ޕަޕުއާ ނިއު ގިނީގައި ހަރަކާތްތެރިވާ ހަތިޔާރު އެޅި ޖަމާޢަތަކުން ރަހީނުކޮށްފައިވާ ތިން މީހުން މިނިވަން ކޮށްފައިވާ ކަމަށް އެ ޤައުމުގެ ބޮޑުވަޒީރު ޖޭމްސް މަރާޕޭ ހާމަކުރައްވައިފިއެވެ. ހަތިޔާރު އެޅި ޖަމާޢަތަކުން ހަފުތާއެއްހާ ދުވަސް ފަހުން މިނިވަންކޮށްފައިވާ މީހުންގެ ތެރޭގައި ނިއު ޒިލެންޑުގެ ރައްޔިތެއް ވެސް ހިމެނެއެވެ.
ރަހީނުކޮށްފައިވާ ނިއު ޒިލެންޑުގެ ރައްޔިތަކީ ބްރައިސް ބާކަރއެވެ. އޭނާ އަކީ އޮސްޓްރޭލިޔާގެ ޔުނިވަރސިޓީއެއްގައި މަސައްކަތްކުރާ ޕްރޮފެސަރެއް ކަމަށާއި، އޭނާއާއި އެކު އިތުރު ދެ އަންހެނުން ރަހީނުކޮށްފައި ވަނީ ޕަޕުއާ ނިއު ގިނީގެ ޖަންގަލި ބޯ ސަރަޙައްދަކުން ކަމުގައި އެ ޤައުމުގެ އޮފިޝަލުން ވިދާޅުވެއެވެ. އެ މީހުން މިނިވަން ކުރުމަށް ޕަޕުއާ ނިއު ގިނީގެ ސަރުކާރުން ގިނަ މަސައްކަތްތަކެއް ކޮށްފައިވާ ކަމުގައި ވެސް އޮފިޝަލުން ވިދާޅުވެއެވެ.
މިނިވަންކޮށްފައިވާ ތިން މީހުން ވެރިރަށް ޕޯޓް މޯޒްބީއަށް ގެންދިޔުމުގެ މަސައްކަތް ފަށާފައިވާ ކަމަށާއި، ބޮޑުވަޒީރު މަރާޕޭ އެ މީހުންނާ ބައްދަލުކުރައްވަން ހަމަޖެހިފައިވާ ކަމުގައި ވެސް އޮފިޝަލުން ވިދާޅުވެއެވެ. ރަހީނުކޮށްފައިވާ ތިން މީހުން މިނިވަން ކުރުމުގެ ބަދަލުގައި ކަފާލާތުގެ ގޮތުގައި 1 މިލިޔަން ޑޮލަރު ހޯދަން، ހަތިޔާރު އެޅި ޖަމާޢަތުން ވަނީ މަސައްކަތް ކޮށްފައެވެ.
އެ ޖަމާޢަތުން ރަހީނުކޮށްފައިވާ އިތުރު އަންހެނެއް ވެސް ހުސްވި ހަފުތާގައި ވަނީ މިނިވަން ކޮށްފައެވެ. ރަހީނުކޮށްފައިވާ މީހުންނަކީ، ދިރާސާތަކެއް ކުރުމަށް ޕަޕުއާ ނިއު ގިނީގެ ޖަންގަލީގެ ސަރަޙައްދެއްގައި ހަރަކާތްތެރިވަމުންދިޔަ ޓީމަކަށް ނިސްބަވްވާ ބަޔެކެވެ. މިނިވަންކޮށްފައިވާ އެންމެންގެ ހާލު ރަނގަޅު ކަމުގައި ވެސް ބޮޑުވަޒީރު މަރާޕޭ ވަނީ ވިދާޅުވެފައެވެ.
ޕަޕުއާ ނިއު ގިނީގެ އުސް ބިންތަކުގައިވާ ޖަންގަލީގެ ސަރަޙައްދުތަކުގައި ހަތިޔާރު އެޅި ގުރޫޕުތަކުން ދަނީ ހަރަކާތްތެރިވަމުންނެވެ. އަދި، އެ ސަރަޙައްދުތަކުގެ ފުރިހަމަ ކޮންޓްރޯލް، އެ ޤައުމުގެ ސަރުކާރާއި ސަލާމަތީ ބާރުތަކަށް ނޯވެއެވެ. މި ހާދިސާއާ ގުޅިގެން، މަރާޕޭ ވަނީ، ރަހީނުކޮށްފައިވާ މީހުންގެ ޢާއިލާތަކުގެ ކިބައިން މަޢާފަށް އެދިވަޑައިގަންނަވާފައެވެ.