ޏ.ފުވައްމުލަކު މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޛު އަޙްމަދު އަކްރަމް 7ދުވަހަށް ސަސްޕެންޑްކުރުމަށް ޖުޑީޝަލް ސާރވިސް ކޮމިޝަން، ޖޭއެސްސީން ނިންމައިފިއެވެ.
ޖޭއެސްސީން ވިދާޅުވީ، ޏ.ފުވައްމުލަކު މެޖިސްޓްރޭޓް ކޯޓުގެ ޤަޟިއްޔާއެއްގައި މެޖިސްޓްރޭޓް އަލްއުސްތާޛު އަޙްމަދު އަކްރަމް ޙުކުމްކޮށް 10 ނުކުތާއެއްގެ މައްޗަށް އެކުލެވޭ ޚުލާސާ ރިޕޯޓެއް ދަޢުވާގައި ހިމެނޭ ފަރާތްތަކަށް ދޫކުރުމުން، އެ ޚުލާސާ ރިޕޯޓުގެ މައްޗަށް ބިނާކޮށް 2020 ފެބްރުއަރީ 19 ގައި ޕްރޮސިކިއުޓަރ ޖެނެރަލްގެ އޮފީހުން އެ ޤަޟިއްޔާ އިސްތިއުނާފު ކުރުމަށް ޏ.ފުވައްމުލަކު މެޖިސްޓްރޭޓް ކޯޓަށް ހުށަހެޅިކަމަށެވެ.
ނަމަވެސް ފުވައްމުލަކު މެޖިސްޓްރޭޓް ކޯޓުން ދިވެހިރާއްޖޭގެ ހައިކޯޓަށް ފޮނުވާފައިވަނީ ޕްރޮސިކިއުޓަރ ޖެނެރަލްގެ އޮފީހުން ޏ.ފުވައްމުލަކު މެޖިސްޓްރޭޓް ކޯޓަށް ހުށަހެޅި އިސްތިއުނާފީ ލިޔެކިޔުމުގައި ހިމެނޭ ޚުލާސާ ރިޕޯޓުގެ ބަދަލުގައި، އެ ރިޕޯޓުގައި ނުހިމެނޭ އިތުރު ނުކުތާތަކެއް އިތުރުކޮށްފައިވާ ޚުލާސާ ރިޕޯޓެއްކަމަށް ޖޭއެސްސީން ވިދާޅުވިއެވެ. މިޤަޟިއްޔާގައި ޙުކުމްކޮށް ޚުލާސާ ރިޕޯޓު ދޫކުރިފަހުން، ޙުކުމް ކުރި ޝަރީޢަތުގެ މަޖިލީހުގައިވެސް މެޖިސްޓްރޭޓް އަލްއުސްތާޛު އަޙްމަދު އަކްރަމް ފާހަގަކޮށްފައިނުވާ އިތުރު ނުކުތާތަކެއް ޚުލާސާ ރިޕޯޓަށް އިތުރުކުރުމަކީ މެޖިސްޓްރޭޓް އަލްއުސްތާޛު އަޙްމަދު އަކްރަމް އިއްވި ޙުކުމަށް ނުވަތަ ޙުކުމަށް ވާސިލުވި ނުކުތާތަކަށް ފަހުން ބަދަލު ގެނައުންކަމަށް ޖޭއެސްސީން ވިދާޅުވިއެވެ.
މިއީ ކަނޑައެޅިގެން ޤާނޫނާ ޚިލާފު ކަމެއްކަމާއި، ޏ.ފުވައްމުލަކު މެޖިސްޓްރޭޓް ކޯޓަށް ހުށަހެޅި އިސްތިއުނާފީ ލިޔެކިޔުމަށް ބަދަލުގެނެސް ޕްރޮސިކިއުޓަރ ޖެނެރަލްގެ އޮފީހުން ހުށަނާޅާ ލިޔުމެއް، އެ އޮފީހުން ހުށަހެޅި ލިޔުމެއްގެ ގޮތުގައި ދިވެހިރާއްޖޭގެ ހައިކޯޓަށް ފޮނުވުމާއި، ޕްރޮސިކިއުޓަރ ޖެނެރަލް އޮފީހުން ހުށަހެޅި ލިޔުމެއް ދިވެހިރާއްޖޭގެ ހައިކޯޓަށް ނުފޮނުވާ ބޭއްވުމަކީ ޕްރޮސިކިއުޓަރ ޖެނެރަލް އޮފީހުގެ ލިޔެކިޔުމަށް ބަދަލުގެނަސް ހަގީގަތް އޮޅުވާލުންކަން ސާބިތުވާކަމަށް ޖޭއެސްސީން ވިދާޅުވިއެވެ.
މެޖިސްޓްރޭޓް އަލްއުސްތާޛު އަޙްމަދު އަކްރަމްގެ މި ޢަމަލަކީ، ދިވެހިރާއްޖޭގެ ފަނޑިޔާރުންގެ ޤާނޫނޫނާއި، ޖުޑީޝަލް ސަރވިސް ކޮމިޝަންގެ ޤާނޫނާއި ޚިލާފަށްކޮށްފައިވާ ޢަމަލެއްކަމަށް ޖޭއެސްސީން ވިދާޅުވިއެވެ. އެހެންކަމުން މުސާރައާއި ޢިނާޔަތްތައް ނުލިބޭ ގޮތަށް މެޖިސްޓްރޭޓް އަލްއުސްތާޛު އަޙްމަދު އަކްރަމް މިއަދުން ފެށިގެން ވަޒީފާގެ މަސައްކަތަށް ނުކުތުން7 ދުވަހަށް މަނާކުރުމަށް އެ ކޮމިޝަނުން ނިންމެވީކަމަށް ޖޭއެސްސީން ވިދާޅުވިއެވެ.