ކުރިއަށް އޮތް ރިޔާސީ އިންތިޚާބުގައި ކޯލިޝަން ހެދުމާއި ގުޅޭގޮތުން މަޝްވަރާކުރުމުގެ ބާރު އެމްޑީޕީގެ ރިޔާސީ ކެނޑިޑޭޓް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހަށް ދިނުމަށް އެމްޑީޕީގެ ގައުމީ މަޖިލީހުން ފާސްކޮށްފިއެވެ.
އެމްޑީޕީގެ ޤައުމީ މަޖިލީހުން މިގޮތަށް ފާސްކުރީ އިއްޒުއްދީން ސްކޫލުގައި ބޭއްވި އެ ޕާޓީގެ ޤައުމީ މަޖިލީހުގެ ބައްދަލުވުމުގައެވެ.
އެމްޑީޕީގެ ޤައުމީ މަޖިލީހުގެ މިރޭ ބައްދަލުވުމުގައި 60 ވަރަކަށް މެމްބަރުން ބައިވެރިވިއިރު، ކޯލިޝަން ހެދުމުގެ ބާރު ރައީސް ސާލިހުއަށް އެރުވުމަށް ފާސްކުރީ ޤައުމީ މަޖިލީހުގެ އަޤްލަބިއްޔަތުންނެވެ.
ޤައުމީ މަޖިލީހުގެ ބައްދަލުވުމުގައި ރިޔާސީ ޕްރައިމަރީން ނާކާމިޔާބީއާ ނާކާމިޔާބުވެވަޑައިގެންނެވި ރައީސް ނަޝީދާއި، އެމަނިކުފާނަށް ތާއިދުކުރައްވާ ބޭފުޅުން ބައިވެރިވެވަޑައެއް ނުގަންނަވައެވެ.
ކޯލިޝަން ހަދާނެ ޕާޓީތަކެއް ރިޔާސީ ކެނޑިޑޭޓަށް ހޯދިއްޖެނަމަ ކޯލިޝަން ހެދުމާއި ގުޅޭގޮތުން ގޮތެއް ނިންމާނީ ޤައުމީ މަޖިލީހުންކަމަށް އެމްޑީޕީގެ އިސް އޮފިޝަލަކު ވިދާޅުވިއެވެ.
Gaumee Majleehuge 4 vana dhauruge 7 vana bahdhaluvun kuriah dhanee pic.twitter.com/e3VQXXwbu9
— MDP Secretariat (@MDPSecretariat) February 15, 2023
2018 ގައި ބޭއްވި ރިޔާސީ އިންތިޚާބުގައިވެސް ކޯލިޝަން ހެދުމަށް އެމްޑީޕީ ޤައުމީ މަޖިލީހުން ރައީސް އިބްރާހީމް މުޙައްމަދު ޞާލިޙަށް އެ ބާރު ދެއްވިއެވެ. އަދި އެފަހަރުގެ އިންތިޚާބު އެމަނިކުފާނު ކާމިޔާބުކުރެއްވީ ގިނަ ޕާޓީތައް ހިމެނޭހެން ކޯލިޝަނަކާއެކުއެވެ. އެއީ ޖުމްހޫރީ ޕާޓީއާއި، އަދާލަތު ޕާޓީއާއި، އެމްއާރުއެމްއެކު ހެދި ކޯލިޝަނަކެވެ.
މިހާރު އަމަލުކުރަމުންދާ ޤާނޫނު އަސާސީއަށް ޢަމަލުކުރަން ފެށިފަހުން އެއްވެސް ސިޔާސީ ޕާޓީއަކަށް އެކަނި ވާދަކޮށްގެން %50އަށްވުރެ ގިނަ ވޯޓް ހޯދައިގެން ރިޔާސީ އިންތިހާބު ކާމިޔާބުކުރެވިފައެއް ނުވެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ވިސްނުންފުޅަކީ ކުރިއަށް އޮތް ރިޔާސީ އިންތިޚާބުގައިވެސް ކޯލިޝަނަކާއެކު ވާދަކޮށް ވެރިކަމަށް ވަޑައިގަތުންކަމަށް މީޑިއާގައި މީގެކުރިން ދެއްކެވި ވާހަކަފުޅުތަކުގައި ވަނީ ހާމަކުރައްވާފައެވެ. ރިޔާސީ ޕްރައިމަރީގައި ވާދަކުރެއްވިއިރުވެސް ރައީސް ސާލިހު ވިދާޅުވެފައިވަނީ އެމްޑީޕީއަށް އަނެއްކާވެސް ވެރިކަން ލިބޭނީ ކޯލިޝަން ހަދައިގެންކަމަށެވެ. އެހެންކަމުން ޕާޓީތަކާއި މަޝްވަރާކޮށްގެން ކޯލިޝަން ހެދުމަށް ތައްޔާރަށް ހުންނެވިކަމަށް ރައީސް ސާލިހު ވަނީ ވިދާޅުވެފައެވެ.