އދ.މާފުށިވަރު ރިސޯޓް ކައިރިއަށް މޫދަށް ފައިބައިގެން އުލެނިކޮށް ނިޔާވި، ޢުމުރުން 18 އަހަރުގެ ރ. އިނގުރައިދޫ, މާހާ, ނިޝާހް ޢަބްދުލް ޣަފޫރަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއްގެ ގޮތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ސިފަކުރައްވައިފިއެވެ.
ނިޝާޙް ނިޔާވީ، އދ.އަތޮޅު މާފުށިވަރު މޯލްޑިވްސް ރިސޯޓުގައި ބޮއިއަޅަން މޫދަށް ފައިބައިގެން އުޅެނިކޮށް ހާލު ދެރަވެގެން، އދ. މަހިބަދޫގައި ހުންނަ އަތޮޅު ހޮސްޕިޓަލަށް ގެންގޮސް ފަރުވާދެމުން އަންނަނިކޮށްކަމަށް ފުލުހުން ވިދާޅުވިއެވެ.
ނިޝާޙު އަބްދުލްޣަފޫރަކީ 18 ނޮވެމްބަރު 2018ގައި ރ. އުނގޫފާރުގައި މޫދަށް އެރިއުޅުނު ކުއްޖަކު ގެނބުނު ހިތާމަވެރި ހާދިސާގައި، އެ ކުއްޖާގެ ފުރާނަ ސަލާމަތްކުރުމުގައި ނަމޫނާއާއި ހިތްވަރުދެއްކި ސްކައުޓެކެވެ. ސްކައުޓް އެސޯސިއޭޝަނުން ވަނީ ނިޝާހުގެ އެ މަތިވެރި ކެރުންތެރިކަމާއި، ނުގުޑާފަދަ އަޒުމުވަރުގަދަ އަމަލުގެ ސަބަބުން ސްކައުޓްސް އެސޯސިއޭޝަނުން ދޭ ގެލެންޓަރީ ރަން މެޑަލްވެސް ނިޝާޙްއަށް މީގެ ކުރިން ދީފައެވެ. އަދި ނިޝާޙްގެ އެ ހިތްވަރުގަދަކަން ފާހަގަކޮށް، 2019 ވަނަ އަހަރު ރައީސުލްޖުމްހޫރިއްޔާގެ ޚާއްޞަ އިނާމުވެސް ނިޝާހްއަށް ވަނީ ދެއްވާފައެވެ.
ސްކައުޓްސް އެސޯސިއޭޝަނުން ވިދާޅުވެފައިވަނީ ނިޝާޙުގެ އެ ހިތްވަރުގަދަ އަމަލަކީ ކޮންމެ ސްކައުޓަކަށްވެސް މަތިވެރި ނަމޫނާއެއްކަމަށެވެ.
ނިޝާޙް ނިޔާވުމާއި ގުޅިގެން، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ، ނިޝާޙްއަކީ ހިތްވަރުގަދަކަމާއި، އިންސާނިއްޔަތުކަމުގެ ލާމަސީލު މިސާލެއްކަމަށް ސިފަކުރައްވާފައެވެ. ރައީސުލުމްހޫރިއްޔާ ވިދާޅުވީ ނިޝާޙްއަކީ ސްކައުޓް އެސޯސިއޭޝަނަށް ރީތި ނަން ހޯދައިދިން ޒުވާނެއްކަމަށެވެ.
އިއްޔެ އަޅުގަނޑުމެންނާ ވަކިވެގެންދިޔަ ނިޝާހް ޢަބްދުލްޣަފޫރަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއް. ސްކައުޓް އެސޯސިއޭޝަނަށް ރީތި ނަން ހޯދައިދިން ޒުވާނެއް. އެ މަރުޙޫމްގެ ފުރާނައަށް މާތް ﷲ ހެޔޮ ރަޙުމަތް ލައްވައި ޢާއިލާއަށް ކެތްތެރިކަން ދެއްވާށި.
— Ibrahim Mohamed Solih (@ibusolih) January 31, 2023
ނިޝާހަކީ މޫދަށް ފަރިތަ ޒުވާނެއްކަމަށް އެރަށު މީހުން ބުނެއެވެ. ނިޝާހް ނިޔާވި ހާދިސާއާއި ގުޅިގެން އިތުރަށް ބަލަންޖެހޭ ކަންކަން ބަލަމުން އަންނަކަމަށް ފުލުހުން ވަނީ ވިދާޅުވެފައެވެ.