ތުރުކީވިލާތާއި ސޫރިޔާގެ ސަރަޙައްދުތަކަށް އައި ބާރުގަދަ ބިންހެލުމުގައި މަރުވި މީހުންގެ ޢަދަދު 41,000 އަށްވުރެ މައްޗަށް އަރައިފިއެވެ. ފެބްރުއަރީ 6 ވަނަ ދުވަހުގެ ދަންވަރު ރިކްޓަރ މިންގަނޑުން 7.8ގެ ބާރުމިނުގައި އައި ބިންހެލުމުގައި ތުރުކީވިލާތުގައި 12,000 އަށްވުރެ ގިނަ ޢިމާރާތް ވަނީ ސުންނާފަތިވެ، ބިމާ ހަމަވެފައެވެ. އޭގެ ފަހުން އިތުރު ބިންހެލުމަކާއި ލޮޅުންތަކެއްގައި ވެސް ބޮޑެތި ގެއްލުންތަކެއް ވަނީ ލިބިފައެވެ.
ބިންހެލުމުގައި ތުރުކީގެ ދެކުނާއި ސޫރިޔާގެ އުތުރުގެ ސަރަޙައްދުތަކުގައި ވެއްޓިފައިވާ ޢިމާރާތްތަކުގެ ދަށުގައި ތާށިވި ކަމަށް ބެލެވޭ މީހުން ސަލާމަތް ކުރުމަށް އަދިވެސް ދަނީ މަސައްކަތް ކުރަމުންނެވެ. ނަމަވެސް، ގިނަ ޢަދަދެއްގެ ބަޔަކު ދިރިތިއްބާ ފެންނާނެ ކަމުގެ އުންމީދު ވަނީ ފަނޑުވެފައެވެ. އަދި، މަރުވެފައިވާ ގިނަ ޢަދަދެއްގެ ބަޔެއްގެ ހަށިތައް ދަނީ ފެންނަމުންނެވެ.
ސޫރިޔާގައި ބިންހެލުމުގެ އަސަރު އެންމެ ބޮޑަށް ކޮށްފައި ވަނީ އުތުރުގައިވާ އިދްލިބް ސަރަޙައްދަށެވެ. އަދި، ތުރުކީވިލާތާ ގުޅޭ ސަރަޙައްދުތަކަށެވެ. އެ ސަރަޙައްދުތައް އޮތީ ސަރުކާރާ ދެކޮޅު ހަނގުރާމަވެރިންގެ އަތްދަށުގައެވެ. އެ ސަރަޙައްދުގައި ހާލުގައި ޖެހިފައިވާ އެތަކެއް މިލިޔަން މީހުންނަށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތްތަކަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
އެއް ކަމަކީ، އެ ސަރަޙައްދަށް ދަތުރުކުރެވޭނެ ގޮތްތަކެއް ނުވަތަ މަގުތަކެއް ނެތުމެވެ. 12 އަހަރުވީ ސޫރިޔާގެ ދާޚިލީ ހަނގުރާމައިގައި އެ ޤައުމުގެ އުތުރަށް ދަތުރުކުރެވެން އޮންނަ ގިނަ މަގުތައް ވަނީ ސުންނާފަތިވެފައެވެ. ނުވަތަ، ސަރުކާރުގެ ފައުޖުތަކުގެ ކޮންޓްރޯލްގެ ދަށުގައެވެ. ނަމަވެސް، ތުރުކީވިލާތާއި ސޫރިޔާ ގުޅޭ ސަރަޙައްދީ ރޮނގުގައި އޮންނަ ބާބް އަލް-ޙަވާއާއި ބާބް އަލް-ސަލާމާ މަގުތައް މިހާރު ވަނީ ހުޅުވާފައެވެ.
އެ ދެ މަގު ހުރަސްކޮށް، ސޫރިޔާގައި ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދިނުމަށް އ.ދ.އިން އިސްނަގައިގެން ދަނީ މަސައްކަތް ކުރަމުންނެވެ. މީގެ ކުރިން، ބާބް އަލް-ޙަވާ މަގުން އެހީގެ ސާމާނު ހިފައިގެން ހަ ލޮރީ ދަތުރުކޮށްފައިވާއިރު، ބާބް އަލް-ސަލާމާ ހުރަސްކޮށް ވެސް މިހާރު 11 ލޮރީގެ އެހީގެ ސާމާނު ވަނީ ސޫރިޔާއަށް އެތެރެކޮށްފައެވެ.
