ޔަހޫދީ އިސްރާޢީލުގެ އަސްކަރިއްޔާއިން ފަލަސްޠީނުގެ ޣައްޒާއަށް ބޮންއަޅައި، ބޮޑެތި ގެއްލުންތަކެއް ދީފިއެވެ. ޢައްޒާގައި ވެރިކަންކުރާ ހަމާސް ޖަމާޢަތުގެ އަސްކަރީ މަރުކަޒުތަކަށް އަމާޒުކޮށް ދިން މި ހަމަލާތަކުގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނުވެއެވެ.
ހަމަލާތައް އަމާޒުކޮށްފައި ވަނީ އަލް-މަޣާޒީ ރެފިޔުޖީ ކޭމްޕުގައި އޮންނަ ޢިއްޒުއްދީން އަލް-ޤައްސާމް ބްރިގޭޑްސްގެ އަސްކަރީ މަރުކަޒަކަށް ކަމުގައި ޣައްޒާގެ އޮފިޝަލުން ބުނެއެވެ. މީގެ އިތުރުން، ޣައްޒާ ސިޓީގެ ހުޅަނގު ދެކުނުގައި އޮންނަ އަސްކަރީ މަރުކަޒަކަށް ވެސް އިސްރާޢީލުން ވައިގެ ހަމަލާތައް ދީފައިވާ ކަމުގައި ޣައްޒާގެ އޮފިޝަލުން ބުނެއެވެ.
ޔަހޫދީންގެ ޓެރެރިސްޓު ސިފައިން ބުނީ، ޣައްޒާއަށް ވައިގެ ހަމަލާތަކެއް ދީފައި ވަނީ، އިސްރާޢީލާ ދެކޮޅަށް ރޮކެޓް ހަމަލާތަކެއް ދިނުމުން، އެ ކަމުގެ ބަދަލުހިފުމުގެ ގޮތުން ކަމުގައެވެ. ޣައްޒާއިން ފޮނުވައިލި ރޮކެޓް ހަމަލާތަކުގައި ޔަހޫދީންގެ އެއްވެސް މީހެއްގެ ފުރާނައަށް ގެއްލުންވެފައި ނުވާ ކަމުގައި އިސްރާޢީލުގެ އަސްކަރިއްޔާއިން ބުނެއެވެ.
ޔަހޫދީންގެ ޖައްބާރު ސިފައިންގެ ވައިގެ ހަމަލާތައް އަމާޒުކޮށްފައި ވަނީ، ހަމާސް ޖަމާޢަތުގެ މުޖާހިދުން ހަތިޔާރު އުފައްދަން ބޭނުންކުރާ ކާރުޚާނާތަކަކަށް ކަމުގައި އިސްރާޢީލުގެ އަސްކަރިއްޔާއިން ބުނެއެވެ. އިސްރާޢީލުގެ ވައިގެ ހަމަލާތަކުގެ ރައްދުގައި ވެސް ޣައްޒާގެ މުޖާހިދުން ވަނީ އިސްރާޢީލަށް އަމާޒުކޮށް އިތުރު ރޮކެޓް ހަމަލާތަކެއް ދީފައެވެ. މި ހަމަލާތަކުގެ ފަހަތުގައި ވަނީ މުޖާހިދުންގެ ޖަމާޢަތެއް ކަމުގައިވާ ޕޮޕިއުލަރ ފްރޮންޓް ފޯރ ދަ ލިބެރޭޝަން އޮފް ޕަލަސްޓައިން (ޕީ.އެފް.އެލް.ޕީ)އެވެ.
އިސްރާޢީލުގެ އައު ސަރުކާރު ހުވާކުރުމާ އެކު، ފަލަސްޠީނުގެ ރައްޔިތުން އަޅުވެތިކުރުން ވަނީ އިތުރުކޮށްފައެވެ. ފަލަސްޠީނުގެ ބިންތަކަށް އަރައި ލާއިންސާނީ އުދުވާންތައް ހިންގުން ވަނީ އިތުރުކޮށްފައެވެ. އަދި، ފަލަސްޠީނުގެ ރައްޔިތުންގެ ލޭއޮހޮރުވައިލަން ހިންގާ އޮޕަރޭޝަންތައް އިތުރުކޮށް، ގިނަ ޢަދަދެއްގެ މުސްލިމުން ވަނީ ޝަހީދުކޮށްލާފައެވެ.
