ދަޢުވާ އުފުލާފައިވަނިކޮށް އިންޑިއާ މީހާ ފޮނުވާލާފައިވަނީ، އޭނާއާއި ގުޅޭ އެއްވެސް މައްސަލައެއް ކޯޓުގައި ކުރިއަށްދާކަން އެނގިފައިނުވާތީކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.
އެ އިދާރާއިން މިހެން ވިދާޅުވީ، ޖިންސީ ނިޔަތެއްގައި ކުޑަކުއްޖެއްގެ ގައިގައި އަތްލުމުގެ ދަޢުވާ ލިބުނު އިންޑިއާ މީހެއްގެ މައްސަލަ ހައި ކޯޓުގައި އިސްތިއުނާފުކޮށް އެ މައްސަލަ ފެށިއިރު، ދައުވާ ލިބޭ މީހާ ޑިޕޯޓް ކޮށްލާފައިވާކަމަށް ބުނާ މައްސަލައާއި ގުޅިގެންނެވެ.
މިކަމާއި ގުޅިގެން މޯލްޑިވްސް އިމިގްރޭޝަނުން ނެރުނު ބަޔާނެއްގައި ވަނީ، އިންޑިއާގެ ރައްޔިތެއްކަމުގައިވާ ރަމޭޝް ސެލްވަމޮނީ އަކީ ދިވެހިރާއްޖޭގެ އިމިގްރޭޝަންގެ ޤާނޫނާއި ޚިލާފްވުމުގެ ސަބަބުން ރާއްޖެއިން ފުރުވާލެވެންދެން އިމިގްރޭޝަންގެ ޑިޓެންޝަން ސެންޓަރުގައި 2022 ސެޕްޓެމްބަރ 25 އިން ފެށިގެން ބަހައްޓާފައިވާ މީހެއްކަމަށެވެ. އަދި އޭނާ މިދިޔަ ޑިސެމްބަރު 8 ވަނަ ދުވަހު ދިވެހިރާއްޖެއިން ޑީޕޯޓްކޮށްލުމާއި ހަމައަށްވެސް އޭނާއާ ގުޅޭ ޖިނާޢީ އެއްވެސް މައްސަލައެއް ދިވެހިރާއްޖޭގެ ކޯޓެއްގައި އިސްތިއުނާފު ކޮށްފައިވާކަން ޕްރޮސެކިއުޓަރ ޖެނެރަލް އޮފީހުން ރަސްމީ ސިފައެއްގައި އެ އިދާރާއަށް އަންގާފައިނުވާކަމަށެވެ.
ރަމޭޝް ރާއްޖެއިން ފުރުން މަނާކޮށް އެއްވެސް ކޯޓު ޢަމުރެއް އެ އިދާރާއަށް ލިބިފައި ނުވާކަމަށްވެސް އިމިގްރޭޝަނުން ވިދާޅުވިއެވެ.