ގިނަ ޢަދަދެއްގެ ރޮހިންޔާ މުސްލިމުންނާ އެކު ދަތުރުކުރަމުންދިޔަ ބޯޓެއް އިންޑޮނީޝިޔާގެ ހުޅަނގު އައްސޭރިފަށުގެ ރަށަކަށް ޖައްސައިފިއެވެ. އެ ބޯޓުގައި ތިބި 69 މީހުންގެ ތެރޭގައި ގިނައީ އަންހެނުންނާއި ކުޑަކުދިން ކަމުގައި އ.ދ.ގެ ރެފިޔުޖީންނާ ބެހޭ އިދާރާ (ޔޫ.އެން.އެޗް.ސީ.އާރް)އިން ބުނެއެވެ.
އެ ބޯޓު ޖައްސާފައި ވަނީ އެ ޤައުމުގެ ހުޅަނގުގައި އޮންނަ އަޗޭ ޕުރޮވިންސުގެ ރަށަކަށެވެ. އެ ބޯޓުން ދަތުރުކުރި މީހުންނަށް ބޭސްފަރުވާދީ، އެހީ ފޯރުކޮށްދިނުމަށް އަޗޭގެ އޮފިޝަލުން މަސައްކަތް ކުރަމުންދާއިރު، ބޯޓުގައި ދަތުރުކުރި ހަތް މީހުން ކަނޑުމަތީގައި މަރުވެފައިވާ ކަމުގައި ޔޫ.އެން.އެޗް.ސީ.އާރް.ގެ އޮފިޝަލެއް ކަމުގައިވާ އޮކްޓީނާ ހަފާންޓީ ވިދާޅުވިއެވެ. އަދި، އިންޑޮނީޝިޔާއަށް ބަނދަރުކުރުމުގެ ކުރިން ބޯޓުން ކާބޯތަކެތި ހުސްވެފައިވާ ކަމަށް ވެސް އޭނާ ވިދާޅުވިއެވެ.
ބޯޓުގައި ދަތުރުކުރި މީހުން ރެފިޔުޖީ ކޭމްޕަކަށް ގެންދިޔުމުގެ މަސައްކަތް މިހާރު ދަނީ ކުރަމުންނެވެ. މިއީ، 2022 ވަނަ އަހަރުގެ ނޮވެންބަރު މަހަށް ފަހު ރޮހިންޔާ މުސްލިމުން ގޮވައިގެން އިންޑޮނީޝިޔާއަށް ދަތުރުކޮށްފައިވާ ހަވަނަ ބޯޓެވެ. މި ބޯޓުގައި ދަތުރުކުރި މީހުންނަކީ، ބަންގްލަދޭޝުން ފުރި ބަޔެއް ކަމަށް ޔޫ.އެން.އެޗް.ސީ.އާރް.އިން ބުނެއެވެ. ބޯޓު ފުރާފައި ވަނީ މީގެ ދެ ހަފުތާއެއްހާ ދުވަސް ކުރިންނެވެ.
ބަންގްލަދޭޝްގައި މިލިޔަނަކަށްވުރެ ގިނަ ރޮހިންޔާ ރެފިޔުޖީން ދިރިއުޅެމުންދާ ކަމަށް އ.ދ.ގެ ތަފާސްހިސާބުތަކުން ދައްކައެވެ. އޭގެ ތެރެއިން ގިނަ މީހުންނަކީ، މިޔަންމާގެ ސަރުކާރުން އެ މީހުންނާ ދެކޮޅަށް ހިންގަމުންދިޔަ ލާއިންސާނީ ޖަރީމާތަކުން ސަލާމަތްވުމަށް 2017 ވަނަ އަހަރު ބަންގްލަދޭޝަށް ހިޖުރަކުރި މީހުންނެވެ. ނަމަވެސް، ބަންގްލަދޭޝްގައި ވެސް އެ މީހުން ދިރިއުޅެމުން ދަނީ ވަރަށް ދަތި ހާލުގައެވެ.
ބަންގްލަދޭޝްގައި ތިބި ރޮހިންޔާ ރެފިޔުޖީންގެ ތެރެއިން ގިނަ ޢަދަދެއްގެ ބަޔަކު، މެލޭޝިޔާއާއި އިންޑޮނީޝިޔާއަށް ދަތުރުކުރުމަށް ދަނީ މަސައްކަތް ކުރަމުންނެވެ. އެ ދަތުރު ކުރުމަށް އެ މީހުން ބޭނުންކުރަނީ، ބައުވެފައިވާ ލަކުޑި ބޯޓުފަހަރެވެ. އެ ދަތުރު ކުރުމުގެ ތެރޭގައި ގިނަ ޢަދަދެއްގެ ބަޔަކު ވަނީ ކަނޑުވެ، މަރުވެފައެވެ.
ހުސްވި 2022 ވަނަ އަހަރުގެ ނޮވެންބަރާއި ޑިސެންބަރު މަހުގެ ތެރޭގައި މި ފަދަ ފަސް ބޯޓެއް އިންޑޮނީޝިޔާއަށް ދަތުރުކޮށްފައިވާއިރު، އޭގައި 700 އަށްވުރެ ގިނަ ރޮހިންޔާ މުސްލިމުން އެ ޤައުމަށް ހިޖުރަކޮށްފައިވެއެވެ. ނަމަވެސް، މިއީ އެ އަހަރުގެ ތެރޭގައި މި ދަތުރު ފެށި 2,000 އަށްވުރެ ގިނަ މީހުންގެ ތެރެއިން މަދު ޢަދަދެކެވެ.
2021 ވަނަ އަހަރު ވެސް 2,000 އަށްވުރެ ގިނަ ރޮހިންޔާ މުސްލިމުން އިންޑޮނީޝިޔާއަށް ދަތުރުކުރަން މަސައްކަތް ކޮށްފައިވާ ކަމުގައި އ.ދ.އިން ބުނެއެވެ. އަދި، އޭގެ ތެރެއިން 200 އަށްވުރެ ގިނަ މީހުން ވަނީ ކަނޑުމަތީގައި މަރުވެފައެވެ.