ތުރުކީވިލާތާއި ސޫރިޔާއަށް މި މަހުގެ ކުރީކޮޅު އައި ބާރުގަދަ ބިންހެލުމުގައި މަރުވި މީހުންގެ ޢަދަދު 50,000 އިން މައްޗަށް އަރައިފިއެވެ. ފެބްރުވަރީ 6 ވަނަ ދުވަހު ރިކްޓަރ މިންގަނޑުން 7.7 ގެ ބާރުމިނުގައި އައި ބިންހެލުމާއި ލޮޅުންތަކުގައި ތުރުކީވިލާތުގެ އިރުދެކުނާއި ސޫރިޔާގެ އުތުރުގެ ސަރަޙައްދުތަކަށް ވަނީ ބޮޑެތި ގެއްލުންތަކެއް ލިބިފައެވެ.
ބިންހެލުމުގައި ވެއްޓުނު ޢިމާރާތްތަކުގެ ދަށުވި މީހުންގެ ހަށިތައް ހޯދުމަށް 240,000 އަށްވުރެ ގިނަ މީހުންގެ މައްޗަށް އެކުލެވިގެންވާ ރެސްކިޔު ޓީމުތަކުން އަދިވެސް ދަނީ ހަރަކާތްތެރިވަމުންނެވެ. ޢިމާރާތްތަކުގެ ދަށުން ދިރިތިބި މީހުން ފެންނާނެ ކަމުގެ އުންމީދު ވަނީ ކަނޑައިލާފައެވެ.
ބިންހެލުމުގައި ތުރުކީވިލާތުން 44,218 އަށްވުރެ ގިނަ މީހުން މަރުވި ކަމުގައި އެ ޤައުމުގެ ކާރިސާތަކާ ބެހޭ އިދާރާ (އޭ.އެފް.އޭ.ޑީ)އިން ބުނެއެވެ. ސޫރިޔާގައި ވެސް 5,914 މީހުން ވަނީ މަރުވެފައެވެ. ދެ ޤައުމުގައި ވެސް ގިނަ ޢަދަދެއްގެ ޢިމާރާތްތައް ވަނީ ވެއްޓި، ބިމާ ހަމަވެފައެވެ. ފުރަތަމަ ބިންހެލުމަށް ފަހު އެ ސަރަޙައްދަށް 9,000 އަށްވުރެ ގިނަ ލޮޅުންތައް އަރާފައިވާ ކަމުގައި އޭ.އެފް.އޭ.ޑީ.އިން ބުނެއެވެ.
ބިންހެލުމުގައި ތުރުކީވިލާތުގެ 11 ޕުރޮވިންސަކުން 173,000 އަށްވުރެ ގިނަ ޢިމާރާތަށް ވަނީ ގެއްލުން ލިބިފައެވެ. މީގެ ތެރެއިން ގިނަ ޢިމާރާތްތައް ވަނީ ވެއްޓި، ސުންނާފަތިވެފައެވެ. ބިންހެލުން އައި ސަރަޙައްދުތަކުގައި ދިރިއުޅޭ 530,000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވާއިރު، 1.9 މިލިޔަން މީހުން މި ވަގުތު ދިރިއުޅެމުން ދަނީ ވަގުތީ ހަޔާތަކުގައި ކަމަށް އޭ.އެފް.އޭ.ޑީ.އިން ބުނެއެވެ.
ތުރުކީވިލާތުގައި ބިންހެލުމުގެ އަސަރު ކޮށްފައިވާ މީހުންގެ ޢަދަދު 20 މިލިޔަނަށް އަރާ ކަމުގައި އެ ޤައުމުން ބުނެފައިވާއިރު، ސޫރިޔާގައި ބިންހެލުމުގެ އަސަރު ކުރި މީހުންގެ ޢަދަދު 8.8 މިލިޔަނަށް އަރާނެ ކަމަށް އެމެރިކާއިން އަންދާޒާ ކުރެއެވެ. ސޫރިޔާގެ ދާޚިލީ ހާލަތާ ގުޅިގެން ބިންހެލުމުގައި މަރުވި މީހުންނާއި ގެއްލުން ލިބުނު މީހުންގެ ފުރިހަމަ ޢަދަދުތައް ހޯދުމަށް ވަނީ ދަތިވެފައެވެ.
ކުރިއަށް އޮތް އަހަރެއްހާ ދުވަހުގެ ތެރޭގައި، ބިންހެލުމުގައި ގެދޮރު ހަލާކުވި މީހުންނަށް ގެދޮރު ބިނާކޮށްދެއްވާނެ ކަމުގައި ތުރުކީވިލާތުގެ ރައީސް ރަޖަބް ޠައްޔިބް އުރުދުޣާން ވަނީ ވިދާޅުވެފައެވެ. އަދި، ކުރިއަށް އޮތް މާރިޗު މަހުގެ ތެރޭގައި އައު ޢިމާރާތްތަކުގެ ބިންގާ އަޅައި، ޢިމާރާތްކުރުމުގެ މަސައްކަތް ފަށާނެ ކަމުގައި އޭނާ ވިދާޅުވިއެވެ. ނަމަވެސް، ކަމާގުޅޭ މާހިރުން ދެކޭ ގޮތުގައި، ރައްކާތެރިކަން ކަށަވަރު ކުރުމަކީ އަވަސްއަރުވައިލައިގެން ގެދޮރު ބިނާކުރުމަށްވުރެ މުހިންމު ކަމެކެވެ.
ތުރުކީވިލާތުގައި ގިނަ ޢަދަދެއްގެ ޢިމާރާތްތައް ވެއްޓިފައި ވަނީ ގެދޮރު ޢިމާރާތްކުރާ ކުންފުނިތަކުގެ ފަރުވާކުޑަކަމުން ކަމުގައި އެ ޤައުމުގެ ސަރުކާރުން ވަނީ ތުހުމަތުކޮށްފައެވެ. އަދި، ޢިމާރާތްކުރުމުގެ ދާއިރާގައި މަސައްކަތްކުރާ ކުންފުނިތަކުގެ ވެރިންނާއި ސުޕަވައިޒަރުން ހައްޔަރުކުރުމުގެ މަސައްކަތް އެ ޤައުމުން ވަނީ ފަށާފައެވެ. މިހާތަނަށް 184 މީހަކު ވަނީ ހައްޔަރުކޮށްފައެވެ.
އަދި، އެ ދާއިރާގައި މަސައްކަތްކުރާ 600 އަށްވުރެ ގިނަ މީހުންގެ މައްސަލަ ބަލައި، ތަހުޤީޤު ކުރުމުގެ މަސައްކަތް ފަށާފައިވާ ކަމުގައި ތުރުކީވިލާތުގެ ޖަސްޓިސް މިނިސްޓަރު ބަކީރް ބޮޒްދާގް ވިދާޅުވިއެވެ. ހައްޔަރުކޮށްފައިވާ މީހުންގެ ތެރޭގައި 79 ކޮންޓްރެކްޓަރުންނާއި، ޢިމާރާތްތަކުގެ ކޮލިޓީ ކަށަވަރު ކުރުމުގެ ޒިންމާ މަތިކޮށްފައިވާ 74 މީހުން ހިމެނެއެވެ. އަދި، ޢިމާރާތްތަކުގެ ވެރިންގެ ތެރެއިން 13 މީހަކާއި، ޤަވާޢިދާ ޙިލާފަށް ޢިމާރާތްތަކަށް ބަދަލު ގެނެސްފައިވާ 18 މީހުން ހިމެނެއެވެ.