ސޮމާލިޔާގައި ހަރަކާތްތެރިވާ ޓެރެރިސްޓު ޖަމާޢަތެއް ކަމުގައިވާ އަލް-ޝަބާބާ ދެކޮޅަށް ގުޅިގެން މަސައްކަތް ކުރުމަށް އެފްރިކާގެ ހަތަރު ޤައުމަކުން ނިންމައިފިއެވެ. މި ކަމާ ގުޅޭ ގޮތުން މަޝްވަރާކުރުމަށް ސޮމާލިޔާއިން އިންތިޒާމުކޮށްގެން ސަމިޓެއް ވަނީ ބާއްވާފައެވެ. ސޮމާލިޔާގެ އިތުރުން މޮގަދިޝޫގައި ބޭއްވި މި ސަމިޓުގައި ބައިވެރިވެފައިވާ ޤައުމުތަކަކީ ކެންޔާ، ޖިބޫޓީ އަދި އިތިއޯޕިޔާއެވެ.
ސޮމާލިޔާގެ ރައީސް ޙަސަން ޝައިޚް މަޙްމޫދާއި، ކެންޔާގެ ރައީސް ވިލިޔަމް ރޫޓޯއާއި، ޖިބޫޓީގެ ރައީސް އިސްމާޢީލް އުމަރު ގެލާގެ އިތުރުން އިތިއޯޕިޔާގެ ބޮޑުވަޒީރު އަބީ އަޙުމަދު ބައިވެރިވެ ވަޑައިގެންނެވި މި ބައްދަލުވުމުގައި އަލް-ޝަބާބާ ދެކޮޅަށް ގުޅިގެން އަސްކަރީ ކެމްޕޭނެއް ހިންގުމަށް އެ ބޭފުޅުން ވަނީ އެއްބަސްވެ ވަޑައިގަންނަވާފައެވެ.
ސޮމާލިޔާގެ އިތުރުން އެފްރިކާގެ އެހެން ޤައުމުތަކަށް ވެސް އަލް-ޝަބާބްގެ އުނދަގުލާ ވަނީ ކުރިމަތިވެފައެވެ. ފާއިތުވި 15 ވަރަކަށް އަހަރުގެ ތެރޭގައި އެ ޖަމާޢަތުގެ ހަނގުރާމަވެރިން ވަނީ އެ ޤައުމުތަކުގައި ވަރުގަދަ ހަމަލާތަކެއް ދީފައެވެ. އަދި، ހަމަނުޖެހުން އުފައްދައި، ބައެއް ސަރަޙައްދުތަކަށް އަތްގަދަކޮށްފައެވެ.
ހަތަރު ޤައުމުން ގުޅިގެން ހިންގާ އަސްކަރީ އޮޕަރޭޝަންގެ މަޤުޞަދަކީ، އަލް-ޝަބާބް ޖަމާޢަތުގެ ހަނގުރާމަވެރިން އަތްގަދަކޮށްފައިވާ ސަރަޙައްދުތައް މިނިވަންކޮށް، އެ ސަރަޙައްދުތަކުން ހަނގުރާމަވެރިން ފައްސައިލުން ކަމުގައި ސަމިޓުގެ ބައިވެރިން ބުނެއެވެ.
އަލް-ޝަބާބްގެ އަތްދަށުގައިވާ ސޮމާލިޔާގެ ބައެއް ސަރަޙައްދުތައް އެ ޤައުމުގެ އަސްކަރިއްޔާއާއި އަދި ގުޅިފައިވާ ހަނގުރާމަވެރި ޖަމާޢަތްތަކުން ވަނީ މިނިވަންކޮށްފައެވެ. މި ކަމުގައި އެމެރިކާއިންނާއި އެފްރިކާގެ އިއްތިހާދު (އޭ.ޔޫ)އިން ދަނީ އެހީތެރިކަން ފޯރުކޮށްދެމުންނެވެ. އެމެރިކާއިން ދަނީ އަލް-ޝަބާބް ހަނގުރާމަވެރިންގެ އަމާޒުތަކަށް ވައިގެ ހަމަލާތައް ދެމުންނެވެ. ނަމަވެސް، އެ ޖަމާޢަތުގެ އަތްދަށުގައިވާ ހުރިހާ ސަރަޙައްދެއް އަދި ފަތަޙަ ކުރެވިފައެއް ނުވެއެވެ.
ހަތަރު ޤައުމުގެ ސަމިޓަށް ތައްޔާރުވުމުގެ ގޮތުން މި ހަތަރު ޤައުމުގެ ދިފާޢީ ވަޒީރުން ވެސް ވަނީ ބައްދަލުވުމެއް ބާއްވާފައެވެ. އަދި ސަމިޓަށް ތައްޔާރުވުމުގެ ގޮތުން މޮގަދިޝޫގައި ސަލާމަތީ ފިޔަވަޅުތައް ވަނީ ވަރަށް ބޮޑަށް ވަރުގަދަކޮށްފައެވެ. އެހެން ހުރިހާ ވައިގެ އުދުހުންތަކެއް ވެސް ވަނީ މެދުކަނޑައިލާފައެވެ.
މަޙްމޫދު ސޮމާލިޔާގެ ވެރިކަމާ ހަވާލުވެ ވަޑައިގަތީ 2022 ވަނަ އަހަރުގެ މޭ މަހުއެވެ. އަދި، ވެރިކަމާ ހަވާލުވެ ވަޑައިގެންނެވުމަށް ފަހު އޭނާ ވަނީ، އަލް-ޝަބާބާ ދެކޮޅަށް ހަނގުރާމަ އިޢުލާނު ކުރައްވާފައެވެ. ނަމަވެސް، އަލް-ޝަބާބް ޖަމާޢަތުން ދަނީ ދޭތެރެދޭތެރެއިން މޮގަދިޝޫގައި ވަރުގަދަ ހަމަލާތަކެއް ދެމުންނެވެ. އަދި، ސަރުކާރު އޮފީސްތަކަށް އަމާޒުކޮށް ބޮމުގެ ހަމަލާތައް ދެމުންނެވެ.
2022 ވަނަ އަހަރުގެ އޮކްޓޫބަރު މަހު މޮގަދިޝޫގައި ހުންނަ ތަޢުލީމާ ބެހޭ ވުޒާރާގެ ކުރިމަތީގައި އަލް-ޝަބާބުން ދިން ބޮމުގެ ހަމަލާއެއްގައި 121 މީހުން މަރުވިއެވެ. އަދި ގިނަ ޢަދަދެއްގެ ބަޔަކު ޒަޚަމުވިއެވެ. ހުސްވި ހަފުތާގައި ވެސް އެ ޖަމާޢަތުން ވަނީ މޮގަދިޝޫގެ މޭޔަރުގެ އޮފީހަށް ވަދެ، އެތަން ހިސާރުކޮށް، ހަ މީހުން މަރައިލާފައެވެ. އޭގެ ކުރީ ހަފުތާގައި އެ ޖަމާޢަތުގެ ހަނގުރާމަވެރިން ވަނީ އަސްކަރީ މަރުކަޒަކަށް ހަމަލާދީ ސިފައިން ހަތް މީހުން މަރައިލާފައެވެ.