ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރައްވުމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް، ރިޔާސީ ޓިކެޓް ރަސްމީކޮށް އަރުވައިފިއެވެ. އެމަނިކުފާނަށް އެމްޑީޕީގެ ރިޔާސީ ޓިކެޓް އަރުވާފައިވަނީ، ކާނިވާ ސަރަހައްދުގައި އެކަމަށްޓަކައި ބޭއްވި އެމްޑީޕީގެ ޖަލްސާގައެވެ.
އެމްޑީޕީގެ އިސް ބޭފުޅުންނާއި، އެ ޕާޓީގެ އެކި މަގާމްތަކުގައި ތިއްބަވާ ބޭފުޅުންގެ އިތުރުން، އެމްޑީޕީގެ ގިނަ ޢަދަދެއްގެ މެންބަރުން ބައިވެރިވި މި ޖަލްސާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ރިޔާސީ ޓިކެޓް ހަވާލުކޮށްދެއްވީ، އެޕާޓިގެ ޗެއަރޕާސަން ފައްޔާޟް އިސްމާޢީލެވެ.
އެމްޑީޕީގެ ރިޔާސީ ކެނޑިޑޭޓް ކަނޑައެޅުމަށް ބޭއްވި ޕްރައިމަރީ އޮތީ މިދިޔަމަހުގެ 28 ވަނަ ދުވަހުއެވެ. މި އިންތިހާބުގައި ރައީސް މުހައްމަދު ނަޝީދުގެ މައްޗަށް ކުރި ހޯއްދަވައި، ރައީސް ޞާލިހު ކާމިޔާބު ހޯއްދެވީ ބޮޑު ތަފާތަކުންނެވެ.
ޕްރައިމަރީގައި ރައީސް ޞާލިޙަށް 61 އިންސައްތަ ލިބިވަޑައިގެންފައިވާއިރު، އެއީ 24572 ވޯޓެވެ. ރައީސް ނަޝީދަށް ލިބިވަޑައިގަތީ 15631 ވޯޓާއެކު %39އެވެ.
ޕްރައިމަރީ ކާމިޔާބު ކުރެއްވުމަށްފަހު ރައީސް ޞާލިޙް ވިދާޅުވެފައިވަނީ ޕްރައިމަރީއަށްވުރެ ފަސޭހައިން މިއަހަރު ބާއްވާ ރިޔާސީ އިންތިޚާބު ކާމިޔާބުކުރައްވާނެކަމަށް ޔަޤީންކުރައްވާކަމަށެވެ.