ދިވެހި ދައުލަތަށް ޚިދުމަތްކުރުމުގެ އިނާމް 86 ފަރާތަކަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ދެއްވައިފިއެވެ.
ދަރުބާރުގޭގައި ބޭއްވި ރަސްމިއްޔާތެއްގައި ދައުލަތަށް ޚިދުމަތް ކުރުމުގެ އިނާމް ރައީސުލްޖުމްހޫރިއްޔާ ދެއްވީ 2022 ވަނަ އަހަރު މިއިނާމަށް ނަން ހުށަހެޅުއްވި ފަރާތްތަކުގެ ތެރެއިން އިނާމު ދެއްވުމަށް ކަނޑައެޅުއްވި މީހުންނަށެވެ. މިއިނާމް ލިބުނު ފަރާތްތަކަށް ޝަރަފުގެ ބެޖާއި ޝަރަފުގެ އައްޑަނަ ވަނީ ދެއްވާފައެވެ.
ދައުލަތަށް ޚިދުމަތް ކުރުމުގެ އިނާމަކީ، 2021 ވަނަ އަހަރު ތަޢާރަފު ކުރެއްވި އިނާމެކެވެ. މިއީ، ދިވެހި ދައުލަތަށް 35 އަހަރަށްވުރެ ދިގު މުއްދަތަކަށް ޚިދުމަތް ކޮށްފައިވާ މުވައްޒަފުންގެ ތެރެއިން، މަގާމުގެ މަސްއޫލިއްޔަތު އަދާކުރުމުގައި ޤާބިލުކަމާއި އިޚްލާޞްތެރިކަމާއެކު ކޮށްފައިވާ ޚިދުމަތްތަކަށާއި، އެ މުއައްސަސާއެއްގެ ކުރިއެރުމަށް ކޮށްދީފައިވާ ޚިދުމަތްތަކުގެ އަގުވަޒަންކުރުމުގެގޮތުން ޤައުމީ ފެންވަރުގައި ދިވެހި ދައުލަތުން ރައީސުލްޖުމްހޫރިއްޔާ ދެއްވާ އެންމެ ޝަރަފުވެރި އިނާމެވެ.
މިއިނާމު ދިނުމުގައި ޤައުމީ އިނާމާބެހޭ ކޮމިޓީން ބަލާފައިވާ ކަންކަމުގެ ތެރޭގައި، މަގާމުގެ މަސްއޫލިއްޔަތު އަދާކުރުމުގައި، ޤާބިލުކަމާއި، ފަރުވާތެރިކަމާއި، އިޚްލާޞްތެރިކަމާއެކު ކޮށްފައިވާ މަސައްކަތްތަކާއި، އެމީހަކަށް ލިބިފައިވާ ޤާބިލުކަމެއް ބޭނުންކޮށްގެން މުޅި މުއައްސަސާގެ ކުރިއެރުމަށް ކޮށްފައިވާ ފާހަގަކުރެވޭ ޚާއްޞަ މަސައްކަތްތައް ހިމެނެއެވެ. އަދި އެ މުއައްސަސާއިން ހިންގާފައިވާ އެކިއެކި ކަންކަމުގައި ޢަމަލީގޮތުން ބައިވެރިވެ ޚިދުމަތް ކޮށްފައިވާ މިންވަރާއި، ވަޒީފާގެ ދާއިރާއިން ހާސިލުކޮށްފައިވާ ކާމިޔާބީއަށްވެސް ބައްލަވާފައިވެއެވެ. އަދި އެމީހެއްގެ މައްޗަށް މަދަނީ އަދި ޖިނާއީ ކުށެއްގެ ތުހުމަތެއް ކުރެވިފައިވާކަން ނުވަތަ ނޫންކަންވެސް ކޮމިޓީންވަނީ ޔަޤީން ކުރައްވާފައެވެ.