ސޫރިޔާގެ އުތުރުގެ ބައެއް ސަރަޙައްދުތަކުން ކާބޯތަކެއްޗާއި ސާފު ބޯފެން މިހާރު ވަނީ ހުސްވެފައެވެ. އަދި، އެހީގެ ސާމާނު ލަސްވުމުގެ ސަބަބުން ބައެއް ސަރަޙައްދުތަކުގައި ދިރިއުޅޭ މީހުން ވަނީ ކާބޯތަކެއްޗަށް ޖެހިފައެވެ. އެ ސަރަޙައްދުތަކުގައި ދިރިއުޅޭ މީހުންނަށް އެހީތެރިކަން ފޯރުކޮށްދިނުމަށް ތުރުކީވިލާތާއި ސޫރިޔާ ގުޅޭ އިތުރު ދެ ސަރަޙައްދީ ހުރަސް ހުޅުވައިލުމަށް ސޫރިޔާގެ ސަރުކާރުން އެއްބަސްވެފައިވާ ކަމުގައި އ.ދ.އިން ބުނެއެވެ.
ބިންހެލުމުގައި ސޫރިޔާގެ ސަރުކާގެ ބާރުގެ ދަށުގައިވާ ބައެއް ސަރަޙައްދުތަކަށް ވެސް ބޮޑެތި ގެއްލުންތަކެއް ލިބުނެވެ. އޭގެ ތެރޭގައި ޙަލަބު ހިމެނެއެވެ. އެ ޤައުމުގެ ރައީސް ބައްޝާރުލް އަސަދުގެ ސަރުކާރާ ގުޅުން ދަމަހައްޓަމުންދާ ބައެއް ޤައުމުތަކުން ވަނީ ވައިގެ މަގުން އެހީގެ ސާމާނު ފޯރުކޮށްދިނުމުގެ މަސައްކަތް ފަށާފައެވެ. އެ ޤައުމުތަކުގެ ތެރޭގައި އީރާނާއި ރަޝިޔާ އަދި އެކުވެރި ޢަރަބި ޢިމާރާތް (ޔޫ.އޭ.އީ) ހިމެނެއެވެ.
ބިންހެލުމުގެ ކުރިން ވެސް ސޫރިޔާގައި އިންސާނީ އެހީއަށް ބޭނުންވެފައިވާ މީހުންގެ ޢަދަދު 4.1 މިލިޔަނަށް އަރައެވެ. ތުރުކީއާއި ސޫރިޔާގައި ބިންހެލުމުގައި އަސަރުކޮށްފައިވާ މީހުންގެ ޢަދަދު 26 މިލިޔަނަށް އަރާނެ ކަމަށް އެހީދޭ ޖަމުޢިއްޔާތަކުން އަންދާޒާ ކުރާއިރު، ސޫރިޔާގައި ގެދޮރު ހަލާކުވެ، މަގުމަތިވެފައިވާ މީހުންގެ ޢަދަދު 5.3 މިލިޔަނަށް އަރާނެ ކަމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން އަންދާޒާ ކުރެއެވެ.
ސޫރިޔާއަށް އ.ދ. މެދުވެރިކޮށް ފޮނުވާފައިވާ އެހީގެ ސާމާނު ބެހުމުގައި ތަފާތުކުރުންތައް ނުގެންގުޅޭނެ ކަމުގައި ސޫރިޔާއިން އ.ދ.އަށް ކަނޑައަޅާފައިވާ ހުންނަވާ ސަފީރު ބައްސާމް އަލް-ސައްބަޣް ވިދާޅުވިއެވެ. ނަމަވެސް، އުތުރުގެ ސަރަޙައްދުތަކަށް އެހީގެ ސާމާނު ފޯރުކޮށްދޭން ލަސްތަކެއް ކުރިމަތިވެފައި ވަނީ، ސަރުކާރާ ދެކޮޅު ޖަމާޢަތްތަކުގެ އަމަލުތަކުގެ ސަބަބުން ކަމަށް އޭނާ ތުހުމަތު ކުރެއްވިއެވެ.