ޕެރޫގެ ދެކުނުގައިވާ ފަރުބަދަތީ ސަރަޙައްދެއްގެ ބިންގަނޑު ކަނޑައިގެންގޮސް 15 މީހުން މަރުވެއްޖެއެވެ. ބިންގަނޑު ކަނޑައިގެން ގޮސްފައި ވަނީ އާރޭކީޕާ ސަރަޙައްދުގައެވެ. މި ހާދިސާގައި 20 މީހަކު ޒަޚަމުވެފައިވާ ކަމުގައި އެ ޤައުމުގެ ނޭޝަނަލް ސިވިލް ޑިފެންސް އިންސްޓިޓިއުޓުން ބުނެއެވެ. ބިންގަނޑު ކަނޑައިގެން ގޮސްފައި ވަނީ އެ ސަރަޙައްދަށް ހުއްޓުމެއް ނެތި ބޯކޮށް ވާރޭވެހުމާ ގުޅިގެންނެވެ.
އާރޭކީޕާގެ ގަވަރުނަރު ރޮހޭލް ސަންޗޭޒް ވިދާޅުވީ، ބިންގަނޑު ކަނޑައިގެން ގޮސް ފޭބި ވެއްޔާއި ކިސަޑުތަކުގެ ދަށުވެ، ދެ މީހަކު ގެއްލިފައިވާ ކަމަށާއި، އެ މީހުން ހޯދައި ސަލާމަތްކުރުމަށް މަސައްކަތް ކުރަމުންދާ ކަމުގައެވެ. އަދި، މި ހާދިސާގައި މަރުވި މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ. ބިންގަނޑު ކަނޑައިގެން ދިޔުމުގެ ހާދިސާގައި ހާލުގައި ޖެހުނު މީހުންނަށް އެހީތެރިކަން ފޯރުކޮށްދިނުމަށް އެ ޤައުމުގެ އަސްކަރިއްޔާއިން ވަނީ މަސައްކަތް ފަށާފައެވެ.
ބިންގަނޑު ކެނޑުގެ ހާދިސާގައި އެންމެ ބޮޑަށް އަސަރުކޮށްފައި ވަނީ ނިކޮލަސް ވެލްކާރސެލް ކިޔާ ސަރަޙައްދެއްގައި އޮންނަ ހަތަރު އަވަށަކަށެވެ. އެ އަވަށްތަކުގެ ރައްޔިތުން ހާލުގައި ޖެހިފައިވާ ކަމުގައި ސަންޗޭޒް ވިދާޅުވިއެވެ. އަދި، ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް މަސައްކަތް ކުރަމުންދާ ކަމުގައި ވެސް އޭނާ ވިދާޅުވިއެވެ. އެއީ، މައިން ކުރުމުގެ މަސައްކަތް ކުރާ ސަރަޙައްދެކެވެ.
އާރޭކީޕާގެ ބިންގަނޑު ކަނޑައިގެން ދިޔުމުގެ ހާދިސާގައި ގިނަ ޢަދަދެއްގެ ގެދޮރު ހަލާކުވެފައިވާ ކަމަށާއި، މި ކަމުގެ އަސަރުކޮށްފައިވާ މީހުންގެ ޢަދަދު 12,000 އިން މައްޗަށް އަރާކަމުގައި ސަންޗޭޒް ވިދާޅުވިއެވެ. އަދި، މި ހާދިސާއާ ގުޅިގެން އާރޭކީޕާގައި ކުއްލި ހާލަތު އިޢުލާނު ކުރުމަށް ލީމާގެ ސަރުކާރުގައި އެދިފައިވާނެ ކަމުގައި ވެސް އޭނާ ވިދާޅުވިއެވެ.