މިނިސްޓްރީ އޮފް ޓްރާންސްޕޯޓްގެ ޚިދުމަތްތައް އެހެން އިމާރާތަކަށް ބަދަލުކުރުމަށް ކުރާ މަސައްކަތުގައި އީ.ޕޯޓަލް މެދުވެރިކޮށް އެ އިދާރާއިން ދޭ ޚިދުމަތްތައް މެދުކެނޑުނު ނަމަވެސް، "ސިމްސް ޕޯޓަލް" މެދުވެރިކޮށް ލައިސަންސާއި ގުޅޭ ޚިދުމަތްތައް އޮންލައިންކޮށް ހޯދޭނެކަމަށް މިނިސްޓްރީއީން ވިދާޅުވެއްވެއްޖެއެވެ.
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޚިދުމަތްތައް ބަދަލުކުރަނީ ސަރުކާރުން ހުޅުމާލޭގައި އަލަށް ހުޅުވި އޮފީސް އިމާރާތަށެވެ. މިިނިސްޓްރީއިން ވިދާޅުވީ މި މަސައްކަތްތައް ކުރުމަށްޓާކާއި، ބުރާފަތި ދުވަހުގެ މެންދުރު 14:00އިން ފެށިގެން އަންނަ އާދިއްޔަ ދުވަހުގެ 08:00އަށް މިނިސްޓްރީގެ ސަރވަރތައް ޑައުންކޮށް، އީ.ޕޯޓާލް މެދުވެރިކޮށް ދޭ ޚިދުމަތްތައް މެދުކެނޑޭނެކަމަށެވެ.
ނަމަވެސް މިނިސްޓްރީން އަލަށް ފެށި "ސިމްސް ކަސްޓަމަރ ޕޯޓަލް"އިން ދެމުންދާ ލައިސަންސާއި ގުޅޭ ޚިދުމަތްތައް މެދުކަނޑާނުލާނެކަމަށް މިނިސްޓްރީން ވިދާޅުވެއެވެ.
"ސިމްސް ކަސްޓަމަރ ޕޯޓަލް" ތެރެއިން ޑިޖިޓަލް ލައިސަންސްގެ ޚިދުމަތް، މިމަހުގެ 5ވަނަ ދުވަހުން ފެށިގެން ވަނީ ދޭން ފަށާފައެވެ.
އަދި ޑްރައިވިން ލައިސަންސަށް އެޕްލައިކުރުމާއި، ކާޑު އާކުރުމާއި އަދި މި ނޫންވެސް ލައިސަންސާއި ގުޅޭ ޚިދުމަތްތައް ލިބޭނެ ޕޯޓަލްއެކެވެ.
މި ޚިދުމަތަކީވެސް މުޅިން އަލަށް ފެށި ޚިދުމަތަކަށްވުމާއި އޭގެ ޓެސްޓިން މަސައްކަތްތައް އަދިވެސް ކުރިއަށްދާތީ، ޑްރައިވިން ލައިސަންސާ ގުޅޭ ބައެއް ލުއިތައްވެސް މިނިސްޓްރީން ވަނީ ދީފައެވެ.
އެގޮތުން މުއްދަތު ހަމަވެފައިވާ ޑްރައިވިން ލައިސަންސް މިމަހުގެ ނިޔަލަށް ބޭނުންކުރެވޭގޮތް ވަނީ ހަދާފައެވެ. މިނިސްޓްރީން ވިދާޅުވީ، މިގޮތަށް ނިންމާފައިވަނީ ލައިސަންސް އާކުރުމުގައި ބައެއް ފަރާތްތަކަށް ދިމާވެދާނެ ދަތިތަކަށް ބަލައިފައިކަމަށެވެ.
"ސިމްސް ކަސްޓަމަރ ޕޯޓަލް" އަކީ ދަޢުލަތުގެ އީފާސް ނިޒާމުގެ ތެރެއިން ބެނުންކުރެވޭ ޕޯޓަލްއެކެވެ. އިފާސް ލޮގިންއާއިއެކު މިޕޯޓަލްއަށް ވަނުމުން، ލައިސަންސް އޮންނަ މީހެއް ނަމަ ޑިޖިޓަލް ލައިސަންސް މިހާރު ބަލާލެވޭނެއެވެ.
މިނިސްޓްރީއިން ވިދާޅުވީ ސިމްސް ޕޯޓަލްއިން ޚިދުމަތްތަަކަށް އެޕްލައި ކުރެވޭނީ އީފާސް ލޮގިން މެދިވެރިކޮށްކަމަށެވެ. މިގޮތަށް ހަދާފައިވަނީ އެމީހެއްގެ އަމިއްލަ މަޢުލޫމާތުތަކުގެ ރައްކާތެރިކަން ކަށަވަރުކުރުމަށް މިނިސްްޓްރީން ވިދާޅުވެއެވެ.
އަލަށް ލައިސަންސް ނަގާ މީހުންނަށްވެސް އީފާސް ލޮގިން މެދުވެރިކޮށް ޕޯޓަލްގެ ޚިދުމަތް ހޯދޭނެއެވެ. މިނިސްޓްރީން ވިދާޅުވީ ޑްރައިވިން ސްކޫލްތަކުން ދޭ ލައިސަންސް ނެގުމާއި ގުޅޭ ޚިދުމަތްތައް ލުއިފަސޭހަކުރުމަށްވެސް މަސައްކަތް ކުރަމުންދާކަމަށެވެ. ނަމަވެސް މީގެ އެންމެ ލުއިފަސޭހަ ގޮތަކީ، އެމީހެއްގެ ޒާތީ މަޢުލޫމާތު އެހެން މީހުންނާ ޙިއްސާނުކޮށް އަމިއްލަ ލޮގިންއިން ޚިދުމަތް ހޯދުންކަމަށް މިނިސްޓްރީން ވިދާޅުވެއެވެ.