މާލެތެރޭގައި މިހާރު ހިނގަމުން އަންނަ މާރާމާރީތަކުގެ ފަހަތުގައި ވަނީ ހަތަރު ގޭންގެއްކަމަށާއި، މިދިޔަ މަހު މެދުތެރެއިން ފެށިގެން މިހާތަނަށް އެ ސިލްސިލާ މާރާމާތިތަކާއި ގުޅިގެން 16 މީހަކު ހައްޔަރުކޮށްފައިވާކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ. ކޮމިޝަނަރ އޮފް ޕޮލިސް މިހެން ވިދާޅުވީ، ރޭ މާލޭގެ ފިހާރައެއްގެ ތެރޭގައި މީހަކަށް ވަޅިން ހަމަލާ ދިނުމާއި، މިދިޔަ ބުރާސްފަތި ދުވަހުގެ ރޭ ހުޅުމާލޭގައި ހުންނަ 'ޖޫސް ޓައިމް'އަށް ބަޔަކު ގެއްލުން ދީފައިވާ މައްސަލައާއި ގުޅޭގޮތުން ވާހަކަފުޅު ދައްކަވަމުންނެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ކޮމިޝަނަރ އޮފް ޕޮލިސް މުޙައްމަދު ޙާމީދު ވިދާޅުވީ، މިދިޔަ މަހުގެ 16 އިން ފެށިގެން ސިލްސިލާ ގޮތެއްގައި މާރާމާރީތަކެއް ހިންގަމުން އަންނަކަމަށެވެ. ތޫނު ހަތިޔާރު ބޭނުންކޮށްގެން ހިންގަމުން އަންނަ އެ މާރާމަރީތައް ގުޅިފައިވަނީ 4 ގޭންގަކާކަމަށް ކޮމިޝަނަރ ވިދާޅުވިއެވެ.
ރޭ މާލޭގެ ފިހާރައެއްގެ ތެރެއަށް ވަދެ ވަޅިން ވަޅިން މީހަކަށް ހަމަލާދިން މައްސަލައާއި ގުޅޭގޮތުން ކޮމިޝަނަރ އޮފް ޕޮލިސް ވިދާޅުވީ، ތަހްގީގް ވަރަށް ރަނގަޅސް ހިނގަމުންދާކަމަށެވެ. އަދިއ ެ މާރާމާރި ހިންގި މީހުން ދެނެގަތުމުގެ މަސައްކަތްކުރިއަށްދާކަން ކޮމިޝަނަރ ފާހަގަކުރެއްވިއެވެ. ރޭ މާލޭގެ ފިހާރައަކަށްވަދެ ހިންގި މިމާރާމާރީގައި ޒަޚަމްކޮށްލާފައިވަނީ އުމުރުން 30 އަހަރުގެ ދިވެހި ފިރިހެނަކަށް ކަމަށް ފުލުހުން ވިދާޅުވެއެވެ. އޭނާގެ ހާލު ސީރިއަސްކަމަށާއި، ފަރުވާދެމުން އަންނަނީ އައިސީޔޫގައި ވެންޓިލޭޓަރުގައިކަމަށް އައިޖީއެމްއެޗުން ވިދާޅުވެއެވެ.
މިދިޔަ ބުރާސްފަތި ދުވަހުގެ އިރުއޮއްސުނު ވަގުތު ހުޅުމާލޭގައި ހުންނަ 'ޖޫސް ޓައިމް'އަށް ގެއްލުންދިން މައްސަލައާއި ގުޅޭގޮތުން ކޮމިޝަނަރ ވިދާޅުވީ، އެ ކެފޭއަށް ގެއްލުން ދިންމީހުންގެ ސައިކަލު ހޯދާފައިވާކަމަށެވެ. އަދި އެ މައްސަލައާއި ގުޅޭ މީހަކު ހައްޔަރުކޮށްފައިވާކަމަށްވެސް ހަމީދު ވިދާޅުވިއެވެ. ހަމީދު ވިދާޅުވީ ހުޅުމާލޭގެ ކެފޭއަށް ގެއްލުން ދީފައިވަނީ ގޭންގެއްގައި ހިމެނޭ މީހެއްގެ މަންމަ ހިންގާ ކެފޭއެއްކަމަށްވާތީކަމަށެވެ.