ދައުލަތަށް ޚިދުމަތް ކުރުމުގެ އިނާމް 2021 ވަނަ އަހަރު ދެއްވަން ފެއްޓެވިއިރު އެއަހަރު މިއިނާމް 223 ފަރާތަކަށް ލިބިވަޑައިގެންނެވިއެވެ. އެހެންކަމުން މިއިނާމް އެއަހަރު ދެއްވީ ދެފަހަރެއްގެ މަތިންނެވެ. އެގޮތުން ޖުމްހޫރި ދުވަހުގެ ޖަލްސާގައި 117 ފަރާތަކަށް އަދި އެއްބައިވަންތަކަމުގެ ދުވަހުގެ ޖަލްސާގައި މިއިނާމް 106 ފަރާތަކަށްވަނީ ދެއްވާފައެވެ. ދިމާވި އެކި ސަބަބުތަކާހުރެ މިދިޔަ އަހަރު މިއިނާމުތައް ދެވޭގޮތް ނުވުމުން، މި އަހަރަށް ފަސްކޮށް މިއަހަރު މިއިނާމް 86 ފަރާތަކަށް ރައީސުލްޖުމްހޫރިއްޔާ ވަނީ ދެއްވާފައެވެ.
މިފަހަރު އިނާމް ލިބުނު ފަރާތްތަކުގެ ތެރޭގައި ބައި ޤަރުނަށްވުރެ ދިގު މުއްދަތެއްގައި ދައުލަތަށް ޚިދުމަތް ކުރެއްވި ފަރާތަކާއި، ބައި ޤަރުނާ ކައިރި މުއްދަތަކަށް ޚިދުމަތް ކުރެއްވުމަށްފަހު ރިޓަޔަރ ކުރެއްވި ފަރާތެއް ހިމެނެއެވެ.
އިނާމް ދެއްވުމުގެ ޖަލްސާގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައިވަނީ އިނާމް ލިބުނު ހުރިހާ ފަރާތްތަކަށް ތަހުނިޔާ ދަންނަވާފައެވެ.
ރައީސުލްޖުމްހޫރިއްޔާ ވިދާޅުވީ އިނާމް ލިބުނު ފަރާތްތަކުން ދިވެހި ދައުލަތަށާއި ދިވެހި ރައްޔިތުންނަށް އެ ކޮށްދެއްވީ، ވަރަށް އިޚްލާޞްތެރި ޚިދުމަތްތަކެ ކަމަށެވެ. އަދި ކޮންމެ މަޤާމެއްގައި ހުންނެވި ނަމަވެސް، މަޤާމުގެ ވާޖިބުތައް އަދާކުރެއްވުމުގައި ފަސްޖެހުމެއް ނެތި، ވަފާތެރިކަމާއެކު ކޮށްދެއްވި ޚިދުމަތްތަކަކަށްވާތީ، ޤައުމީ ޚިދުމަތުގެ ތަރާދުގައި އެއީ، ވަރަށް ބުރަދަން ހުރި ޚިދުމަތްތަކެއް ކަމަށް ރައީސް ވިދާޅުވިއެވެ.
ދައުލަތަށް ޚިދުމަތް ކުރުމުގެ އިނާމް ދެއްވަނީ ދައުލަތުގެ މުއައްސަސާއެއްގައި ނުވަތަ ސަރުކާރުގެ ކުންފުންޏެއްގައި ނުވަތަ ސަރުކާރުގެ މެޖޯރިޓީ ހިއްސާ އޮތް ކުންފުންޏެއްގައި ޚިދުމަތްކުރި ނުވަތަ ޚިދުމަތްކުރާ މުވައްޒަފެއްގެ ނަން، އެ މުއައްސަސާއަކުން ނުވަތަ އެ ކުންފުންޏަކުން ނުވަތަ އެހެން ފަރާތަކުން ނުވަތަ އެ މުވައްޒަފު އަމިއްލައަށް އިނާމަށް ނަން ހުށަހެޅުމުންނެވެ.