ޗައިނާއާއި ރާއްޖެއާއި ދެމެދު އޮންއެރައިވަލް ވިސާ ދޭން ސޮއިކުރި އެއްބަސްވުމަށް ޢަމަލުކުރަން ފަށައި، އޮންއެރައިވަލް ވިސާ ދޭން ފަށައިފިއެވެ. މިއީ މިދިޔަ އަހަރު ރާއްޖެއާއި ޗައިނާއާއި ދެމެދު ވެފައިވާ ވިސާ ފްރީ އެއްބަސްވުމުގެ ދަށުން ކުރިއަށްގެންދާ މަސައްކަތެކެވެ. ނަމަވެސް ކޮވިޑްގެ ޙާލަތާ ގުޅިގެން މިހާތަނަށް އެ އެއްބަސްވުމަށް ޢަމަލުކުރުން އޮތީ ފަސްކޮށްފައެވެ.
ރާއްޖޭގައި ހުންނަ ޗައިނާ އެމްބަސީމް މިއަދު ކުރި ޓްވީޓެއްގައި ވަނީ އޮންއެރައިވަލް ވިސާ ދިނުމަށް ވެފައިވާ އެއްބަސްވުމަށް ރަސްމީކޮށް ޢަމަލުކުރަން ފަށާފައިވާކަމަށް ވިދާޅުވެފައެވެ. އެގޮތުން ޗައިނާގެ ރައްޔިތުންނާއި އަދި ދިވެހިންނަށް އެއްގައުމު އަނެއް ގައުމަށް ދަތުރުކުރާއިރު، 30 ދުވަހަށްވުރެ ދިގު ނޫން މުއްދަތުގެ އޮން އެރައިވަލް ވިސާ ލިބޭނެކަމަށް ޗައިނާ އެމްބަސީން ވިދާޅުވިއެވެ. މީގެތެރޭގައި ފަތުރުވެރިންނާ، ވިޔާފާރި އަދި އާއިލާއަށް ދަތުރުކުރާ މީހުންނާއި، ޓްރާންސިޓް ކުރާ މީހުންނަށްވެސް، ކުރިއާލައި ވިސާ ނަގަން ނުޖެހި އޮން އެރައިވަލް ވިސާ ލިބޭނެއެވެ.
ނަމަވެސް މަސައްކަތުގައާއި، ދިރިއުޅުން ބަދަލުކުރުމާއި، ނޫސްވެރިކަންކުރުން ފަދަ މަސައްކަތްތަކުގައި އެއްގައުމުން އަނެއް ގައުމަށް ދަތުރުކުރާ މިހުން ކުރިއާލައި ވިސާ ނަގަން ޖެހޭނެއެވެ. އަދި ހަމަކުރަންޖެހޭ ލިޔެކިޔުންތައް ހޯދަން ޖެހޭނެއެވެ.
2020ވަނަ އަހަރު ކުރިމަތިވި ކޯވިޑް19ގެ ޙާލަތާއެކު، ރާއްޖެއާއި ޗައިނާއާއި ދެމެދު ސީދާ ދަތުރުތައް ހުއްޓާލިއެވެ. ގާތްގަނޑަކަށް ތިން އަހަރުގެ މެދުކެނޑުމަކަށްފަހު، މިދިޔަ މަހު 18އިން ފެށިގެން ޗައިނާއިން ރާއްޖޭގެ އެއަރލައިންތަކުގެ ސީދާ ދަތުރުތައް ވަނީ ފަށާފައެވެ. އެންމެ ފުރަތަމަ ދުވަހުވެސް 198 ފަތުރުވެރިން އައިސްފައިވެއެވެ.
މި ފެށި އޮން އެރައިވަލް ވިސާއާއިއެކު އެންމެ ބޮޑު ލުއިފަސޭހައެއް ލިބޭނީ ފަތުރުވެރިންނަށެވެ.