ފަލަސްޠީނުގެ އެކްޓިވިސްޓަކަށް ހަމަލާދިން ޔަހޫދީ ޖައްބާރު ސިފައިންގެ މީހަކު 10 ދުވަހަށް ޖަލަށްލުމަށް ހުކުމްކޮށްފިއެވެ. ވެރިވެގަނެފައިވާ ހުޅަނގު އައްސޭރީގެ ޚަލީލްގައި ހިނގި ހާދިސާގައި ޔަހޫދީ ސިފައިންގެ މީހާ ހަމަލާދީފައި ވަނީ ފަލަސްޠީނުގެ އެކްޓިވިސްޓެއް ކަމުގައިވާ ޢީސާ އަމްރޫއަށެވެ. ޔަހޫދީ ސިފައިންގެ މީހާ އަމްރޫއަށް ހަމަލާދޭ މަންޒަރު ފެންނަ ވީޑިޔޯއެއް ވަނީ ޢާންމުވެފައެވެ.
އަމްރޫއަކީ ޔަހޫދީ އިސްރާޢީލުގެ ސަރުކާރަށް ފާޑުކިޔުމުގައި ނަން މަޝްހޫރު މީހެކެވެ. އަދި، ފަލަސްޠީނުގެ ސަރުކާރަށް ވެސް އޭނާ ފާޑުކިޔާފައިވެއެވެ. އަމްރޫއަށް ހަމަލާދިން ވަގުތު އޭނާ މަސައްކަތް ކުރަމުން ގޮސްފައި ވަނީ އެމެރިކާގެ މަޝްހޫރު ނޫހެއް ކަމުގައިވާ ނިއު ޔޯކަރގެ ލިޔުންތެރިއެއް ކަމުގައިވާ ލޯރެންސް ރައިޓްއާ އެކުގައެވެ.
އަމްރޫއަށް ޔަހޫދީ ސިފައިންގެ މީހާ ހަމަލާދީފައި ވަނީ، އެމެރިކާގެ ނޫސްވެރިޔާއަށް ޚަލީލް ދައްކައިލުމަށް ނިކުމެ އުޅުމުގެ ތެރޭގައި ކަމުގައި އޭނާ ބުންޏެވެ. އަދި، ޚަލީލްގެ މަގުތަކާއި ހާލަތުގެ ވީޑިޔޯތައް ނަގަމުންގޮސްފައިވާނެ ކަމުގައި އޭނާ ބުންޏެވެ. ޔަހޫދީ ސިފައިންގެ މީހާ އަމްރޫއަށް ހަމަލާދީފައި ވަނީ ވީޑިޔޯ ނެގުމުން، އެ ކަމާ ހިތްހަމަ ނުޖެހިގެންނެވެ.
"ސިފައިންގެ މީހާ އިސްވެ އަހަރެންނަށް ހަމަލާދިނީ. އަހަރެންގެ ގައިގައި ޖަހައި އަހަރެންގެ ކަރުގައި ހިފައި އަނިޔާކުރި. އަހަރެން އެ ވަގުތު ވަރަށް ބިރުގަތް،" އަމްރޫ ކިޔައިދިނެވެ. މި ހާދިސާއާ ގުޅިގެން ޔަހޫދީ އިސްރާޢީލުގެ އަސްކަރިއްޔާއިން ބުނީ، ފަލަސްޠީނުގެ ރައްޔިތަކު ޚަލީލްގައި ހުންނަ ފުލުހުންގެ ޕޯސްޓަކާ ކައިރިވުމުން، އެ ކަން ހުއްޓުވަން ޔަހޫދީ ސިފައިންގެ މީހަކު މަސައްކަތްކުރި ކަމުގައެވެ.
އަދި، ޔަހޫދީ ސިފައިންގެ މީހާ ބާރުގެ ބޭނުންކޮށް ފަލަސްޠީނު މީހާ ދުރުކުރަން މަސައްކަތް ކޮށްފައި ވަނީ، އޭނާ ފުލުހުންގެ ޕޯސްޓުގެ ވީޑިޔޯ ނަގަން ފެށުމުން ކަމަށާއި، ދެ މީހުންގެ މެދުގައި ޒުވާބުކުރުމަށް ފަހު، ޔަހޫދީ ސިފައިންގެ މީހާ ފަލަސްޠީނުގެ މީހާގެ ގައިގައި ޖަހައި، މާރާމާރީ ހިންގާފައިވާ ކަމުގައި ވެސް އިސްރާޢީލުގެ އަސްކަރިއްޔާއިން ނެރުނު ބަޔާނެއްގައި ބުނެފައިވެއެވެ. މި ކަމުގައި ޔަހޫދީ ސިފައިންގެ އިތުރު މީހަކު އޭނާއަށް އެހީތެރިވެދީފައިވެއެވެ.
މި ހާދިސާގައި، ޔަހޫދީ ސިފައިންގެ މީހާ އަސްކަރިއްޔާގެ ޤަވާޢިދުތަކާ ޚިލާފަށް އަމަލުކޮށްފައިވާ ކަން ވީޑިޔޯއިން ހާމަވުމުން، އޭނާއާ ދެކޮޅަށް ފިޔަވަޅު އަޅާފައިވާ ކަމުގައި ވެސް އިސްރާޢީލުން ބުންޏެވެ. އަދި، އަދަބެއްގެ ގޮތުން 10 ދުވަހުގެ ޖަލު ހުކުމެއް އިއްވައި، އޭނާ ޑިޔުޓީއަށް ނެރުން ހުއްޓައިލާފައިވާ ކަމުގައި ވެސް އިސްރާޢީލުގެ އަސްކަރިއްޔާއިން ބުންޏެވެ. ނަމަވެސް، އޭނާ ޖަލު ހުކުމް ތަންފީޒު ކުރާނީ އަސްކަރިއްޔާގެ ޖަލެއްގައެވެ. މިއީ، ރަމްޒީ ގޮތުން އިއްވާފައިވާ ހުކުމެއް ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
އަމްރޫއަށް ދިން ހަމަލާއާ ގުޅިގެން ރައިޓް ވަނީ އިސްރާޢީލުގެ އަސްކަރިއްޔާއަށް ވަރަށް ބޮޑަށް ފާޑުކިޔައި ޓުވީޓުކޮށްފައެވެ. އޭނާ ބުނީ، އިސްރާޢީލުގެ ސިފައިންގެ މީހާއަށް ފުރައްސާކުރަން އަމްރޫ އެއްވެސް އަމަލެއް ކޮށްފައި ނުވާ ކަމުގައެވެ. އަދި، އިސްވެ، އަމްރޫއަށް ހަމަލާދީފައި ވަނީ އިސްރާޢީލުގެ ސިފައިންގެ މީހާކަމަށް ވެސް ރައިޓް ބުންޏެވެ.
ރައިޓްއަކީ، ނިއު ޔޯކަރގެ "ދަ ލޫމިންގ ޓަވަރ" އަދި "ގޮއިންގް ކްލިޔަރ" ކޮލަމް ލިޔާ ލިޔުންތެރިޔާއެވެ. އޭނާ ޚަލީލަށް ގޮސްފައި ވަނީ، އެ ރަށުގެ ރައްޔިތުން ދިރިއުޅެމުންދާ ހާލަތާ މެދު ލިޔުންތަކެއް ލިޔުމުގެ ބޭނުމުގައެވެ. އަމްރޫއަށް ހަމަލާދިން ވަގުތު އޭނާ ހަރަކާތްތެރިވެފައި ވަނީ ރައިޓްގެ އެހީތެރިއެއްގެ ގޮތުންނެވެ.