ދުނިޔޭގެ އެންމެ މަޝްހޫރު އެއް ފުޓުބޯޅަ ކުޅުންތެރިޔާ ލިއޮނެލް މެސީގެ ޢާއިލާއަށް ނިސްބަތްވާ ފިހާރައަކަށް ބަޑީގެ ހަމަލާތަކެއްދީ، މެސީއަށް އަމާޒުކޮށް އިންޒާރުގެ މެސެޖެއް ދީފިއެވެ. ހަމަލާދީފައި ވަނީ މެސީގެ އަންހެނުން އެންޓޮނެއްލާ ރޮކުޓްޒޯގެ ޢާއިލާއިން ހިންގާ ސުޕަރމާކެޓަކަށެވެ. އެ ފިހާރަ ހުންނަނީ އާޖެންޓީނާގެ ރޮޒާރިޔޯގައެވެ.
ފިހާރައަށް އަމާޒުކޮށް ބަޑީގެ ހަމަލާތަކެއް ދީފައި ވަނީ ދަންވަރުގެ ވަގުތުގައި އެ ތަން ބަންދުކޮށްފައި ހުއްޓައެވެ. އެ ވަގުތު އެ ތަނުގައި އެއްވެސް މީހަކު ނެތުމުގެ ސަބަބުން މި ހަމަލާއާ ގުޅިގެން އެއްވެސް މީހެއްގެ ފުރާނައަށް ނުރައްކާވެފައެއް ނުވެއެވެ. އެ ތަނަށް ހަމަލާދިނުމަށްފަހު، ހަތިޔާރު އެޅި ދެ މީހުން ވަނީ އެ ތަނުގައި އިންޒާރުގެ މެސެޖެއް ބާއްވާފައެވެ.
ފިހާރައަށް ހަމަލާދިނުމުގައި ދެ މީހަކު ބައިވެރިވެފައިވާ ކަމުގައި ރޮޒާރިޔޯގެ މޭޔަރު ޕަބްލޯ ހެވްކިން ވިދާޅުވިއެވެ. އަދި، އެ ފިހާރައަކީ ރޮކުޓްޒޯގެ ޢާއިލާއިން ހިންގާ ފިހާރައެއް ކަން ވެސް އޭނާ ކަށަވަރުކޮށްދެއްވައެވެ. އެ ތަނުގެ ބޭރަށް 14 ވަޒަން އަރާފައިވާ ކަމުގައި ރޮޒާރިޔޯގެ ފުލުހުން ވިދާޅުވެއެވެ.
"މެސީ، އަހަރުމެން މިތިބީ ކަލެއަށް މަޑުކޮށްގެން. ހެވްކޯއަކީ މަސްތުވާތަކެތީގެ ބޮޑެއް. އޭނާ ކަލެއާ މެދު އަޅައިލުމެއް ނުބަހައްޓާނެ،" މެސީއަށް އަމާޒުކޮށް ލިޔެފައިވާ އިންޒާރުގެ މެސެޖުގައި ބުނެފައި ވަނީ މިހެންނެވެ. ހެވްކިން ވިދާޅުވީ މިއީ އިންޒާރުގެ މެސެޖެއްގެ ގޮތުގައި ނުބެލެވޭ ކަމަށާއި، މިއީ ރޮޒާރިޔޯގެ ހަމަޖެހުމާއި ސުލްޙަ ނަގައިލަން ބަޔަކު ހިންގާފައިވާ އަމަލެއްގެ ގޮތުގައި ބެލެވޭ ކަމުގައެވެ.
"އެންމެ އަވަހަށް ވާހަކައެއް ވައިގައި ހިފާނީ ނުވަތަ ވައިރަލް ވަނީ ކިހިނެއް؟ އެ ގޮތަކީ، މެސީގެ ނަން ބޭނުންކުރުން. އަދި މެސީއަށް އަމާޒުކޮށް ހަމަލާއެއް ދިނުން،" ހެވްކިން ވިދާޅުވިއެވެ. މަންޒަރު ފެނުނު މީހުން ބުނީ، ފިހާރައަށް ހަމަލާ ދިނުމުގައި ދެ މީހަކު ބައިވެރިވި ކަމަށާއި، އެ މީހުން ފިހާރަ ކައިރިއަށް ގޮސްފައި ވަނީ ސައިކަލެއްގައި ކަމުގައެވެ. އަދި، ފިހާރައަށް ހަމަލާދިނުމަށް ފަހު، އެ ތަނުގައި އަތުން ލިޔެފައިވާ އިންޒާރުގެ ނޯޓު ބޭއްވުމަށްފަހު، އެ މީހުން ފިލާފައިވާ ކަމުގައި ވެސް މަންޒަރު ފެނުނު މީހުން ބުނެއެވެ.
ރޮޒާރިޔޯގެ ފުލުހުންގެ އިސް އޮފިޝަލެއް ކަމުގައިވާ އައިވަން ގޮންޒާލޭޒް ވެސް ވަނީ، މިއީ މެސީގެ ފުރާނައަށް ނުރައްކާ ކުރުމުގެ ގޮތުން ދީފައިވާ އިންޒާރެއްގެ ގޮތުގައި ނުބެލެވޭ ކަމުގައެވެ. އަދި، ރޮކުޓްޒޯގެ ޢާއިލާގެ މެންބަރުންނަށް އަމާޒުކޮށް މީގެ ކުރިން މި ފަދަ އިންޒާރުތަކެއް ދީފައިވާ ނުވާ ކަމަށް، މި މައްސަލަ ތަހުޤީޤު ކުރައްވާ ޕްރޮސިކިޔުޓަރ ވެސް ވިދާޅުވިއެވެ.
ރޮޒާރިޔޯއަކީ ވަރަށް ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރާ ބަނދަރުމަތީ ރަށެކެވެ. އަދި، ނުރައްކާތެރި ކުށްތަކުގެ ޢަދަދު ގިނަ ރަށެކެވެ. 2022 ވަނަ އަހަރު އެކަނިވެސް އެ ރަށުގައި 287 މީހަކު މަރައިލާފައިވެއެވެ. އެ ރަށް މި ވަގުތު ކޮންޓްރޯލް ކުރަމުން ދަނީ މަސްތުވާތަކެތީގެ ވިޔަފާރިކުރާ ބޮޑުން ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލުކުރެއެވެ.