ޔޫކްރެއިނުގެ އިރުމަތީގެ ސަރަޙައްދުތަކަށް އަތްގަދަކުރުމަށް ރަޝިޔާއިން ކުރަމުންދާ ހަނގުރާމައިގައި ބޮޑެތި ކުރިއެރުންތަކެއް ލިބިފައިވާ ކަމުގައި ރަޝިޔާއިން ބުނެފިއެވެ. އެ ޤައުމުގެ ދިފާޢީ ވުޒާރާއިން މިހެން ބުނެފައި މި ވަނީ، ޔޫކްރެއިނުގެ މިނިވަންކަން ދިފާޢުކުރުމަށް ހަނގުރާމަ ކުރަމުންދާ ސިފައިންނަށް ހަތިޔާރާއި އަސްކަރީ އެހީތެރިކަން އިތުރު ކުރުމަށް ނޭޓޯއިން މަޝްވަރާ ކުރަމުންދާ ދަނޑިވަޅެއްގައެވެ.
ރަޝިޔާ ސިފައިން ޔޫކްރެއިނަށް ފޮނުވައިގެން ހަނގުރާމަ ފަށާފައި ވަނީ 2022 ވަނަ އަހަރުގެ ފެބްރުވަރީ މަހުގެ 24 ވަނަ ދުވަހުއެވެ. މި ހަނގުރާމައަށް އެއް އަހަރު ފުރުމާ ގާތްވެފައިވާއިރު، ރަޝިޔާއިން ދަނީ ހަނގުރާމަ އިތުރަށް ވަރުގަދަ ކުރަން މަސައްކަތް ކުރަމުންނެވެ. 2022 ޑިސެންބަރުގެ ތެރޭގައި ރަޝިޔާއިން ވަނީ އިތުރު ސިފައިން ވެސް ޔޫކްރެއިނަށް ފޮނުވާފައެވެ.
ރަޝިޔާ ސިފައިން މިހާރު މަސައްކަތް ކުރަމުންދަނީ ޔޫކްރެއިނުގެ އިރުމަތީގައި ދޮންބާސް އެ މީހުންގެ ކޮންޓްރޯލްގެ ދަށަށް ގެންދާށެވެ. ނަމަވެސް، އެ ސަރަޙައްދު ދިފާޢުކުރަން ޔޫކްރެއިނުގެ ސިފައިން ދަނީ މަސައްކަތް ކުރަމުންނެވެ. ދޮންބާސްގައި ހިމެނޭ ލުހާންސްކްގެ ސަރަޙައްދުތަކުގައި ހަނގުރާމަ ކުރަމުންދާ ޔޫކްރެއިން ސިފައިންގެ މައްޗަށް ކުރިއެރުންތަކެއް ހޯދިފައިވާ ކަމުގައި ރަޝިޔާގެ ދިފާޢީ ވުޒާރާއިން ބުނެއެވެ.
ލުހާންސްކްގައި ތިބި ޔޫކްރެއިން ސިފައިންގެ ފައުޖުތައް ފަހަތަށް ޖައްސައި، 3 ކިލޯމީޓަރުގެ ސަރަޙައްދެއް ހިފާފައިވާ ކަމުގައި ރަޝިޔާގެ ދިފާޢީ ވުޒާރާއިން ބުންޏެވެ. އަދި، ލުހާންސްކްގެ ބޮޑު ބަޔަކަށް އަތްގަދަކުރަން މަސައްކަތް ކުރަމުންދާ ކަމުގައި ވެސް އެ ވުޒާރާއިން ބުންޏެވެ. ނަމަވެސް، އެއީ ލުހާންސްކްގެ ކޮން ސަރަޙައްދެއް ކަން ސާފުކޮށްދީފައެއް ނުވެއެވެ.
މި ކަމާ ގުޅިގެން ޔޫކްރެއިނުގެ ދިފާޢީ ވަޒީރުގެ ނައިބު ހެނާ މަލްޔާރް ވިދާޅުވީ، ލުހާންސްކްގައި ތިބި ޔޫކްރެއިނުގެ ފައުޖުތަކަށް ރަޝިޔާއިން ވަރުގަދަ ހަމަލާތަކެއް ދެމުންދާ ކަމުގައެވެ. ނަމަވެސް، ރަޝިޔާގެ ފައުޖުތަކަށް ދޫދިނުމެއް ނެތި، އެ ސަރަޙައްދު ދިފާޢު ކުރުމުގައި ޔޫކްރެއިނުގެ ސިފައިން ދެމިތިބި ކަމުގައި އޭނާ ވިދާޅުވެއެވެ. އަދި، ލުހާންސްކްގެ ބައެއް ސަރަޙައްދަކަށް ރަޝިޔާއިން އަތްގަދަކޮށްފައިވާ ކަން އޭނާ ކަށަވަރުކޮށްދެއްވާފައެއް ނުވެއެވެ.
