1444 ވަނަ އަހަރުގެ ރަމަޟާން މަހު މިސްކިތްތަކުގައި ތަރާވީހް ނަމާދު ކުރުމަށް ރާއްޖެއިން ބޭރުން ހާފިޒުން ގެނައުމަށް ވިސާއަށް އެދި ހުށަހެޅުމުގެ ފުރުސަތު މޯލްޑިވްސް އިމިގްރޭޝަނުން ހުޅުވާލައިފިއެވެ.
އިމިގްރޭޝަނުން ކުރި އިޢުލާނެއްގައިވަނީ ހާފިޒުން ގެނައުމަށް އިސްލާމިކް މިނިސްޓްރީން ހުއްދަ ދޫކޮށްފައިވާ ފަރާތްތަކުން ރާއްޖެ ގެނައުމަށް ބޭނުންވާ ހާފިޒުންގެ ވިސާއަށް އެދި ހުށަހެޅުމުން، ޝަރުތު ހަމަވެ، ހުއްދަ ދޭ ފަރާތްތަކަށް، އެމީހުން ރާއްޖެ އަންނަ ތާރީޚުން ފެށިގެން 45 ދުވަހުގެ "ސްޕެޝަލް ވިސާ" ދޫކުރުމަށް ހަމަޖެހިފައިވާ ކަމަށެވެ.
އަދި މިސްކިތްތަކުގައި ހިފްޒުކޮށް ތަރާވީހް ނަމާދުކުރުމަށް ރާއްޖެއިން ބޭރުން ހާފިޒުން ގެނައުމަށް އެދޭ ފަރާތްތަކުން، އިމިގްރޭޝަންގެ އޮންލައިން ޕޯޓަލް މެދުވެރިކޮށް ސްޕެޝަލް ވިސާއަށް އެދި ހުށަހެޅުމަށް ވަނީ ހުޅުވާލާފައެވެ.
އެޕްލިކޭޝަން ހުށަހެޅުމުން، ހުއްދަ ދޭ ފަރާތްތަކަށް އެޕްލިކޭޝަން ހުށަހަޅާ ތާރީޚުން ފެށިގެން 7 ދުވަހުގެ ތެރޭގައި އިމިގްރޭޝަންގެ "އިމުގާ" ޕޯޓަލް މެދުވެރިކޮށް އަންގާނެކަމަށް އިމިގްރޭޝަނުން ވިދާޅުވެއެވެ. ހުއްދަ ދޭ ފަރާތްތައް ރާއްޖޭގައި ހޭދަކުރާ މުއްދަތުގައި އެފަރާތްތަކުގެ ވިސާގެ ކަންކަން ގަވާއިދާ އެއްގޮތަށް ފުރިހަމަ ކުރުމަކީ އެފަރާތްތައް ރާއްޖެ ގެނައުމަށް އިސްލާމިކް މިނިސްޓްރީން ދޫކޮށްފައިވާ ހުއްދަ ލިބިފައިވާ ފަރާތުގެ ޒިންމާއެއް ކަމަށް އިމިގްރޭޝަނުން ވިދާޅުވެއެވެ
މީގެއިތުރުން، ދޫކުރާ ވިސާގެ މުއްދަތު ހަމަވުމުގެ ކުރިން އެފަރާތްތައް ރާއްޖެއިން ފުރުވާލުމުގެ އިންތިޒާމް ހަމަޖެއްސުމަކީވެސް ހުއްދަ ލިބިފައިވާ ފަރާތުގެ ޒިންމާއެކެވެ.
އަދި ބިދޭސީންނަށް ދޫކުރުމަށް ހަމަޖެހިފައިވާ "ސްޕެޝަލް ވިސާ" އާއި "ސްޕޮންސަރޝިޕް ޑެކްލެރޭޝަން" އެ މުއައްސަސާ އިން އެޕްރޫވްކުރުމުގެ ކުރިން މިއިން އެއްވެސް ފަރާތަކުން ރާއްޖެ އައުމަށް ދަތުރު ނުފެށުމަށްވެސް އިމިގްރޭޝަނުން ވަނީ އިލްތިމާސްކުރައްވާފައެވެ.