ފަލަސްޠީނުގެ ރައްޔިތުންނަށް މި ވަގުތު ކުރިމަތިލާން ޖެހިފައި ވަނީ އެއްވެސް އުންމީދެއް ނެތް ހާލަތެއް ކަމަށާއި، އެ ހާލަތު ބަދަލުކުރަން ޖެހޭ ކަމުގައި އެމެރިކާގެ ޚާރިޖީ ވަޒީރު އެންތަނީ ބްލިންކަން ވިދާޅުވެއްޖެއެވެ. އޭނާ މި މޭރުމުން ވާހަކަފުޅު ދައްކަވާފައި މި ވަނީ، ހުޅަނގު އައްސޭރީގެ ރާމަاللهއަށް ވަޑައިގަންނަވައި، ފަލަސްޠީނުގެ ރައީސް މަޙްމޫދު އައްބާހާ އެކު ބޭއްވެވި ބައްދަލުވުމެއްގައެވެ.
ބްލިންކަން ފަލަސްޠީނަށް ވަޑައިގަންނަވާފައި މި ވަނީ، އެ ޤައުމުގެ މުސްލިމުންނަށް ނާމާންކަމާއި ބިރުވެރިކަމާ ކުރިމަތިލާން ޖެހިފައިވާ އަނދިރި ދުވަސްވަރެއްގައެވެ. ޔަހޫދީ އިސްރާޢީލުގެ ޓެރެރިސްޓު ސިފައިން ފަލަސްޠީނުގެ ބިންތަކަށް އަރައި ހިންގަމުންދާ ލާއިންސާނީ އުދުވާންތައް އިންތިހާއަށް އިތުރުކޮށްފައިވާ ދަނޑިވަޅެއްގައެވެ. ފަލަސްޠީނުގެ މުސްލިމުންގެ ލޭއޮހޮރުވައިލަމުންދާ ދުވަސްތަކެއްގައެވެ.
ރާމަاللهއަށް ވަޑައިގެންނެވުމުގެ ކުރިން ބްލިންކަން ވަނީ ޤުދުޞްގައި ޔަހޫދީންގެ ޖައްބާރު ބޮޑުވަޒީރު ބެންޖަމިން ނަތަންޔާހޫއާ ވެސް ބައްދަލުކުރައްވާފައެވެ. މި ދެ ބައްދަލުވުމުގައި އޭނާ ވަނީ، އެއްވެސް ޝަރުޠަކާ ނުލައި، ހަމަނުޖެހުންތައް ކުށްވެރިކުރަން ދެ ފަރާތަށް ވެސް ގޮވައިލައްވާފައެވެ.
ފަލަސްޠީނުގެ ބިންތައް ގަދަބާރުން ހިފައި، ފަލަސްޠީނުގެ ރައްޔިތުން އަޅުވެތިކުރުމުގެ ޒަމާންވީ މައްސަލައަށް އޮތް ހައްލަކީ، އިސްރާޢީލާއި ފަލަސްޠީނުގެ މިނިވަން ދެ ދަޢުލަތް ޤާއިމުކުރުން ކަމުގައި އެމެރިކާއިން އަދިވެސް ޤަބޫލުކުރާ ކަމުގައި ބްލިންކަން ވިދާޅުވިއެވެ. އަދި، އެ ކަމަށް ހުރަސްއެޅޭނެ ފަދަ ހުރިހާ އަމަލުތަކަކުން ދުރުހެލިވުމަށް އޭނާ ވަނީ ދެ ފަރާތަށް ގޮވައިލައްވާފައެވެ.