ޔަހޫދީ ޖައްބާރު ޓެރެރިސްޓު ސިފައިން ފަލަސްޠީނަށް އަރައި މި އަހަރުގެ މިހާތަނަށް ޝަހީދުކޮށްލާފައިވާ މީހުންގެ ޢަދަދު 35 އަށް އަރައެވެ. ހުޅަނގު އައްސޭރީގެ ޖިނީނަށް އަރައި ޔަހޫދީ ސިފައިން ހިންގި އުދުވާންތަކެއްގައި އެންމެ ދުވަހެއްގެ ތެރޭގައި 10 މީހުން ޝަހީދުކޮށްލާފައިވެއެވެ. ހުސްވި 2022 ވަނަ އަހަރު ޔަހޫދީ އަސްކަރިއްޔާއިން ވަނީ ފަލަސްޠީނުގެ 235 މީހުން ޝަހީދުކޮށްލާފައެވެ.
މި އުދުވާންތަކަށް ކެތް ނުކުރެވިގެން، ފަލަސްޠީނުގެ މުޖާހިދުން ވެސް ވަނީ ޔަހޫދީންނާ ދެކޮޅަށް ތެދުވެފައެވެ. އަދި، މި ޖިހާދުގެ ދަށުން، ޔަހޫދީންގެ ފައްޅިއަކަށް ހަމަލާދީ، ހަތް މީހުން ވަނީ މަރައިލާފައެވެ. އެއީ، ފާއިތުވި އަހަރުތަކުގެ ތެރޭގައި ފަލަސްޠީނުގެ މުޖާހިދުން ދީފައިވާ މި ފަދަ އެންމެ ނުރައްކާތެރި ހަމަލާއެވެ.
2007 ވަނަ އަހަރަށް ފަހު ޔަހޫދީންގެ ޓެރެރިސްޓު ސިފައިން ވަނީ ޣައްޒާ ބަންދުކޮށްފައެވެ. އެތެރެވެވޭނެ ހުރިހާ މަގުތަކެއް ކޮންޓްރޯލް ކުރަމުން ދަނީ ޔަހޫދީ އަސްކަރިއްޔާއިންނެވެ. ޣައްޒާގެ 2.3 މިލިޔަން މީހުން ދިރިއުޅެމުން ދަނީ އަޅުވެތިކަމުގެ ދަށުގައެވެ. އަދި، ޣައްޒާގެ ރައްޔިތުން ދިރިއުޅެމުން ދަނީ ނިކަމެތި، ބިކަ ހާލެއްގައެވެ.
ފަލަސްޠީނުގެ މުސްލިމުންނާއި ޔަހޫދީ ޓެރެރިސްޓު ސިފައިންނާ ދެމެދު ބަދަލުކުރަމުންދާ ހަމަލާތައް ހުއްޓުވުމަށް އެމެރިކާއާއި މިޞްރުން ގުޅިގެން ދަނީ މަސައްކަތް ކުރަމުންނެވެ. މި މަސައްކަތުގެ ދަށުން، ފަލަސްޠީނުގެ މިނިވަންކަމަށް ޖިހާދު ކުރަމުންދާ އިސްލާމިކް ޖިހާދު ޖަމާޢަތާ އެކު މަޝްވަރާތައް ބޭއްވުމަށް މިޞްރުން ވަނީ ތައްޔާރުވެފައެވެ. މަޝްވަރާތަކުގައި އެ ޖަމާޢަތް ތަމްސީލު ކުރައްވާނީ އެ ޖަމާޢަތުގެ ވެރިޔާ ޒިޔާދް އަލް-ނަޚަލާއެވެ.