އިންޑޮނީޝިޔާގެ ވެރިރަށް ޖަކަރްތާގައި ހުންނަ ތެޔޮ ރައްކާކުރާ ގުދަނެއްގައި ހިނގި ނުރައްކާތެރި އަލިފާނުގެ ހާދިސާއެއްގައި 16 މީހުން މަރުވެއްޖެއެވެ. ސަރުކާރު ހިއްސާވާ ޕެރްތެމީނާ ކުންފުނީގެ ތެޔޮ ރައްކާކުރާ ގުދަނެއްގައި ހިނގި މި ހާދިސާގައި ގިނަ ޢަދަދެއްގެ ބަޔަކު ޒަޚަމުވިއެވެ.
މި ހާދިސާގައި މަރުވި މީހުންގެ ތެރޭގައި ކުޑަ ދެ ކުދިން ވެސް ހިމެނެއެވެ. އަދި، 50 އަށްވުރެ ގިނަ މީހުންނަށް އަނިޔާވެފައިވާ ކަމުގައި ޖަކަރްތާގެ އަލިފާން ނިއްވާ ޓީމުތަކުން ބުނެއެވެ. ތެޔޮ ރައްކާކުރާ ގުދަނުގައި ރޯވި އަލިފާންގަނޑު، އެ ތަނާ އިންވެގެން ހުރި ބައެއް ޢިމާރާތްތަކަށް ވެސް ފެތުރުނެވެ.
މި ހާދިސާގައި ބައެއް ގެދޮރު އަނދާފައިވާއިރު، އަލިފާންގަނޑު ނިއްވައިލެވިފައި ވަނީ އެތަކެއް ގަޑިއިރެއްގެ މަސައްކަތަށް ފަހުގައެވެ. ތެޔޮ ގުދަނުގައި އަލިފާން ރޯވުމާ ގުޅިގެން، އެ ސަރަޙައްދުގައި ދިރިއުޅޭ ގިނަ ރައްޔިތުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
މި ހާދިސާގައި މަރުވި މީހުންގެ ހަށިތައް ވަރަށް ބޮޑަށް ފިހިފައިވާ ކަމުގައި ޖަކަރްތާގެ އަލިފާން ނިއްވާ އިދާރާގެ އިސްވެރިޔާ ސަޓްރިއާޑީ ގުނަވަން ވިދާޅުވިއެވެ. އަދި، އެ ތަނުގައި އަލިފާން ރޯވާން މެދުވެރިވާން ދިމާވި ސަބަބު ދެނެގަނެވިފައި ނުވާ ކަމަށް ވެސް އޭނާ ވިދާޅުވިއެވެ.
އަލިފާންގަނޑު ކޮންޓްރޯލްކޮށް ނައްވައިލެވިފައިވީ ނަމަވެސް، މި ހާދިސާގައި އެ ސަރަޙައްދުގެ ގިނަ ޢިމާރާތްތަކަށް އަލިފާންގަނޑު ފެތުރި، ގެއްލުންވެފައިވުމުގެ ސަބަބުން، އެ ގެތަކުގެ ރައްޔިތުން އެނބުރި ގެއަށް ދިޔުމުގެ ހުއްދަ އޮފިޝަލުން އަދި ދީފައެއް ނުވެއެވެ. އަދި، އެ ޢިމާރާތްތަކަކީ ދިރިއުޅެން ރައްކާތެރި ތަންތަންތޯ ބެލުމުގެ މަސައްކަތް ފަށާފައިވާ ކަމުގައި އޮފިޝަލުން ވިދާޅުވެއެވެ.
މި ފަދަ ހާދިސާގެ ފުރިހަމަ ތަހުޤީޤެއް ހިންގައި، މި ފަދަ އިތުރު ހާދިސާއެއް ތަކުރާރުވިޔަ ނުދިނުމަށް އަޅަންޖެހޭ ހުރިހާ ފިޔަވަޅުތަކެއް އަޅާނެ ކަމުގައި ޕެރްތެމީނާގެ އިސްވެރިޔާ ނިކީ ވިދްޔަވަތީ ވިދާޅުވިއެވެ. އަދި، މި ހާދިސާއާ ގުޅިގެން އިންޑޮނީޝިޔާއަށް ބޭނުންވާ މިންވަރަށް ތެލާއި ގޭސް ފޯރުކޮށްދިނުމަށް އެއްވެސް ހުރަހެއް ކުރިމަތިވެފައި ނުވާ ކަމަށް ވެސް އޭނާ ވިދާޅުވިއެވެ.
އިންޑޮނީޝިޔާގެ ސަރުކާރު ހިއްސާވާ ކުންފުނިތަކާ ބެހޭ ވަޒީރު އެރިކް ތާހިރު ވަނީ މި ހާދިސާގައި މަރުވި މީހުންގެ ޢާއިލާތަކަށް ތަޢުޒިޔާ ވިދާޅުވެފައެވެ. އަދި، މި ހާދިސާގައި ފިހިގެން އަނިޔާވި މީހުންނަށް ފަރުވާ ކުރުމަށް ހިނގާ ޚަރަދުތައް ސަރުކާރުން ބަލަހައްޓާނެ ކަމުގައި ވެސް އޭނާ ވިދާޅުވިއެވެ.
2009 ވަނަ އަހަރު ވެސް ހަމަ މި ތެޔޮ ގުދަނުގައި ނުރައްކާތެރި އަލިފާނުގެ ހާދިސާއެއް ވަނީ ހިނގާފައެވެ. އެ ހާދިސާގައި އެއްވެސް މީހެއްގެ ފުރާނައަށް ނުރައްކާވެފައި ނުވި ނަމަވެސް، ތެޔޮ ގުދަނާއި އިންވެގެން ހުރި 40 ގެއެއް ވަނީ އަނދާފައެވެ. 2021 ވަނަ އަހަރު ހުޅަނގު ޖާވާގައި ހުންނަ ތެޔޮ ސާފުކުރާ ކާރުޚާނާއެއްގައި ވެސް ނުރައްކާތެރި އަލިފާނުގެ ހާދިސާއެއް ހިނގިއެވެ.