އިންޑިއާގެ ކޮޗިންއަށް ބޭސްފަރުވާއަށް ގޮސް އުޅެނިކޮށް ގެއްލުނު މީހާ އަދިވެސް ނުފެންނަކަމަށް އޭނާގެ އާއިލާއިން ބުނެފިއެވެ. ގެއްލިގެން ހޯދަމުންދަނީ ކ. ތުލުސްދޫއަށް ނިސްބަތްވާ މުޙައްމަދު މަހުދީ ނަމަކަށް ކިޔާ 35 އަހަރުގެ މީހެކެވެ.
އޭނާ ގެއްލިފައިވަނީ އިއްޔެ ހެނދުނު އަމްރިތާ ހޮސްޕިޓަލް ސަރަޙައްދުންކަމަށް އޭނާގެ އާއިލާއިން ވަނީ ބުނެފައެވެ. އަދި އޭނާއަކީ ނަފްސާނީ ބައްޔެއްކަމަށްވާ ބައިޕޯލަރ ޑިސްއޯޑަރއަށް ފަރުވާ ހޯދާ މީހެއްކަމަށް އާއިލާއިން ބުނެފައިވެއެވެ.
ގެއްލުނު މީހާގެ އާއިލާއިން ބުނީ، އާއިލާގެ ފަރާތުން އެސަރަަހއްދުގެ ބައެއް ސީސީޓީވީ ފުޓޭޖު ހޯދައިގެން އޭނާ ފެނޭތޯ މަސައްކަތް ކުރަމުން އަންނަކަމަށެވެ. އެގޮތުން އަމްރީތާ ހޮސްޕިޓަލު ސަރަހައްދާއި، އެ ސަރަހައްދުގެ ރެއިލްވޭ ސްޓޭޝަނެއް ކައިރީގައި އޭނާ އުޅޭ މަންޒަރު ސީސީޓީވީ ފުޓޭޖުން ފެންނަކަމަށް އާއިލާއިން ބުންޏެވެ. ނަމަވެސް މިހާތަނަށް އޭނާ އާއިލާއަށް ފެނިފައި ނުވާކަމަށް ބުންޏެވެ.
ގެއްލުނު ފިރިހެން މީހާ ހޯދުމަށް އާއިލާއިން ވަނީ، އިންޑިއާގެ ފުލުހާއި އަދި ފޮރިން މިނިސްޓްރީގެ އެހީއަށްވެސް އެދިފައެވެ. ފޮރިން މިނިސްޓްރީއިން ވިދާޅުވީ މި މައްސަލަ ހުށައެޅުމާއެކު، އިންޑިއާގެ ދިއްލީ ޕޮލިސްއާއި ގުޅިގެން މީހާ ހޯދުމަށް ކުރަންޖެހޭ މަސައްކަތްތައް ފަށާފައިވާކަމަށެވެ.