ވެރިވެގަނެފައިވާ ފަލަސްޠީނުގެ ބިންތަކަށް އަރައި ހިންގަމުންދާ ލާއިންސާނީ އުދުވާންތަކުގައި 11 މީހުން ޝަހީދުކޮށްލުމަށް ފަހު، ޔަހޫދީ ޓެރެރިސްޓު އިސްރާޢީލުގެ ސިފައިން ޣައްޒާއަށް ބޮންއަޅަން ފަށައިފިއެވެ. ޔަހޫދީ ޓެރެރިސްޓު ސިފައިން އަރައި އުދުވާންތައް ހިންގަމުންދަނީ ހުޅަނގު އައްސޭރީގެ ނާބުލުސްގައެވެ.
މި އުދުވާންތަކުގައި ޝަހީދުކޮށްލާފައިވާ މީހުންގެ ޢަދަދު 11 އަށް އަރާފައިވާއިރު، 80 އަށް ގިނަ މީހުން ވަނީ ޒަޚަމުކޮށްލާފައެވެ. އެ އެންމެން ވެސް ޒަޚަމުވެފައި ވަނީ ޔަހޫދީ ސިފައިންގެ ބަޑީގެ ހަމަލާތަކުގައެވެ. އުދުވާންތަކުގައި ޝަހީދުކޮށްލާފައިވާ މީހުންގެ ތެރޭގައި 16 އަހަރުގެ ކުއްޖެއް ވެސް ހިމެނެއެވެ.
މި އުދުވާންތަކަކީ އިންސާނިއްޔަތާ ޚިލާފު ޖަރީމާއެއްގެ ގޮތުގައި ސިފަކުރައްވައި، ފަލަސްޠީނު ސަރުކާރުގެ އިސް އޮފިޝަލެއް ކަމުގައިވާ ޙުސައިން އަލް ޝައިޚް ވަނީ ފަލަސްޠީނުގެ ކުށެއް ނެތް ޢާންމު ރައްޔިތުންގެ ރައްކާތެރިކަން ކަށަވަރުކޮށްދިނުމަށް ބައިނަލްއަޤުވާމީ މުޖުތަމަޢަށް ގޮވައިލައްވާފައެވެ.
ޔަހޫދީ ޖައްބާރު ސިފައިން ނާބުލުސްއަށް އަރައި ހިންގާފައިވާ ލާއިންސާނީ އުދުވާންތަކުގެ ބަދަލުހިފުމުގެ ގޮތުން ފަލަސްޠީނުގެ މިނިވަންކަމަށް ޖިހާދުކުރަމުންދާ ޖަމާޢަތްތަކުގެ މުޖާހިދުން ވަނީ އިސްރާޢީލަށް އަމާޒުކޮށް ރޮކެޓު ހަމަލާތަކެއް ދީފައެވެ. އިސްރާޢީލަށް އަމާޒުކޮށް ޣައްޒާއިން ހަ ރޮކެޓު ފޮނުވައިލާފައިވާނެ ކަމުގައި އިސްލާމިކް ޖިހާދު ޖަމުޢިއްޔާއިން ބުނެއެވެ.
އެ ހަމަލާތަކުގެ ރައްދުގައި ޔަހޫދީ އިސްރާޢީލުގެ ވައިގެ ސިފައިން ވަނީ ޣައްޒާއަށް ބޮންއަޅަން ފަށާފައެވެ. މި ހަމަލާތައް އަމާޒުކޮށްފައި ވަނީ ޣައްޒާގައި ވެރިކަން ކުރާ ހަމާސް ޖަމާޢަތުން ހަތިޔާރު އުފައްދަން ބޭނުންކުރާ ކާރުޚާނާތަކަށް ކަމުގައި އިސްރާޢީލުން ބުންޏެވެ. އަދި، ހަމާސްގެ އަސްކަރީ ތަމްރީނުދޭ މަރުކަޒަކަށް ހަމަލާދީފައިވާ ކަމުގައި ވެސް ޔަހޫދީ އަސްކަރިއްޔާއިން ބުންޏެވެ.
މި ހަމަނުޖެހުންތަކާ ގުޅިގެން އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވަނީ ކަންބޮޑުވުން ފާޅުކުރައްވާފައެވެ. އަދި، ހަމަޖެހުން ގާއިމުކުރުމަށް ގޮވައިލައްވާފައެވެ. "އެންމެ މަތީ މަސްލަހަތަކީ ސުލްޙަ ޤާއިމުކުރުން. ހަމަލާތައް ބަދަލުކުރުން ހުއްޓައިލުން. އަދި ހަމަޖެހުން ޤާއިމުކުރުން،" ގުތެރޭޝް ވިދާޅުވިއެވެ.
ޔަހޫދީ ޖައްބާރު ސިފައިން ނާބްލުސްއަށް އަރާފައި ވަނީ، ފަލަސްޠީނުގެ މިނިވަންކަމަށް ޖިހާދު ކުރަމުންދާ މުޖާހިދުންގެ ޖަމާޢަތަކަށް ނިސްބަތްވާ ދެ މީހަކު ހައްޔަރު ކުރުމުގެ ނަމުގައެވެ. މި އުދުވާންތަކުގައި އެ ދެ މީހުން ވެސް ވަނީ ޝަހީދުކޮށްލާފައެވެ. އަދި، ނާބްލުސްއަށް ވަނުމުގެ ކުރިން، ޔަހޫދީ ޓެރެރިސްޓު ސިފައިން ވަނީ އެ ރަށަށް ވަދެނިކުމެވާން އޮތް ހުރިހާ މަގެއް ބަންދުކޮށްފައެވެ.
ޔަހޫދީ ޖައްބާރު ސިފައިން މި އަހަރުގެ މިހާތަނަށް ހިންގާފައިވާ ލާއިންސާނީ އުދުވާންތަކުގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު ވަނީ 60 އަށްވުރެ މައްޗަށް އަރާފައެވެ. މީގެ ތެރޭގައި 12 ކުޑަކުދިން ވެސް ހިމެނެއެވެ. އަދި، އުމުރުން ދުވަސްވީ އަންހެނެއް ވެސް ހިމެނެއެވެ. އެ އަންހެން މީހާ މަރައިލާފައި ވަނީ އަމިއްލަ ގޭގައި ޤުރުއާނުގެ އާޔަތްތައް ކިޔަވަން އިންދައެވެ.
ހުސްވި 2022 ވަނަ އަހަރަކީ ވެސް އިސްރާޢީލުގެ ލޭއޮހޮރުވުންތައް ގިނަ އަހަރެކެވެ. އެ އަހަރު ޝަހީދުކޮށްލާފައިވާ ފަލަސްޠީނުގެ ރައްޔިތުންގެ އަދަދު 171 އަށް އަރައެވެ. މީގެ ތެރޭގައި 30 އަށްވުރެ ގިނަ ކުށެއް ނެތް ކުޑަކުދިން ވެސް ހިމެނެއެވެ.