާރުވެސް މިވަނީ 5 އަރާފައެވެ. އިންތިޚާބުގައި ވާދަކުރާނެކަން މިހާތަނަށް އިއުލާންކޮށްފައިވަނީ އެމްޑީޕީގެ ޕްރައިމަރީގައި ރައީސް ނަޝީދު ބޮޑު ތަފާތަކުން ބަލިކުރައްވާ ޓިކެޓް ކާމިޔާބުކުރެއްވި އެމްޑީޕީގެ ކެންޑިޑޭޓް އިބްރާހިމް މުހައްމަދު ޞާލިޙާއި، ހިޔާނާތާއި މަނީ ލޯންޑަރިންގެ ކުށްސާބިތުވެ 5 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ޕީޕީއެމްގެ ކެންޑިޑޭޓް އަބްދުﷲ ޔާމީން ހިމެނިވަޑައިގަންނަވައެވެ. މީގެއިތުރުން ކުރީގެ ހޯމް މިނިސްޓަރ އުމަރު ނަސީރާއި ކުރީގެ އެޓާނީ ޖެނެރަލް ޑރ. މުހައްމަދު މުނައްވަރުވެސް ރިޔާސީ ރޭހަށް ނުކުންނަވާކަން މި ހަފްތާގެތެރޭގައި ވަނީ އިއުލާންކުރައްވާފައެވެ. އަދި މީގެއިތުރުން އެމްއެންޕީގެ ރައީސް އަދި ކުރީގެ ޑިފެންސް މިނިސްޓްރ މުހައްމަދު ނާޒިމްވެސް އިންތިޚާބުގައި ވާދަކުރައްވަން ވަނީ ނިންމަވާފައެވެ.