2015 ވަނަ އަހަރު މާޗް މަހުގެ 20 ވަނަ ދުވަހުގެރޭ ލ.މުންޑޫ ނޫވިލު، އަލީ ޒިޔަދަމް މަރާލި މައްސަލާގައި، ޤާތިލުންމަށް މަރުގެ އަދަބު ދިނުމަށް އޭނާގެ ވާރިޝުން ޝަރިޢަތުގައި އެދިއްޖެއެވެ.
ޒިޔަދަމް މަރުގެ މައްސަލާގައި ދައުލަތުން ދައުވާ އުފުލާފައިވަނީ ލ.މުންޑޫ މުހައްމަދު ޝަނޫންއާއި، އަލީ ސިފާމްގެ މައްޗަށެވެ. މިދެމީހުންގެ މައްޗަށްވެސް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މަރުގެ ދައުވާއެވެ. މީގެ އިތުރުން ޝަނޫންގެ މައްޗަށް ބިރު ދެއްކުމާއި މާރާމާރީ ހިންގުމުގެ ދައުވާވެސް ވަނީ އުފުލާފައެވެ. އޭގެތެރެއިން ޝަނޫންގެ މައްޗަށް ޒިޔަދަމް މަރާލުމުގެ ކުށް ސާބިތުވިއިރު، ސިފާމްގެ މައްޗަށް ވަނީ ޒިޔަދަމް މަރާލުމުގައި ބައިވެރިވުމުގެ ކުށް ސާބިތުވެފައެވެ.
މި މައްސަލާގައި ޒިޔަދަމް މަރާލުމުގެ ކުށް ސާބިތުވުމާއި ގުޅިގެން ވާރިސުންގެ ބަސް މިއަދު ވަނީ ނަގާފައެވެ. ޒިޔަދަމްގެ ބައްޕަ ހިމެނޭހެން 9 ވާރިސުން ވަނީ މަރަށް މަރު ހިފަން ބޭނުންވާކަމަށް ޝަރީޢަތުގައި ބުނެފައެވެ. އަދި ޒިޔަދަމްގެ މަންމަ ދުނިޔޭގައި ހުރިއިރު ފުލުހުންނަށް ދީފައިވާ ބަޔާނުގައި ވަނީ އޭނާވެސް ބޭނުންވަނީ މަރަށް މަރު ހިފަންކަމަށް ބުނެފައެވެ. ޒިޔަދަމް މަރާލިއިރު އޭނާގެ މަންމަ ދުނިޔޭގައި ހުއްޓެވެ.
މިއަދުގެ ޝަރީޢަތުގައި މައްސަލަ ބައްލަވާ ޤާޟީ އިސްމާޢީލް ޝަފީޢު ވަނީ، މި މައްސަލައިގެ އަދަބާއި ގބެހޭ ގޮތުން ވާހަކަ ދެއްކުމަށާއި، ހުކުމް ކުރުމުގެ އަޑުއެހުން ތަޢާވަލުކުރުމަށް ނިންމާފައިވަނީ އަންނަ އާދީއްތަ ދުވަހުގެ ހެނދުނު 10:30ގައިކަމަށް ވިދާޅުވެފައެވެ.
ޒިޔަދަމް މަރާލަފައި އޮއްވާ ފެނުނީ އެރަށު ވަގުތީހިޔާގޭ ބަދިގެތެރޭގައި އޮއްވައެވެ. ދައުލަތުން ކޯޓަށް ހުށަހެޅި މައްސަލާގައި ޒިޔަދަމް މަރާލާފައިވަނީ މަސްކަނޑާ ވަޅިއަކުން ބުރަކައްޓަށާއި، ފަލަމަސްގަނޑަށް ދިން ހަމަލާގެ ސަބަބުންކަމަށް ވަނީ ބުނެފައެވެ. މިމާރާމާރީގައި މަރުވި ޒިޔަދަމްއާއި، އޭނާ މަރާލި ކަމަށް ކުށްސާބިތުވި ޝަނޫންއާއި، ސިފާމްއަކީވެސް އެކީގައި އުޅުނު ތިން ރަށްޓެހިންކަމަށާއި ޒިޔަދަމް މަރާލި ރޭ ސިފާމްގެ ކޮއްކޮއާއި ދެމެދު ކޮންމެވެސް ވަރެއްގެ ހަމަނުޖެހުމެއް ހިނގާފައިވާކަމަށް ދައުލަތުން ބުނެފައިވެއެވެ.