ސީޕީ ވިދާޅުވީމާރާމާރީތައް ހިންގުމަށް ގޭންގުތަކުން މާލެ ތެރޭގައި ހަރަކާތްތެރިވަނީ ކާކުކަން ނޭނގޭގޮތަށް ހެލްމެޓު އަޅައިގެން މޫނު ނިވާކޮށްގެންކަމަށެވެ. އަދި އެމީހުން ދުއްވާ ސައިކަލާއި ކާރުތައްވެސް ހުންނަނީ ނަންބަރު ބޯޑު ޕްލޭޓްތައް ބަދަލުކޮށް ކެމެރާތަކަށްވެސް ނާރާގޮތަށްކަމަށެވެ.
""ރޭ ހިނގާފައިމިވަނީ ޖެނުއަރީ 16 އިން ފެށިގެން ގުޅިފައިވާ ސިލްސިލާ މާރާމާރީގެ ތެރެއިން. އެއާ ގުޅިފައިމިވަނީ އެންސީ ޕާކް ގޭންގާ ކުޑަހެންވޭރު ގޭންގު. މި ދެބައި މީހުންގެ މެދުގައި ހިނގައިގެން އުޅޭކަމެއް އެއީ. އެމައްސަލަތަކުގެ މައްޗަށް މި މާރާމާރީ ހިނގަނީ. އެކަންކަން ހުއްޓުވުމަށް އިތުރު ފިޔަވަޅު އެބަ އަޅަން. ފާހަގަކޮށްލަން ހެލްމެޓު އަޅަން މިޖެހެނީ 30 ކިލޯމީޓަރަށްވުރެ ބާރަށް ދުއްވަންޖެހޭ ސަރަހައްދުތަކުގަ. އެކަމު ހެލްމެޓު އަޅައިގެން މާލޭގެ އެކި ސަރަހައްދުތަކުގައި މޫނު ނޭނގޭގޮތަށް ކެމެރާތަކަށް މީހުން ނާރާގޮތަށް ނަންބަރު ޕްލޭޓްތައް ބަދަލުކޮށްގެން. ގޭންގުތައް ދުއްވާ ކާރުތަކަށް އަރައިގެން އެކަން ކުރަނީ. މިދަނީ އެކަމާއި ގުޅިގެން ފިޔަވަޅުތައް އަޅަމުން."ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވިއެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުގައި 'ޖޫސް ޓައިމް' އަށް ގެއްލުން ދީފައި ވަނީ ހެލްމެޓް އަޅާ މޫނު ނިވާކޮށްފައިވާ ދެ ފިރިހެނުންނެވެ. ޖޫސް ޓައިމަށް ވަތް މީހުން ވަނީ އެތަނުގެ ބިއްލޫރިތައް ތަޅާލައި އެތެރެއަށް ވަދެ އެތެރޭގައި ހުރި ތަކެއްޗަށް ވެސް ވަރަށް ބޮޑަށް ގެއްލުން ދީފައެވެ.
ކޮމިޝަނަރ އޮފް ޕޮލިސް ވަނީ، މާލެތެރޭގައި ހަރަކާތްތެރިވާ ނުރައްކާތެރި މީހުންނާމެދު ސަމާލުވުމަށް އިލްތިމާސްކުރައްވާފައެވެ. އަދި މާރާމާރިއާއި އެނޫންވެސް ކުށްތަކަށް ޝައްކުވާކަމެއް ހިނގާނަމަ ލަސްނުކޮށް ފުލުހުންނަށް ރިޕޯޓްކުރުމަށްވެސް ކޮމިޝަނަރ އިލްތިމާސްކުރެއްވިއެވެ.