ވެރިރަށް ކީވްއަށް ހަމަލާދިނުމަށް ރަޝިޔާއިން އަނެއްކާ ވެސް ތައްޔާރުވަމުންދާ ކަމަށް ބެލެވޭ ކަމުގައި ޔޫކްރެއިނުގެ އޮފިޝަލުން ވިދާޅުވެއެވެ. އެ ކަމަށް ތައްޔާރުވުމުގެ ގޮތުން ޖާސޫސް ކުރުމަށް ރަޝިޔާއިން ހަ ޖާސޫސީ ބެލޫން ކީވްގެ ސަރަޙައްދަށް ފޮނުވި ކަމަށާއި، އެ ތަކެއްޗަށް ހަމަލާދީ ވައްޓައިލާފައިވާނެ ކަމުގައި ކީވްގެ އޮފިޝަލުން ވިދާޅުވެއެވެ.
ލުހާންސްކާ ޖެހިގެން އޮންނަ ޑޮނެޓްސްކްގެ ރަށެއް ކަމުގައިވާ ބަޚްމުތް ހިފުމަށް ވެސް ރަޝިޔާ ސިފައިން ދަނީ މަސައްކަތް ކުރަމުންނެވެ. ނަމަވެސް، އެ ރަށް ހިފުމަށް ރަޝިޔާއިން މީގެ އެތަކެއް މަހެއް ކުރިން ފެށި އަސްކަރީ ކެމްޕޭން އަދި ކާމިޔާބު ކުރެވިފައެއް ނުވެއެވެ. ބަޚްމުތް ވަށައިގެން އޮންނަ 15 އަވަށަކަށް ރަޝިޔާއިން ވަރުގަދަ ހަމަލާތަކެއް ދެމުންދާ ކަމުގައި ޔޫކްރެއިނުގެ އަސްކަރިއްޔާއިން ބުނެއެވެ.
މީގެ ތެރެއިން ބަޚްމުތްގެ ހުޅަނގުދެކުނުން އޮންނަ ޕޮކްރޮވްކްސްއަށް ދިން ހަމަލާތަކެއް ޢާންމުން ދިރިއުޅޭ ޢިމާރާތަކަށް އަރައި، ޢާންމުންގެ ތިން މީހުން މަރުވިއެވެ. އެ ހާދިސާގައި 11 މީހަކު ޒަޚަމުވެފައިވާއިރު، މީގެ ތެރެއިން އެކެއްގެ ހާލު ސީރިޔަސް ކަމަށާއި، ހޮސްޕިޓަލުގައި އެޑްމިޓުކޮށްގެން ފަރުވާދެމުންދާ ކަމުގައިވާ ޑޮނެޓްސްކުގެ ގަވަރުނަރު ޕަވްލޯ ކިރިލެންކޯ ވިދާޅުވިއެވެ.
ބަޚްމުތް ކޮންޓްރޯލް ކުރުމަކީ ރަޝިޔާއަށް މުހިންމު ކަމެކެވެ. އެ ރަށް ކޮންޓްރޯލް ކުރެވިއްޖެ ނަމަ، ޑޮނެޓްސްކުގެ ހުޅަނގުގައި އޮންނަ ބޮޑު ދެ ރަށް ކަމުގައިވާ ކްރެމަޓޮރްސްކާއި ސްލޮވިއާންސްކް ހިފުމަށް ރަޝިޔާ ސިފައިންނަށް ފަސޭހަވާނެ ކަމަށް މަސްރަޙު ދިރާސާ ކުރާ ފަރާތްތަކުން ބުނެއެވެ. އަދި، ހަނގުރާމައިގައި އިތުރު ކުރިއެރުންތަކެއް ހޯދުމުގެ ފުރުޞަތު ލިބިގެންދާނެ ކަމަށް ވެސް އެ ފަރާތްތަކުން ގަބޫލުކުރެއެވެ.
ރަޝިޔާއިން ޔޫކްރެއިނުގައި ހަނގުރާމަ ފެށި ފަހުން، ޔޫކްރެއިނަށް އަސްކަރީ އެހީގެ ގޮތުގައި ނޭޓޯގެ ޤައުމުތަކުން ވަނީ އެތަކެއް ބިލިޔަން ޑޮލަރުގެ ސާމާނު ފޮނުވާފައެވެ. އެމެރިކާއިން އެކަނިވެސް 27.4 ބިލިޔަން ޑޮލަރުގެ ހަތިޔާރާއި އަސްކަރީ ސާމާނު ފޮނުވާފައިވެއެވެ. ނޭޓޯގެ ސެކްރެޓަރީ ޖެނެރަލް ޔެންސް ސްޓޮލްޓެންބަރގް ވިދާޅުވީ، ހަތިޔާރު އުފެއްދުން ނޭޓޯގެ ޤައުމުތަކުން އިތުރުކޮށްފައިވާ ކަމަށާއި، ޔޫކްރެއިން ސިފައިންނަށް އިތުރު ހަތިޔާރު ފޯރުކޮށްދޭން އެ ޤައުމުތަކުން މަޝްވަރާ ކުރަމުންދާ ކަމުގައެވެ.