"ފަލަސްޠީނާއި އިސްރާޢީލުގެ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރެވޭނެ އޮތީ އެންމެ ގޮތެއް. އެއީ، ދެ ޤައުމުގެ މިނިވަން ދެ ދަޢުލަތް ޤާއިމުކުރުން. އެ ކަމަށް ހުރަސްއެޅޭ ކަންކަމުގެ ތެރޭގައި ފަލަސްޠީނުގެ ބިންތަކުގައި ޔަހޫދީން ވަޒަންވެރިކުރުވުމާއި، ފަލަސްޠީނުގެ ރައްޔިތުންގެ ގެދޮރު ނެތިކޮށްލުމާއި، މުޤައްދަސް މިސްކިތްތަކާއި ފައްޅިތަކުގެ ކަރާމާތް ނަގައިލުމާއި، ހަމަނުޖެހުން އުފެއްދުން ހިމެނޭ،" ބްލިންކަން ވިދާޅުވިއެވެ.
އަދި، ފަލަސްޠީނާއި އިސްރާޢީލާ ދެމެދު ހަމަނުޖެހުންތައް އިތުރުވެ، ސުލްޙަ ޤާއިމުކުރަން ކުރަމުންދާ މަސައްކަތްތަކަށް އަސަރުކޮށްފައިވާ ކަން ފާހަގަކުރައްވައި، އެ ކަމާ މެދު އޭނާ ވަނީ ކަންބޮޑުވުން ފާޅުކުރައްވާފައެވެ. އަދި، މަޝްވަރާކޮށްގެން މައްސަލަތަކަށް ހައްލު ހޯދުމަށް އޭނާ އެދިވަޑައިގެންނެވިއެވެ.
ދެ ފަރާތުގެ ދެމެދުގައި މަޝްވަރާ ކުރުމަށް އެމެރިކާއިން މެދުވެރިއެއްގެ ދައުރު އަދާކުރާނެ ކަން ހާމަކުރައްވައި، އެމެރިކާގެ ޚާރިޖީ ވުޒާރާގެ އިސް އޮފިޝަލުން ހުޅަނގު އައްސޭރީގައި މަސައްކަތް ކުރާނެ ކަން ވެސް އޭނާ އިޢުލާނު ކުރެއްވިއެވެ. އެމެރިކާގެ ޚާރިޖީ ވުޒާރާއިން ބުނީ، މަޝްވަރާތައް ވިލަރެސްކުރުމުގެ ޒިންމާ އުފުލާނީ އެ ވުޒާރާގެ މެދުއިރުމައްޗާ ބެހޭ އޮފީހުގެ އޮފިޝަލުން ކަމުގައިވާ ބާބަރާ ލީފްއާއި ހާދީ އަމްރު ކަމުގައެވެ.
ހުޅަނގު އައްސޭރީގެ ޖިނީންގައި ޔަހޫދީ ޓެރެރިސްޓު ސިފައިން ހުސްވި ޖަނަވަރީ މަހުގެ ތެރޭގައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ 10 މީހުން ވަނީ ޝަހީދުކޮށްލާފައެވެ. އޭގެ ތެރޭގައި އުމުރުން ދުވަސްވީ އަންހެނެއް ވެސް ހިމެނެއެވެ. އެ ހަމަލާގެ ބަދަލުހިފުމުގެ ގޮތުން ފަލަސްޠީނުގެ މުޖާހިދުން ވަނީ ޤުދުޞްގައި ހުންނަ ޔަހޫދީންގެ ފައްޅިއަކަށް ހަމަލާދީ ހަތް މީހުން މަރައިލާފައެވެ.
ފަލަސްޠީނުގެ މުސްލިމުންނަށް މި އަހަރު ފެށުނީ ވެސް ޔަހޫދީ ޓެރެރިސްޓު ސިފައިންގެ ލޭއޮހޮރުވުންތަކާއި، ލާއިންސާނީ އުދުވާންތަކާ އެކުގައެވެ. ޖަނަވަރީ މަހު އެކަނި ޝަހީދުކޮށްލާފައިވާ މުސްލިމުންގެ ޢަދަދު 35 އަށް އަރައެވެ. މީގެ ތެރޭގައި އަންހެނުންނާއި، އުމުރުން ދުވަސްވީ މީހުންނާއި، ކުޑަކުދިން ވެސް ހިމެނެއެވެ.