އިސްރާޢީލުން ވެރިވެގަނެފައިވާ ފަލަސްޠީނުގެ ބިންތަކުގައި ވަޒަންވެރިކުރުވާފައިވާ ޔަހޫދީން ފަލަސްޠީނު ރައްޔިތުންގެ ގެދޮރާއި މުދަލަށް ގެއްލުންދީ، ފަލަސްޠީނުގެ މުސްލިމުންނަށް ހަމަލާދޭން ފަށައިފިއެވެ. ޔަހޫދީ ޓެރެރިސްޓުން ދަނީ، ފަލަސްޠީނު ރައްޔިތުންގެ ގެދޮރާއި ފިހާރަތަކަށް ގެއްލުން ދެމުންނެވެ. އަދި، އެއްގަމު އުޅަނދުފަހަރުގައި ހުޅުޖަހަމުންނެވެ.
ފަލަސްޠީނު ރައްޔިތުންނާ ދެކޮޅަށް ޓެރެރިޒަމްގެ އަމަލުތައް ހިންގުމުގައި 400 އެއްހާ ޔަހޫދީން ބައިވެރިވެފައިވާ ކަމުގައި އިސްރާޢީލުގެ އަސްކަރިއްޔާއިން ބުނެއެވެ. ނަމަވެސް، އެ މީހުން ހުއްޓުވަން ޔަހޫދީ ޖައްބާރު އަސްކަރިއްޔާގެ ސިފައިން މަސައްކަތްކޮށްފައެއް ނުވެއެވެ. އަދި، ޔަހޫދީ ސިފައިން ވެސް ވަނީ ފަލަސްޠީނު ރައްޔިތުންނަށް ހަމަލާދީފައެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، އިސްރާޢީލުގެ އަސްކަރިއްޔާއިން ދިން ބަޑީގެ ހަމަލާތަކުގައި ފަލަސްޠީނުގެ އުމުރުން 37 އަހަރުގެ ސާމިހު އަޤްތާޝް ޝަހީދުކޮށްލާފައިވާ ކަމުގައެވެ. އަދި، ޔަހޫދީން ހިންގަމުންދާ ޓެރެރިޒަމްގެ އަމަލުތައް ހުއްޓުވައިދިނުމަށް ގޮވައިލާ ފަލަސްޠީނުގެ ރައްޔިތުން ބޭއްވި ހިނގައިލުމަކަށް ވެސް ޔަހޫދީ އަސްކަރިއްޔާގެ ސިފައިން ހަމަލާދީފައިވާ ކަމުގައެވެ.
މުޒާހަރާތައް ހުއްޓުވަން ޔަހޫދީ ޓެރެރިސްޓު ސިފައިން ވަނީ ބާރުގެ ބޭނުންކޮށް، ކަރުނަގޭސް ޖަހާފައެވެ. އަދި، ކަރުނަގޭހުގެ އަސަރުކޮށް، 350 މީހުންނަށް ފަރުވާދޭން ޖެހުނު ކަމުގައި ފަލަސްޠީނުގެ ރެޑް ކްރެސެންޓުން ބުނެއެވެ. ޔަހޫދީންގެ ޓެރެރިސްޓު ހަމަލާތައް ފަށާފައި ވަނީ، ފަލަސްޠީނުގެ މުޖާހިދުން ދިން ހަމަލާއެއްގައި ޔަހޫދީންގެ ދެ މީހުން މަރައިލުމާ ގުޅިގެންނެވެ.
މި ހަމަނުޖެހުންތައް ހިނގާފައި މި ވަނީ، ފަލަސްޠީނާއި އިސްރާޢީލާ ދެމެދު ހަމަޖެހުން ޤާއިމުކުރުމަށް އުރުދުނުން އިސްނަގައިގެން މަޝްވަރާތަކެއް ކުރިއަށްގެންދާ ދަނޑިވަޅެއްގައެވެ. އުރުދުންގެ ރިސޯޓު ރަށެއް ކަމުގައިވާ އަޤަބާގައި ކުރިއަށްދާ މަޝްވަރާތަކުގައި މިޞްރާއި އެމެރިކާގެ އޮފިޝަލުން ވެސް ބައިވެރިވެއެވެ.
ޔަހޫދީން ދެމުންދާ ޓެރެރިސްޓު ހަމަލާތަކުގައި ފަލަސްޠީނު ރައްޔިތުންގެ 30 ގެއަކާއި 100 އަށްވުރެ ގިނަ އެއްގަމު އުޅަނދުގައި ރޯކޮށްލާފައިވާ ކަމުގައި އޮފިޝަލުން ވިދާޅުވެއެވެ. އަދި، ހަމަނުޖެހުންތަކާ ގުޅިގެން ޔަހޫދީންގެ އަށް މީހުން ހައްޔަރުކުރި ނަމަވެސް، އެ މީހުން މިހާރު ވަނީ ދޫކޮށްލާފައެވެ.
ފަލަސްޠީނުގެ މުޖާހިދުން ދިން ހަމަލާއެއްގައި ޔަހޫދީންގެ އިތުރު މީހަކު ވެސް ވަނީ މަރައިލާފައެވެ. އެއީ، އެމެރިކާގެ ރައްޔިތެއް ކަމަށް ބުނެ، އެމެރިކާގެ ޚާރިޖީ ވުޒާރާގެ ތަރުޖަމާނު ނެޑް ޕްރައިސް ވަނީ އެ ހަމަލާ އެންމެ ހަރުކަށި އިބާރާތުން ކުށްވެރި ކުރައްވާފައެވެ. ފަލަސްޠީނު ރައްޔިތުންނާ ދެކޮޅަށް ޔަހޫދީން ހިންގަމުންދާ ޓެރެރިޒަމްގެ އަމަލުތައް ވެސް އޭނާ ކުށްވެރި ކުރެއްވިއެވެ.
އިސްރާޢީލުން އަތްގަދަކޮށްފައިވާ ހުޅަނގު އައްސޭރިއަކީ 2.9 މިލިޔަން ފަލަސްޠީނު ރައްޔިތުން ދިރިއުޅޭ ފަލަސްޠީނުގެ ބިމެކެވެ. ނަމަވެސް، އެ ތަނުގައި 475,000 އަށްވުރެ ގިނަ ޔަހޫދީ ވަޒަންވެރިން ދިރިއުޅެއެވެ. އަދި، ޔަހޫދީ އިތުރު ވަޒަންވެރިން ހުޅަނގު އައްސޭރީގައި ވަޒަންވެރިކުރުވަން އިސްރާޢީލުން ދަނީ މަސައްކަތް ކުރަމުންނެވެ.
ޔަހޫދީ ޖައްބާރު ސިފައިން މި އަހަރުގެ ތެރޭގައި ހިންގާފައިވާ އުދުވާންތަކުގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު ވަނީ 63 އަށްވުރެ އިތުރުވެފައެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ. އުމުރުން ދުވަސްވީ އަންހެނެއް ވެސް ވަނީ ޝަހީދުކޮށްލާފައެވެ.