ރާއްޖޭގައި ފުރަތަމަ ފަހަރަށް ވެބްބޭސްޑް ރިޕޯޓް ފޯމް
އެޑިއުކޭޝަން މިނިސްޓްރީން ތަޢާރަފްކުރައްވައިފިއެވެ. ރާއްޖޭގެ ސްކޫލްތަކުގެ ކީ
ސްޓޭޖް އެކެއް އަދި ކީ ސްޓޭޖް ދޭއްގެ ގްރޭޑްތަކަށް އިންޓާރނެޓް މެދުވެރިކޮށް
ރިޕޯޓްފޯމް ތައްޔާރުކުރުމުގެ އެޕްލިކޭޝަން ތަޢާރަފްކުރެއްވުމަށް މިއަދު
ޕޮލިޓެކްނިކްގައި ބޭއްވެވި ރަސްމިއްޔާތު ޝަރަފްވެރިކޮށްދެއްވީ އެޑިއުކޭޝަން މިނިސްޓްރީގެ
ސްޓޭޓް މިނިސްޓަރ ޑރ ޢަބުދުﷲ ނަޒީރުއެވެ.
ވެބްބޭސްޑް އެޕްލިކޭޝަނެއް ބޭނުންކުރައްވައިގެން،
ރިޕޯޓްފޮތް އެކުލަވާލެއްވުމުގެ މަސައްކަތް ފެއްޓެވުމުން ކުދިންގެ ފެންވަރާއި، ކުރިއެރުން
ވަޒަންކުރެއްވުމަށް މިހާރަށްވުރެ އެތައް ގުނައެއް ފަސޭހަވާނެކަމަށް އެޑިއުކޭޝަން
މިނިސްޓްރީން ވިދާޅުވެއެވެ. އެގޮތުން އަލަށް ތަޢާރަފްކުރެއްވި މި އެޕްލިކޭޝަން
މެދުވެރިކޮށް ކޮންމެ ދުވަހަކުވެސް ކުދިންގެ މަސައްކަތްތައް ވަޒަންކުރައްވައި، ކޮންމެ ބައެއް
ކިޔަވައިދީ ނިމުމުން އެ ބަޔަކުން ކުދިންނަށް ޙާޞިލްވި މިންވަރު ދެނެގަނެވޭނެކަމަށް
އެޑިއުކޭޝަން މިނިސްޓްރީން ވިދާޅުވެއެވެ. އެހެންކަމުން ކޮންމެ ޓާރމެއް ނިމޭއިރު
ރިޕޯޓްފޯމް ތައްޔާރުކުރުމަށް އިތުރު މަސައްކަތެއް ކުރައްވަން
ޖެހިވަޑައިނުގަންވާނެކަން އެމިނިސްޓްރީން ފާހަގަކުރައްވައެވެ. މީގެ އިތުރުން މި
އެޕްލިކޭޝަނަކީ އިންޓަރނެޓް މެދުވެރިކޮށް ބޭނުންކުރެވޭ އެޕްލިކޭޝަނެއްކަމުން
ކޮންމެ ތަނެއްގައި ހުރެ ކޮންމެ ވަގުތަކުވެސް މި އެޕްލިކޭޝަން ބޭނުންކޮށްގެން މަޢޫލޫމާތު
ރައްކާކުރެވޭނެއެވެ. މިކަމުގެ ސަބަބުން ލީޑިން ޓީޗަރުންނަށް، ޓީޗަރުންގެ މަސައްކަތް ބެލުމަށާއި ދަރިވަރުން ކުރިއަރަމުން އަންނަ މިންވަރު
ދެނެގަތުމަށް ފަސޭހަވެގެންދާނެ ކަމަށް އެޑިއުކޭޝަން މިނިސްޓްރީން ވިދާޅުވެއެވެ. ވެބްބޭސްޑް މި
އެޕްލިކޭޝަން ތަޢާރަފްކުރެއްވުމަށް ބޭއްވެވި ރަސްމިއްޔާތު ޝަރަފްވެރިކޮށްދެއްވާ
ސްޓޭޓްމިނިސްޓަރ ޑރ ޢަބުދުﷲ ނަޒީރު ވިދާޅުވީ މިހާރު ޢަމަލުކުރައްވަމުން ގެންދަވާ
ކަރިކިއުލަމްގެ އެންމެބޮޑު ބޭނުމަކީ ރަނގަޅު ފަރުދަކު ބިނާކުރެއްވުން ކަމަށްވާއިރު،
ކުއްޖާގެ ކުރިއަރަމުން އަންނަ މިންވަރު ވަޒަންކުރެވޭނެ ނިޒާމެއް
އޮންނަންޖެހޭކަމަށެވެ.
އެޑިއުކޭޝަން މިނިސްޓްރީން އަލަށް ތަޢާރަފްކުރެއްވި
ރިޕޯޓްފޯމް ތައްޔާރުކުރެއްވުމުގެ އެޕްލިކޭޝަނަށް އަހުލުވެރިކުރެއްވުމަށް ވަނީ ލީޑިން
ތީޗަރުންނާއި ޕްރިންސިޕަލުން ތަމްރީނުކުރެއްވުމުގެ މަސައްކަތު ބައްދަލުވުމެއް
ފަށްޓަވާފައެވެ. އެޑިއުކޭޝަން މިނިސްޓްރީން ވިދާޅުވީ ޖުމްލަ 233 ލީޑިން
ޓީޗަރުންނާއި ހުރިހާ ސްކޫލެއްގެ ޕްރިންސިޕަލުން މި ޕްރޮގްރާމްގެ ދަށުން ތަމްރީނު
ކުރެވޭނެކަމަށެވެ.