ނިއު ޒިލެންޑުގެ އުތުރުގައިވާ އޮކްލެންޑަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި ހާދިސާތަކުގައި މަރުވި މީހުންގެ ޢަދަދު ހަތަރަކަށް އަރައިފިއެވެ. ހުއްޓުމެއްނެތި ބޯކޮށް ވާރޭވެހުމުގެ ސަބަބުން އެ ޤައުމުގެ އެންމެ ބޮޑު ރަށް ކަމުގައިވާ އޮކްލެންޑުގެ ބޮޑު ސަރަޙައްދެއްގައި ވަނީ ފެންބޮޑުވެފައެވެ.
ޖަނަވަރީ 27 ވަނަ ދުވަހު އޮކްލެންޑަށް ވަނީ ރެކޯޑް ޢަދަދަކަށް ވާރޭވެހިފައެވެ. އެ ދުވަހު އެކަނިވެސް އެ ރަށަށް 249 މިލިމީޓަރުގެ ވާރޭވެހިފައިވާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. މީގެ ކުރިން 24 ގަޑިއިރުގެ ތެރޭގައި އެންމެ ގިނައިން ވެހިފައިވާ ކަމަށް ރެކޯޑު ކުރެވިފައި ވަނީ 161 މިލިމީޓަރުގެ ވާރެއެވެ. ފެންބޮޑުވުމާ ގުޅިގެން އޮކްލެންޑުގައި ކުއްލި ހާލަތު އިޢުލާނުކޮށްފައިވާއިރު، މި ކަމުގެ އަސަރުކޮށްފައިވާ މީހުންގެ ޢަދަދު 1.6 މިލިޔަނަށް އަރައެވެ.
ފެންބޮޑުވުމާ ގުޅިގެން ހިނގި ހާދިސާތަކުގައި މިހާތަނަށް ހަތަރު މީހަކު މަރުވެފައިވާއިރު، ފުރަތަމަ ދެ މީހުންގެ ހަށިގަނޑު ފެނިފައި ވަނީ ޖަނަވަރީ 27 ވަނަ ދުވަހުއެވެ. އެއީ އޮކްލެންޑުގެ އުތުރުގައިވާ ވައިރާއޫ ވެލީއިންނެވެ. ތިންވަނަ މީހަކު މަރުވެފައި ވަނީ އޮކްލެންޑުގެ މެދުތެރޭ ސަރަޙައްދެއްގެ ބިންގަނޑު ކަނޑައިގެން ދިޔުމުންނެވެ. އަދި، ހަތަރުވަނަ މީހާގެ ހަށިގަނޑު ފެނިފައި ވަނީ އޮކްލެންޑުގެ ދެކުނުގައި އޮންނަ އޮނެފެރޯއިންނެވެ.
"ފެންބޮޑުވުމުގެ ސަބަބުން ގިނަ ޢަދަދެއްގެ ބަޔަކަށް ވަނީ އަސަރުކޮށްފައި. އޮކްލެންޑަށް މި ވަނީ ބޮޑު ހިތާމައަކާ ކުރިމަތިވެފައި. އަދި ގިނަ ޢަދަދެއްގެ ފުރާނަ މި ވަނީ ގެއްލިފައި،" ނިއު ޒިލެންޑުގެ ބޮޑުވަޒީރުގެ ނައިބު ކާރމެލް ސެޕުލޯނީ ވިދާޅުވިއެވެ.
ފެންބޮޑުވުމުގެ ސަބަބުން އޮކްލެންޑުގައި ކަރަންޓުގެ ޚިދުމަތް މެދުކެނޑިފައިވާ 24,000 އަށްވުރެ ގިނަ ގެއަށް އެ ޚިދުމަތް އަލުން ގުޅައިދިނުމަށް އޮފިޝަލުން ދަނީ މަސައްކަތް ކުރަމުންނެވެ. އަދި، ގިނަ ޢަދަދެއްގެ ގެދޮރުން ސާފު ބޯފެނުގެ ޚިދުމަތް ވެސް ވަނީ މެދުކެނޑިފައެވެ. ވިއްސާރައިގައި އޮކްލެންޑުގެ ވައިގެބަނދަރުގެ ޓަރމިނަލްގައި ވެސް ފެންބޮޑުވެ، ޚިދުމަތްތައް މެދުކަނޑައިލަން ޖެހުނެވެ.